“Монгол Улс сэргээгдэх эрчим хүчний шилжилтийн өмнө ирээд байна”
- Сэргээгдэх эрчим хүчний эх үүсвэрийг нэмэгдүүлэх, эрчим хүчний алдагдлыг бууруулах, ногоон технологийг дэмжсэн УИХ-ын тогтоол хэрэгжиж эхэлжээ
- “Чөлөөлье” санаачилгаар өрхийн хэрэглээнээс илүү гарсан цахилгаанаа төвийн шугамд нийлүүлэх зөвшөөрлийг иргэд, хувийн хэвшилд дарамтгүй олгоно
- 20 кВт хүртэлх хүчин чадалтай нарны панель, батарейн системийг түгээх сүлжээнд холбох, хэрэглээнээс илүү гарсан цахилгаан эрчим хүчээсээ орлого олох боломж бүхий УИХ-ын тогтоол хэрэгжиж эхэллээ
- Ногоон дэд бүтэц, эдийн засгийн хөгжүүлэх замаар эрчим хүчний хамаарлаас ЧӨЛӨӨЛНӨ
- Сэргээгдэх эрчим хүчний тархмал эх үүсвэрийн төслийг эхний ээлжинд 6 аймагт хэрэгжүүлнэ
- Эрчим хүчний хэмнэлттэй сууц, стандартад нийцүүлэн сууцаа дулаалсан айл өрхөд нарны панель, батарей, халаагуур хосолсон системийг үе шаттай нэвтрүүлэхийг УИХ-аас Засгийн газарт даалгажээ
- Нарны эрчим хүч, байгальд ээлтэй технологийг эрчим хүчний салбарт нэвтрүүлэхэд "Чөлөөлье" санаачлага дэмжлэг үзүүлнэ
- Монгол Улс эрчим хүчний шилжилтэд тулж ирээд байна
- Сэргээгдэх эрчим хүчний тархмал эх үүсвэрийг дэмжсэн парламентын шийдвэр нь урт хугацааны хөгжлийн хөшүүрэг болно
Эрчим хүчний бие даасан байдлыг нэмэгдүүлэх, ногоон эрчим хүчний асуудлаар санал, дүгнэлт гаргах, холбогдох хууль тогтоомжийн төсөл боловсруулах ажлын хэсгийг УИХ-аас байгуулан ажиллаж эхэлсэн. Өнөөдөр Төрийн ордонд “Эрчим хүчний болон газрын тосны бүтээгдэхүүний хараат байдлыг бууруулах, эрчим хүчний шилжилтийн хүрээнд олон талт түншлэлийг бэхжүүлэх нь” өндөр түвшний хэлэлцүүлгийг явуулж байна.
Монгол Улсын эрчим хүчний шилжилтийн чухал мөчид хүрч ирсэн. Сэргээгдэх эрчим хүчний тармал эх үүсвэрийг өрхийн болон орон нутгийн хэмжээнд нэмэгдүүлэх тогтоолыг баталж, парламент өөрөө манлайлал үзүүлсэн нь улс орны урт хугацааны хөгжилд чухал хувь нэмэртэй хэмээн НҮБ-ын төлөөлөл дүгнэв. УИХ-ын дарга Н.Учралын дэвшүүлсэн “Чөлөөлье” санаачилгын хүрээнд ногоон дэд бүтэц, эдийн засгийг хөгжүүлэх замаар эрчим хүчний хамаарлаас иргэдээ чөлөөлөх багц ажлууд багтсан. Тэрбээр, өнөөдрийн хэлэлцүүлгийн үеэр нар, салхины арвин нөөцдөө тулгуурлан өрх бүр эрчим хүч үйлдвэрлэгч болох зорилт дэвшүүлснээ тодотгоод иргэдийнхээ эрэлт хэрэгцээг мэдэрсэн байгальд ээлтэй, шинэ технологийг бодлогоор дэмжиж ажиллахаа илэрхийллээ. “
Чөлөөлье” санаачилгаараа айл, өрх нарны хавтан суурилуулахад 14-15 шат дамжлагаар, 6 сараас нэг жил хүртэл хүлээлгэдэг байсан хүнд суртлыг арилгажээ. Одоо өрхийн хэрэглээнд нарны хавтан, батарейн системийг суурилуулж, төвийн шугамд холбоход ажлын 11 өдрийн дотор шийдвэрлэнэ гэдгийг УИХ-ын дарга хэллээ. Түүнчлэн УИХ-ын тогтоолын хэрэгжилтийг хангах хүрээнд Эрчим хүчний яам нь “Сэргээгдэх эрчим хүч ба тархмал эх үүсвэрийг хөгжүүлэх төсөл”-ийн хүрээнд нийт 300 МВт хүртэлх салхины, 200 МВт хүртэлх нарны цахилгаан станцын төслүүдийг үе шаттайгаар хэрэгжүүлэхээр бэлтгэл ажлыг хангаж байгаа аж. Уг ажлыг эрчимжүүлэх хүрээнд сэргээгдэх эрчим хүчний тархмал эх үүсвэрийг нэвтрүүлэхээр төлөвлөлтөд багтсан аймаг, орон нутгийн төлөөлөлтэй хамтран ажиллах баримт бичгийг талууд зурж, хэлэлцүүлгийн үеэр баталгаажууллаа.
Аймгуудын удирдлагууд сэргээгдэх эрчим хүчний эх үүсвэрийн төсөл хэрэгжүүлэх газрын эзэмшихтэй холбоотой асуудлыг шуурхай шийдвэрлэх, орон нутгийн газрын алба, холбогдох суманд чиглэл өгөх болон байгаль орчны төлөв байдлын үнэлгээний ажилд дэмжлэг үзүүлэх зэргээр хамтарч ажиллах юм байна. Бид олон жил ярьж, хэлэлцэж ирснээ бодитоор хэрэгжүүлэх цаг нь болсон хэмээн УИХ-ын дарга Н.Учрал тэмдэглэсэн. Өнөөдрийн хэлэлцүүлгээр эрчим хүчний ногоон эх үүсвэрийг амьдралд нэвтрүүлсэн арга туршлагаасаа дүүргийн төлөөлөл хуваалцаж, тулгамдаж буй асуудал, ногоон санхүүжилтийн зах зээл, эрчим хүчний шилжилтэд хөрөнгө татах талаар хэлэлцэж байна.
