Хотын фракцын тавьсан сум Н.Тавинбэхийг онилж Эрчим хүчний сайд Б.Чойжилсүрэнгийн сэнтий ганхаж эхлэв үү
“ДЦС-IV” ТӨХК-ийн гүйцэтгэх захирал Н.Тавинбэхийг өнгөрсөн долоо хоногт АТГ-аас 10 аймагт дулааны станц барих төсөлтэй холбогдуулан албан тушаалын байдлаа урвуулан ашигласан, үндэслэлгүйгээр хөрөнгөжсөн гэх хэрэгт мөрдөн шалгах ажиллагаа явуулж байна.
Мөрдөн шалгах ажиллагааны явцад зөвлөх үйлчилгээ үзүүлэгч МУ-ын нэр бүхий аж ахуйн нэгж нь Н.Тавинбэхийг Эрчим хүчний сайдаар ажиллаж байхад нь түүний зөвлөхөөр ажиллаж байсан иргэн П.Товуудоржийн үүсгэн байгуулсан компани болох нь тогтоогджээ. Мөн зөвлөх үйлчилгээтэй холбоотой 2.1 сая ам.доллар буюу 7 тэрбум гаруй төгрөгийн санхүүжилтийг гаргуулан авсан байна. Уг хэрэгтэй холбогдуулан одоогийн байдлаар 3 хүнийг сэжигтнээр баривчилсан бөгөөд 21 газарт прокурорын зөвшөөрлөөр мөрдөн шалгах нэгжлэгийн ажиллагааг зохион байгуулсан байна.
Нэгжлэгээр Н.Тавинбэх ба түүний хамаарал бүхий этгээдүүдийн нэр дээрх өндөр үнэтэй олон тооны үл хөдлөх хөрөнгө болон үнэт эдлэлүүдийг хураан авчээ.
Эрчим хүчний сайд асан Н.Тавинбэхийн хувьд
- 2020 онд Ерөнхий сайд асан У.Хүрэлсүхийн танхимд Эрчим хүчний сайд, -
- 2022 оноос хойш Төрийн нарийн бичгийн даргаар,
- 2025 оны долдугаар сард “Дулааны гуравдугаар цахилгаан станц” ТӨХК-д Бүрэн эрхт төлөөлөгчөөр томилогдон ажилласан.
Хамгийн сүүлд тэрбээр 2025 оны арванхоёрдугаар сард "ДЦС-IV" ТӨХК-ийн гүйцэтгэх захирлаар томилогдoод байгаа билээ.
Он гарснаас хойш МАН-ын дотоод улс төр халуун хэвээр байгаа. Хотын дарга Х.Нямбаатарыг түлхэн унагах нөгөө талынхны ажиллагаа үргэлжилсэн хэвээр. Нөгөө тал гэдэг нь Ерөнхийлөгчийн фракц.
Татварын дарга нар Дубайд аялсан асуудлыг сошиалын хар массд хаяж өгч хотын дарга Х.Нямбаатарыг хатгаж эхэлсэн байдаг.
Гэхдээ хоёр тал хөзрөө ээлжилж дэлгэх нь тоглоомын дүрэм. Тэгвэл энэ удаагийн Н.Тавинбэхийн баривчилгаа нь хотын фракцын талаас тавьсан “сум” байх өндөр магадлалтай юм. Учир нь Эрчим хүчний сайд асан Н.Тавинбэх бол Ерөнхийлөгчийн битүү морь. Ил гаргаж илж таалдаггүй ч гэсэн Ерөнхий сайд байхдаа ивээлдээ авч Эрчим хүчний сайдаар ажиллуулж байсан. Одоо түүний баривчилгаатай холбоотойгоор Эрчим хүчний сайд Б.Чойжилсүрэнг огцруулах асуудал хүртэл сөхөгдөөд эхэлсэн. Үүнээс үзвэл эсрэг талын сум байгаа онилж ажиллагаагаа эхэлсэн гэж харж болохоор.
Бидэнд ирсэн мэдээллээр, ирэх гуравдугаар сард энэ дайн улам ширүүсч, улс төрийн томоохон хар салхи дэгдэнэ гэнэ. Хоёр тал нийслэлийн МАН-ын хорооны төлөө жинхэнэ хэн нь хэн бэ гэдгээ үзэлцэнэ. Яг л МАН-ын даргын төлөөх тулаан шиг. Түүнд бэлдэж таг алга болсон экс Ерөнхий сайд Л.Оюун-Эрдэнэ болон УИХ-ын дарга асан Б.Амарбаясгалан нар жинхэнэ “дайны” стратегиа боловсруулж байгаа гэх мэдээлэл байна.
Тэгэхээр нийслэлийн МАН-ын хороог авах тулаан хэрхэн үргэлжилж, асуудал хаашаа шийдэгдэх нь ирэх саруудад илүү тод харагдана.
М.Үүрийнтуяа
