Батлан хамгаалахын сайд Д.Батлутын зөвлөхөөр Г.Сайханбаяр ажиллаж байна

Ерөнхий сайд Г.Занданшатарын Засгийн газарт багтсан сайдуудын бараг 90 хувь нь Ерөнхийлөгч У.Хүрэлсүхийн хамаарал бүхий хүмүүс бий. Тэдний нэг Батлан хамгаалахын сайд Д.Батлут. Түүний хувьд батлан хамгаалахын салбарыг толгойлж ажиллах ямар ч туршлагагүй анхны сайд гэж болно. Ажлын туршлагаас нь харахад бүх зүйл тодорхой харагдана.

- 1994-2000 онд “Эрдэнэт хивс” ХХК-д туслах ажилтан

- 2003-2006 онд “Дэлхийн Зөн Монголд” олон улсын байгууллагад гүйцэтгэх захирал

-2006-2007 онд Орхон аймгийн Газрын харилцаа барилга хот байгуулалтын газарт мэргэжилтэн

-2008-2012 онд Орхон аймгийн Баян-Өндөр сумын Засаг даргын орлогч

- 2006-2013 онд НАМЗХ-ны дарга

-2013-2020 онд Орхон аймгийн МАН-ын дарга

-2010-2012 онд Баян-Өндөр сумын НАШБ-ын дарга

-2008-2020 онд Орхон аймгийн ИТХ-ын төлөөлөгч, тэргүүлэгч, бүлгийн дарга

-2016-2020 онд Орхон аймгийн Засаг дарга бөгөөд Эрдэнэт хотын захирагч

-2020-2024 онд Монгол Улсын Их Хурлын гишүүн

-2024 оноос Монгол Улсын Их Хурлын гишүүн

-2025 оноос Монгол Улсын Засгийн газрын гишүүн, Батлан хамгаалахын сайдаар ажиллаж байна.

Хивсний үйлдвэрийн туслах ажилтнаас Орхон аймгийн Засаг дарга хүртлээ албан тушаал ахисан түүнийг У.Хүрэлсүхийн утсан хүүхэлдэй гэдэг нь ийм учиртай.

Зөвлөхөөр нь Ерөнхийлөгч У.Хүрэлсүхийн гарын хүн Батлан хамгаалахын сайд асан Г.Сайханбаяр ажиллаж байгаа нь тэд ил цагаандаа гарсны нэг илрэл гэлтэй. Учир нь Г.Сайханбаяр нь Ерөнхийлөгч У.Хүрэлсүхтэй Цэргийн дээд сургуульд хамт сурч байсан цэргийн ангижав. Тиймдээ ч 2020 онд У.Хүрэлсүхийн Засгийн газарт Батлан хамгаалахын сайдаар томилогдож, дөрвөн жил ажилласан. Улмаар 2024 оны УИХ-ын сонгуулийн 1-р тойрог, Архангай, Өвөрхангай, Баянхонгорт нэр дэвшсэн боловч өвдөг шороодсон.

Өдгөө Батлан хамгаалахын сайд Д.Батлутын зөвлөх сэтэртэй, яамны дарга нарын дээр сууж, татвар төлөгчдийн мөнгөөр цалинжаад сууж байна. Эндээс үзэхэд, яамдуудын сайд, зөвлөх, туслах гээд төрийн алба хаагчид Ерөнхийлөгчийн хүмүүсээр дүүрчээ.

УИХ-ын гишүүд, Засгийн газрын сайд нарын зөвлөхүүд дунджаар 3-4 сая гаруй төгрөгийн цалинтай. Гэхдээ орон тооны болон орон тооны бус гэж ангилна. Харин орон тооны бус зөвлөхүүд нь цалингүй ажилладаг аж.

Ерөнхий сайд Г.Занданшатарт найман зөвлөх, УИХ-ын дарга Н.Учралд зургаан зөвлөх, УИХ-ын гишүүд болон сайд нар хоёроос гурван зөвлөхтэй юм.

М.Үүрийнтуяа