Б.Энхбаяр: 2.2 тэрбумын “Нууц эвлэрлийн гэрээ“-г хууль хяналтын байгууллагад шалгуулахаар шилжүүлэв
Өмнөх Ерөнхий сайд Л.Оюун –Эрдэнэд “Сэлэмний чинь ир, хутганы чинь хуй болъё” хэмээн ам тангараг өргөж байсан Б.Энхбаяр одоо экс Ерөнхий сайдын эсрэг улс төржилтөд Г.Занданшатарын сэлэмний ир, хутганы хуй болчихсон давхиж яваа. Нүүрсний хулгайчдыг шил дараалан илрүүлнэ хэмээн ээлжит сайдын албаа авсан Б.Энхбаяр үе үе сүржин мэдэгдэл хийж гарч ирдэг нь ч зуршил болж байна.
Өмнө нь “Хэро энтертайнмент” “Монгол хаан“ жүжиг болон гадаад сурталчилгааг хийлгэхээр гадны PR компанитай хийсэн гэрээгээ нууцад авсан. Үүний санхүүжилт болох 7 тэрбум төгрөгийг “Эрдэнэс Оюутолгой“ компаниас гаргасан” тухай дэлгэж байлаа. Ингэхдээ, “Эрдэнэс Оюутолгой” компани нь Л.Оюун-Эрдэнийн Засгийн газрын шийдвэрийн дагуу гадаадын “Atticus Partners” Ltd болон “Atticus communications” Ltd компанитай дөрвөн удаагийн үйлдлээр нийт 1.9 саяам.долларын (7 орчим тэрбум төгрөг) гэрээ хийсэн. Энэ мөнгөөр "Хэро энтертайнмент" компанийн бүтээл “Монгол хаан” жүжгийн гадаад сурталчилгааг хийж, гэрээгээ тагнуулын байгууллагын шийдвэрээр нууцад авсан гэгдэж байв.
Тэгвэл өнгөрсөн Баасан гарагт /2026.01.30/ хийсэн мэдэгдэл нь мөн л Л.Оюун-Эрдэнийн Засгийн газрын үел хийгдсэн “Нууц эвлэрлийн гэрээ”-г хуулийн байгууллагад шалгуулахаар өгсөн тухай. Тодруулбал, “Өмнөх Засгийн газрын үед байгуулсан 468 мянган фунт стерлингийн дүн бүхий төрийн зарим албан тушаалтнуудын талаар сөрөг мэдээллийг бүрэн устгуулж, цаашид адил утга агуулга бүхий мэдээллийг олон нийтэд түгээхгүй байх “Нууц эвлэрлийн гэрээ”-г хууль хяналтын байгууллагад шалгуулахаар шилжүүлэв" гэжээ.
Өөрөөр хэлбэл, 2024 оны 11-р сарын 12-ны өдөр тухайн үеийн ЗГХЭГ-ын тэргүүн дэд дарга Б.Солонго болон ИБУИНХУ-ын иргэн Маурис Даффи, Ричард Боули нарын хооронд байгуулсан "Нууц эвлэрлийн гэрээ" байгуулсан аж. Гэрээний агуулга нь нийгмийн сүлжээ ашиглан түгээж байсан Монгол Улсын зарим төрийн албан тушаалтнуудад хамаарах сөрөг мэдээллийг бүрэнустгуулж, цаашид адил утга, агуулга бүхий мэдээллийг олон нийтэд түгээхгүй, хэвлэн нийтлэхгүй байхыг баталгаажуулж, цаашлаад талуудын гэрээгээр тохирсон, хоорондын яриа хэлэлцээ, олж авсан бүхий л мэдээллийг нууцлахаар тохирч, Монголын талаас 468,008.22 фунт стерлингийг гадаад улсын иргэдэд төлөхөөр тохиролцсон байжээ.
Уг гэрээнд заасан төлбөр нь өнөөгийн ханшаар бол 2.3 тэрбум төгрөг аж. Өөрөөр хэлбэл, Монголын зарим албан тушаалтны сөрөг мэдээллийг устгахад дээрх хэмжээний төлбөр зарцуулсан гэсэн үг. Дээрх гэрээг дэд сайд Б.Солонго 2024 онд Засгийн газрын Хэрэг эрхлэх газрын тэргүүн дэд даргаар ажиллаж байхдаа ИБУИНХУ-ын иргэн Маурис Даффи, Ричард Боули нарын хооронд 2024 оны арванхоёрдугаар сарын 12-нд "Нууц эвлэрлийн гэрээ" нэртэйгээр байгуулсан аж.
Хууль зүйн сайд Б.Энхбаярын мэдэгдэл хийх өдрүүд олон ч дорвитой үр дүн гарч байгаа нь ховор. Тиймээс эдгээр асуудлууд хууль хүчний байгууллага дээр хэрхэн үргэлжилж, ямар үр дүн гарах нь олон нийтэд сонин байна. Түүнээс биш сүржин мэдэгдэл хийж хэд хоноод мартагддаг байвал энэ нь мэдэгдэл биш “попрол” болох хандлага руу далийж эхэлнэ. Тиймээс “Нууц эвлэрлийн гэрээ”-ний асуудал хэрхэн шийдэгдэхийг харах л үлдлээ.
