БАРИМТ: АТГ-ийн хаалга татаж байсан Өмнөговь аймгийн Засаг дарга Н.Энхбат нууц амрагтаа 20 тэрбумын тендер бэлэглэсэн үү

Монгол улсын төсвийн 80 гаруй хувийг дангаараа бүрдүүлдэг Өмнөговь аймгийн Засаг дарга Н.Энхбат нууц амрагтаа 20 тэрбумын тендер бэлэглэжээ гэх чих сортойх мэдээлэл олны анхаарлыг татаад байна. Улсын төсөв улайж, уул усны дэргэдэх Засаг дарга нар ар өвөргүй ах дүү нартаа тендер шахаж суух нь шударга нийгэмд тэнцэхгүй жишиг. Гэвч энэ жишиг өнөөг хүртэл ил, далд үргэлжилсээр байгаа нь харамсалтай.

Мэдээллийг тодруулбал, Өмнөговь аймгийн Засаг дарга Н.Энхбат хамаарал бүхий этгээдүүдэд хэд хэдэн тендерүүдийг олгодог болох нь баримтаар нотлогдсон байна. Тухайлбал,  Н.Энхбат нь  ЗДТГ-т мэргэжилтнээр ажиллаж байсан М.Мөнхмаа-г Хөгжлийн бодлогын хэлтсийн даргын үүрэг гүйцэтгэгчээр томилсон. Үүний дараагаар М.Мөнхмаагийн төрсөн аав Мятав, ахынх нь эзэмшлийн “Эрхэс баян говь” ХХК барилга, бүтээн байгуулалтын бараг бүх тендерт ялдаг болсон нь анхаарал татна.

Өөрөөр хэлбэл “Эрхэс говь” ХХК нь нийт 25 тэрбум төгрөгийн өртөг бүхий 31 тендерт оролцож, 20 тэрбум төгрөгийн тендерт шалгарсан нь санамсаргүй давхцал гэхэд хэтэрхий “төгс” үзүүлэлт юм. Өмнөговь аймагт зарлагдсан барилгын салбарын тендер болгонд ганцхан компани ялж буй нь баримтаар нотлогдов.

Мөн түүнчлэн Засаг даргын багын найз, аймгийн Худалдан авах ажиллагааны газрын дарга Э.Ганхуяг уг компанийн тендерт ялах ажлыг зохион байгуулдаг талаар нутгийнхан ил, далдгүй ярьдаг гэнэ.  Түүний шалгаруулсан 30 тендерээс 28 нь хуульд нийцээгүй болохыг Сангийн яамнаас тогтоож байжээ.

Тэгвэл Өмнөговь аймгийн Засаг дарга Н.Энхбат гэж хэн бэ?

Түүний хувьд Өмнөговь аймгийн Баяндалай сумын уугуул бөгөөд ХААИС-ийн Бизнесийн сургуулийг эдийн засагч мэргэжлээр төгссөн нэгэн.

Н.Энхбат их сургуулиа төгсмөгцөө,

•  2007 оноос “Ажнай” Д.Бат-Эрдэнийн туслахаар ажиллажээ.
• 2010 онд Өмнөговь аймгийн “Хаан банк”-ны захирлаар томилогдож,
• 2012-2020 онд Өмнөговь аймгийн ИТХ-ын төлөөлөгч
• - 2024 оноос Өмнөговь аймгийн Засаг даргын суудалд тухалжээ.

Түүний намтарт өмнө нь АТГ-ын хаалга татаж байсан хар түүх ч бий. Тодруулбал, 2022 оны улсын баяр наадмын үеэр тухайн үеийн Өмнөговь аймгийн Засаг даргын орлогч байхдаа Н.Энхбат, улсын заан Н.Жаргалбаяртай утсаар ярьсан бичлэг цахим сүлжээнд цацагдсан. Уг бичлэгт Н.Энхбат Н.Жаргалбаярт хандан “Чи тавын даваанд манай Нямааг амлачих. Тэгээд надад хүссэн тоогоо хэл” гэсэн байдаг. Эргэн сануулахад тэр жилийн улсын баяр наадмын хүчит бөхийн барилдааны тавын даваанд Н.Жаргалбаяр заан Өмнөговь аймгийн Ноён сумын харьяат, аймгийн арслан Э.Нямааг амлаж аваад, өвдөг шороодон Э.Нямаа улсын начин болсон. Тэгвэл үүнтэй холбоотойгоор “Начны найраа”-ны хэрэгт Н.Энхбат, Н.Жаргалбаяр хоёрыг АТГ-аас хавтаст хэрэг нээж, шалгаж байсан түүхтэй.

Хөрөнгө орлогын мэдүүлэг

Өөрийн орлого: 69 сая

Гэр бүлийн орлого: 49 сая

Нэг орон сууц, хоёр автомашины зогсоолтой: 251 сая

Lexus, RX 450 загварын автомашинтай: 100 сая

Мал: Адуу 25, Хонь 18, Ямаа 41- 33 сая

5 га газартай: 30 сая

Үнэт эдлэл: 82 сая

Хадгаламж: 58 сая

Урьд мэдүүлсэн буюу Засаг дарга болохоос өмнөх ХОМ-тэй нь харьцуулахад өөрийн орлого нь 24 саяар, гэр бүлийн орлого нь 10 саяар, орон сууцны үнэлгээ нь 75 саяар, хадгаламж нь 26 саяар өсөж, 100 саяын машинтай болсон байна.