Унгар Улсын ОТП банк Монгол Улсад үйл ажиллагаагаа явуулах хүсэлтэй байгаагаа илэрхийлжээ

Дотоодын банкны эрх ямба, зээлийн хүү тэнгэрт тулж иргэд туйлдсан энэ үед УИХ-ын дарга Н.Учрал “гадны банк оруулж ирнэ” гэж мэдэгдсэн нь олны анхааралыг татаад байна. Өөрөөр хэлбэл, гадаадын банк орж ирснээр банк санхүүгийн салбарт чөлөөт өрсөлдөөн бий болж, үйлчилгээний чанар, санхүүгийн сахилга бат, ил тод байдал сайжирна гэж үзэж буй.

Монголын банкны салбарт цөөн тоглогчид төвлөрсөн, зээлийн хүү, эх үүсвэрийн өртөг өндөр хэвээр байгаа нь гадаадын банкыг дэмжих гол үндэслэл. Мөн түүнчлэн өмнөх Монгол банкны ерөнхийлөгчид бүгд банк санхүүгийн салбарынхан байсан учраас энэ монопол байдал улам даамжирсан нигууртай.  Тиймдээ ч өнөөдөр Монгол банкинд өөр салбарын удирдагчыг томилж салхи оруулж буй. Монголбанкны Ерөнхийлөгч Н.Наранцогт гадаадын банк оруулж ирэх асуудлыг дэмжиж байгаа илэрхийлж буй. Тэрбээр “Гадны банк оруулж ирэхийг би дэмждэг хүн. Одоогийн нөхцөлд манайд гадаадын банк орж ирэх бүрэн боломжтой. Үүнийг дагаад олон сайн зүйлс орж ирнэ” хэмээн байр сууриа илэрхийлж байв.

 Гадаадын банк орж ирснээр санхүүгийн салбарын өрсөлдөөн нэмэгдэх, үйлчилгээний чанар сайжрах, зээлийн хүү буурах боломж бүрдэнэ гэж эдийн засагчид үзэж байгааг дахин тодотгоё.  Хэрэв банкны тухай хуулийг шинэчилсэн тохиолдолд Унгар Улсын ОТП банк Монгол Улсад үйл ажиллагаагаа явуулах хүсэлтэй байгаагаа илэрхийлжээ.

Гэхдээ гадаадын банк оруулж ирэхийг зөвхөн УИХ шийднэ.