“Эрдэнэс криктикад минералс” ТӨҮГ-ын захирал Д.Тогтохсүрэнг 48 цаг саатуулна

Өчигдөр /2026.01.26/ УИХ-ын гишүүн асан, өдгөө “Эрдэнэс криктикад минералс” ТӨҮГ-ын захирлаар ажиллаж буй Д.Тогтохсүрэнгийн албан өрөөнд АТГ-ынхан прокурорын зөвшөөрлөөр хойшлуулшгүй ажиллагааны хүрээнд нэгжлэгхийж 48 цагийн хугацаатайгаар саатуулжээ.

Тодруулбал, түүнийг Эрүүгийн хуулийн 22 дугаар бүлэгт заасан авлига, албан тушаалын гэмт хэрэгт холбогдуулан ийнхүү мөрдөн шалгах ажиллагаа явуулж буй аж. Өнгөрөгч сонгуулиар өвдөг шороодсон УИХ-ын экс гишүүдээ гудамжинд гаргахгүйн тулд Ардын намынхан албан тушаал хуваарилах гэж аргаа барцгаасан. Тэднээс хамгийн өндөр албан тушаалд очсон нь Д.Тогтохсүрэн.

УИХ-ын гишүүн асан, УИХ дахь МАН-ын Бүлгийн дарга асан тэрээр 1700 гаруй ажилчинтай “Монголросцветмет” ТӨҮГ-ын Ерөнхий захирлаар 2024 онд томилогдсон. Уг нь тэрбээр, Өвөрхангайдаа уурын зуухны бизнестэйг эс тооцвол уул уурхайгаас тэс хол хүн. Гэсэн ч “Монголросцветмет” ТӨҮГ-ын Ерөнхий захирлаар очсон нь цэвэр улс төрийн томилгоо.

Магадгүй МАН-ын Бүлгийг дөрвөн жил удирдсаных нь шагналд МАН-ын удирдлагууд гар татахыг хүсээгүй биз ээ. Тэгэх тусмаа тэрээр Ерөнхийлөгч У.Хүрэлсүхийн талыг баримтлагч. Гэвч эзний алба ээлжтэй, албан тушаал, авилгын хэргээр АТГ-ын хаалгыг татаж буй нь чухамдаа МАН-ын дотоод хагарал дээд цэгтээ тулсны илрэл гэж “уншиж” болно. Түүнийг УИХ-ын гишүүн байхад нь нэг бус иргэн гэмт хэрэг үйлдсэн байж болзошгүй хэмээн АТГ-т шалгуулахаар хандаж байсан билээ. Үүний дагуу 2019 оноос Д.Тогтохсүрэнд хэрэг бүртгэлтийн хэрэг нээж байсан. Тухайлбал, түүнийг Өвөрхангай аймгийн Засаг даргаар ажиллаж байхдаа тендерт оролцогч аж ахуйн нэгжийг хясан боогдуулж, удирдлагаас нь 70 сая төгрөгийн хахууль авсан гэх гомдлыг аргагүй байдалд орж мөнгө өгсөн иргэн нь гаргаж байсан удаатай.