Харамсалтай нь Эпштэйний файлд Х.Баттулгатай холбоотой 81 файл илэрлээ

XXI зууны хамгийн дуулиан шуугиантай, гол нь төрийн өндөр албан тушаалтнууд холбогдсон гэмт хэрэг гэгддэг Эпштейний файлууд хоёр дахь удаагаа өнгөрсөн Бямба гаригт олон нийтэд ил болж, 3 сая баримт материал дэлгэгдэн дэлхий даяар шуугиан тариад байна. Эдэн дунд Монгол Улстай холбоотой илэрцүүд хэдэн зуугаараа байгаа нь үнэхээр харамсалтай. Тэгэх тусмаа Улсынхаа Ерөнхийлөгч байсан хүмүүсээ хэрэгт холбогдоосой гэж зүхэх хэн байх билээ. Нэг ёсондоо үе үеийн Ерөнхийлөгчид бидний үндэсний дархлаа учраас болж л өгвөл өмөөрч, өмгөөлөх нь үндэсний аюулгүй байдлын нэг баталгаа юм. Харамсалтай нь Эпштейний гэх шинээр задарсан файл дунд АНУ-ын Ерөнхийлөгч Дональд Трамп, Билл Клинтон тэргүүтэй дэлхийн нэр хүндтэй төрийн зүтгэлтнүүдээс авахуулаад манай улсын хоёр ч Ерөнхийлөгч асны нэрс холбогдож, харилцсан мэйл юутайгаа дэлгэгдээд байна.

Тодруулбал, Х.Баттулгатай холбоотой 81 имэйл (давхардсан тоогоор), Ц.Элбэгдоржтой холбоотой 51 имэйл (мөн давхардсан тоогоор), Ерөнхий сайд асан Ч.Сайханбилэгтэй холбоотой 4 имэйл илэрлээ.

Дэлгэгдсэн баримтуудад Ц.Элбэгдорж, Х.Баттулга гэсэн хоёр Ерөнхийлөгч, Ч.Сайханбилэг Ерөнхий сайд, нэр нь дурдагдаагүй Гадаад харилцааны сайд, бизнесийн зарим төлөөлөл, мөн хоёр Ерөнхийлөгчийн төлөөний хүмүүсийн захидал харилцаа байгаа юм.

Ц.Элбэгдоржийг төлөөлж түүний гадаад бодлогын зөвлөх байсан Л.Пүрэвсүрэн, Х.Баттулгыг төлөөлж, Интерполоор эрэн сурвалжлагдаж байсан Ч.Ганбат мэйл бичиж байжээ. Ч.Ганбатын хувьд Х.Баттулгыг Зам, тээвэр, барилга хот байгуулалтын сайдаар ажиллаж байхад зөвлөхөөр нь ажиллаж байсан. Төмөр замын төслийн мөнгийг хууль хяналтынхан шалгаж эхлэх үед Монголоос оргон зайлсан намтартай нэгэн.

Цахим шуудангийн агуулгыг харвал Монголын улс төрийн амьдралын талаар мэдээлэл өгсөн, бизнесийн харилцаа холбоо тогтооход зуучлах хүсэлт тавьсан, Монголын тал нутгаар аялах хүсэлтэй америкчуудад зөвлөсөн зэрэг агуулга багтжээ.

Эпштэйний файлууд дэлхийн улс төр, эдийн засаг гээд маш өргөн салбарын манлайллыг ямар хуурамч байсныг ил гаргалаа гэж дэлхий нийт дүгнэж байна.

Х.Баттулга Ерөнхийлөгчийн сонгуулийн үеийн мэдээллээ хуваалцжээ!

Ноцтой нь 2017 онд болсон Ерөнхийлөгчийн сонгуулийн үйл ажиллагааны талаарх мэдээллийг Эпштэйн рүү тасралтгүй мэйлдэж байсан нь олон нийтийг хирдхийлгэж байна. Х.Баттулгыг имэйлдээ талууд “Манай залуу” гэж тодорхойлсон байна. Мөн өрсөлдөгч С.Ганбаатар өөр улс орноос мөнгөн хандив авсан тул найдваргүй болсон гэх мэтээр сонгуулийн үеэрх бүх мэдээллийг цаг алдалгүй хүргэж байжээ. 

