Хөшигний ард: Х.Нямбаатарыг чиглэсэн “татар ажиллагаа”-ны цаад учир ба сүүлчийн Могикан
УИХ-ын намрын чуулган завсарлаж улс төр жаахан намжих нь уу гэтэл буцаад халж эхллээ. Энэ удаагийн гол бай Х.Нямбаатар. Тэрээр экс Ерөнхий сайд Л.Оюун-Эрдэнийн үеэл төдийгүй түүнийг МАН-ын босс байх үед Хаадын хаанаар нэрлэгдэж, хамаг хар бор ажил хийгээд холбоо координацийг хийж ирсэн нэгэн. Ямартаа л нийслэлийг авахын тулд ХЗДХ-ийн сайд байхад нь хүчээр авчирч Хотын дарга болгож байсан түүх саяхных. Гэвч эзний алба ээлжтэй, хааны алба халаатай. Түүнийг улс төр-эрх мэдлээс зайлуулах кампанит ажил нэгэнт эрчээ аваад байна.
Х.Нямбаатар бол Л.Оюун-Эрдэнийн вант улсын сүүлчийн Могикан. Түүний гарт хот гэж их айлаас гадна нийслэлийн МАН-ын хороо бий. Нийслэлийн МАН-ын хороо гэдэг МАН-ын тал нь. Тиймээс Х.Нямбаатарыг түлхэн унагах нь нөгөө талынхны хувьд чухлаас чухал. Нөгөө тал гэдэг нь нэгдүгээр хүний фракц /засаглал/. Тиймээс Д.Амарбаясгаланг түлхэн унагасан тактикаар тэд төлөвлөгөөгөө боловсруулсан бололтой. Х.Нямбаатартай холбоо хамаарал бүхий бүх хүмүүсийг нэгбүрчлэн жагсааж, нэгжин шалгаж, мөчилж буй дүр зураг сүүлийн өдрүүдийн хэвлэл, олон нийтийн сүлжээний гол сэдэв болоод байна.
Нийслэл, дүүргийн татварын газрын дарга нар Дубай руу зугаалсан гэх асуудал нийгэмд шуугиан тарьж, асуудал өндрөө авч Ерөнхий сайд хүртэл түүнд санаа тавьж, зарлиг буулгасан нь ердөө улс төр бөгөөд чухамдаа Х.Нямбаатарын сахлаар оролдож буй өнгөн хэсэг. Хөшигний ард, нийгэм, олон нийтийн мэдээллээс далдуур чухам хэнийг шалгаж, хэрхэн үймж бужигнаж байгааг хэлэхэд бэрх. Эцэст нь миний нэг муу албан тушаалаас болж энэ хэд маань ингэтлээ зовно гэж юу байхав гэдэг монгол хүний этикээр бууж өгнө. Тоглоомын дүрэм нь ийм юм. Гэвч Х.Нямбаатарын зүгээс ямар тоглолт гарахыг таашгүй.
Нэмээд хэлэхэд түүний гарт байгаа “Нийслэлийн фракц” харьцангуй хүчтэй фракц. Ард нь Д.Сумъяабазараас авахуулаад Д.Амарбаягалан, Л.Оюун-Эрдэнэ нар бий. Ерөөс хоёр хуваагдсан МАН-ын хагарал эцсийн ялалт хэний талд байхыг энэ өвлийн улс төр, Х.Нямбаатар ба нийслэлийн фракц руу чиглэсэн зодоон шийдэх нь.
Х.Нямбаатар бол жижиг гарын улстөрч биш гэдгийг мартаж болохгүй. Нийслэлийн намаа удирдан сонгуульд орж, 45 суудлаас 40-ийг нь авч чадсан нь түүний цагаан дээр хараар бичсэн бодит амжилт. Хотыг удирдах болсноор олон нийтээс ихээхэн дэмжлэг авах болсон. Өмнө нь хэрэгжүүлж байгаагүй олон шинэ төслүүдийг зориглон хийж байгаагаараа дээрх оноог авах болсон. Сошиалд шүүмжлүүлэхээс айдаггүй үзэлцдэг түүний бас нэг давуу тал.
Гэвч МАН-ын төмөр машин нэг эргэвэл замд таарсан бүхнээ хуй хамдаг жамтай. Хэрхэхийг ирэх өдрүүд харуулна.
М.Үүрийнтуяа