 

Дээрх мэйлийг (2017 оны 6 сарын 26-ны өдрийн 13 цагийн орчимд) Чулуунхүүгийн Ганбат гэх мэйлээс илгээсэн бөгөөд агуулга нь "Санал хураалт Монголын цагаар 22 цагт дуусна. 17 цагийн байдлаар 45,6% нь санал хураалтад оролцсон байна. Өмнөх сонгуулийн ирцтэй харьцуулахад 2% доогуур үзүүлэлт юм. Бямба гарагт Баттулга МАН-ын өрсөлдөгчтэй мэтгэлцээнд маш сайн оролцсон. Хэрэв сонгууль шударга болвол Баттулга олон нийтийн дэмжлэгийг хамгийн их авах хүн" гэжээ.

Цаашилбал “МАН-ынхан саналыг худалдаж авах бүх төрлийн аргыг хэрэглэж байна. Элбэгдорж болон түүний эргэн тойрныхон эх орноосоо урвасан гэж хэлэгдэж, олон нийтэд хамгийн муу нэртэй байна. Хэвлэл мэдээллийн хэрэгслүүдийн 90% нь Х.Баттулгын талаар эерэг мэдээлж байна. Сонгуулийн кампанит ажлууд бүхэлдээ сошиал медиа болон Youtube сувгуудаар явагдаж байна” гэхчлэн бичжээ.

Тус өдрийнхөө 16.39 цагт дахин мэйл илгээхдээ:

 

2017 оны 7 сарын 6-нд: Мэйл илгээгч Ч.Ганбат

 

Х.Баттулга ялалт байгууллаа. Албан ёсны дүн мэдээ хэдхэн цагийн дараа гарна. Таны дэмжлэгт (support) баярлалаа гэжээ. Үүний хариуд Эпштэйн “Гайхалтай, Таны өмнөөс болон танай улс орны өмнөөс баяртай байна” гэсний хариуд Ч.Ганбат “Маш их баярлалаа, жинхэнэ ажил одоо л эхэлнэ. Таны ярьж байсан Монголд зориулсан оффшор бүсийн санаан дээр хэрхэн ажил хэрэг болгохыг мэдэгдээрэй” гэжээ. Хариуд нь Эпштэйн “Виржинийн арлуудад байдаг оффшор бүстэй адилхан формат Монголд хэрэгтэй” гэсэн байна.

 

Хариуд нь Эпштэйн “Монголын цахим мөнгө. Энэ бол дэлхий дахины анхаарлыг маш ихээр татах болно. Чингис коин гэж нэрлэж ч болох юм” гэсэн байна.

2017 оны 7 сарын 13-нд Ч.Ганбат дахин мэйл илгээжээ.

Эргэн сануулахад, 2017 оны долдугаар сарын 10-ны өдөр Х.Баттулга Ерөнхийлөгчийн тангаргаа өргөсөн. Тус мэйлд Монголын Засгийн газарт сэргээгдэх эрчим хүчний чиглэлд нэгэн эмэгтэйд ажлын байр бий болгох талаар бичжээ.

2017 оны 7 сарын 28-ны мэйлд Х.Баттулга өөрийн тамгын газрын ажилтнуудаа томилж байгаа талаар дурьдсан байна.

Мөн Монголын Засгийн газрын гадаад бодлогын тайланг бүхэлд нь бичиж өгч байжээ. Тухайн үеийн УИХ-ын гишүүн асан Л.Эрдэнэчимэг, Х.Баттулга нар Тавантолгойн талаар баримталж байсан бодлого энэхүү тайланд тусгагдсан тухай ч байгаа юм.

Эх сурвалж: Epstein Files, https://www.justice.gov

Энэ бүхнээс үзвэл Монгол гэдэг тусгаар улс боловч нэдэр дээрээ тусгаар байж чаддаг уу. Монголын улс төрийг хойд, урд хоёр хөршөөс удирддаг гэх аман яриа, битүү хардалт үнэн юм биш үү. Хоёр хөршөөсөө давж гараад гуравдагч гүрэн, хаа холын Америкт зураг зурагддаг байсан байж болох уу. Бидний үндэсний аюулгүй байдал, үндэсний дархлаа хаахна явна вэ гэж асуухад хүргэж байна.