МАН-ын дарга Н.Учрал: Авлигын эсрэг чөлөөлөлтийг Ардын нам өөрөөсөө эхэлнэ!

МАН-ын 31 дүгээр Их хурлаас шинээр бүрдүүлсэн Бага хурлын II хуралдаан "Эрх чөлөөний дөрвөн зам, дөрвөн чөлөөлөлт" уриатайгаар /2026.02.27/ Тусгаар тогтнолын ордонд болж байна. Хурлын эхэнд МАН-ын дарга Н.Учрал илтгэл тавихдаа “Авлигын эсрэг чөлөөлөлтийг Ардын нам өөрөөсөө эхэлнэ” хэмээсэн нь коммунист угшилтай, зүүний үзэл баримтлалтай “ах” намын тухайд чих сортойлгосон өнцөг гэж болохоор.

Зуу гаруй жилийн түүхтэй тус нам сүүлийн жилүүдэд төрийн эрх барьж байгаагийнх авилга, албан тушаалын хэргүүд ч тус намд хаяглагддаг. Тэр бүхэнтэй үзэлцэж, чөлөөлнө гэдэг тийм ч санаан зоргоор хийх ажил биш. Гэвч Н.Учралын тухайд нас залуу, цус шингэн, зориг зүрхтэй манлайлал үзүүлэх нь гэсэн хүлээлт олон нийтийн дунд угаас байсаар ирсэн. Гэхдээ нам, улс төр гэдэг хувийн компани, хэсэгхэн хүмүүсийн бөөгнөрөл биш, том бүтэц, систем, тогтсон соёл байдаг. Тэрхүү системийн эсрэг мөс зүсэн соёлыг өөрчилж, авилгатай тэмцэх нь уриа лоозон төдий биш үйл хэрэг, үр дүн болох нь чухал. Өөрөөр хэлбэл өнөөдрийн МАН-ын дарга Н.Учрал маргаашийн лидер болох эсэх нь өнөөдөр хэлсэн үгээ хэр түвшинд биелүүлэхээс ихээхэн шалтгаална гэсэн үг юм.   

Ингээд түүний илтгэлээс онцлох ишлэлүүдийг сонирхуулъя.

• Эрх чөлөө бол ардчилсан нийгмийн амьсгалах агаар юм. Эрх чөлөө бол эмх замбараагүй байдал биш ээ. Эрх чөлөө бол шударга ёс, эв нэгдлийн гагнаас юм.
• Ийм энгийн бодит үнэнийг эрхэмлэн “Эрх чөлөөний дөрвөн зам, дөрвөн чөлөөлөлт”-өө илтгэлээ Та бүхэндээ толилуулж байна.
• Ардын нам ард түмнээсээ алсарч холдсон гэдэг үнэнээ бид хамтдаа хүлээн зөвшөөрсөн. Уран үг биш үнэн үг. Үнэнээ хүлээн зөвшөөрөх нь алдаагаа засах анхны алхам. Буруугаа мэдэх нь зөв замын эхлэл юм.
• “Иргэн баян бол улс баян” хэмээх үзэл санааныхаа төлөө амиа зориулсан Ардын намын анхны дарга Солийн Данзангийн үйл хэрэг, үлдээсэн өвийн үнэ цэнийг мартах учиргүй.
• 10 литр сүү 40 литр болж өсөж нэмэгдсэн нь үнэн боловч үр дүнг нь өрхдөө, иргэндээ хүргэж чадаагүй. Нэг хүнд оногдох ДНБ  2015 онд 3920 доллар байсан бол 2025 онд 7200 доллар болж өссөн ч өрх бүрд хүртээмжтэй хүрсэнгүй. Арван жилийн өмнө 6 их наяд байсан төсвийн орлого өнөөдөр 30 их наядыг давж 5 дахин өссөн ч олсноосоо илүү үрж зарж, олон боломжоо алджээ.
• Өнөөдөр албан ёсны статистикт инфляц 8.2% гэж гарсан ч итгэх хүн цөөхөн байна. Үнэ буулгах гэж татвар төлөгчдийн мөнгөөр татаас өгөөд байдаг, татуулж хэзээ ч дуусдаггүй татаасын орон боллоо.
• Гадаад дотоодын хөрөнгө оруулагчид хуурамч эх орончдод хөөгдөж адлагдах гэж ирэхгүй ээ. Хөрөнгө оруулагчид ашиг орлоготой ажиллаж байж, татвар төлбөрөө төлж, түүгээр нь зам, сургууль, цэцэрлэг барьж, ажлын байр нэмэгдүүлж, цалин тэтгэвэр тавьдаг.
• Багануур, Тавантолгой, Шивээ-Овоо, Шүрэн, Эгийн гол, Эрдэнбүрэн гээд барьсан биш бариагүй цахилгаан станцуудын нэр усыг бүгдээрээ мэдэж авлаа. Тэд гэрэл асаахгүй, дулаан өгөхгүйг ч мэдэрлээ.
• Архангай аймагт ааруул, цагаан идээгээ сайн борлуулж, 12 ам метр талбайгаа 45 ам метр болгож томруулъя гэхэд 8 нэрийн дэлгүүрийн хавтас дүүрэн бичиг цаас хөөцөлдөх хэрэгтэй болсон тухайгаа иргэн надад хэлсэн. Иргэнийхээ амжилтыг дэмжих биш дардаг ийм жишээ дүүрэн байна.
• Зөвшөөрлийн хуулийн шинэчлэлээр худалдаа, үйлчилгээ, үйлдвэрлэлийн 32 төрлийн үйл ажиллагаа эрхлэх бол гарын үсэг, тамга, бичиг хөөцөлдөх хэрэггүй. Хаана, юу хийх болсноо гар утаснаасаа мэдэгдээд шууд ажлаа эхэлнэ.
• ТҮЦ, дугуй засвараас эхлээд хүний хувийн өмч, айл өрхийн амьжиргааны эх үүсвэрийг хурааж нураадаг, элдэв гэнэтийн бэлэг барьдаг дүрэмгүй дүрэм, журамгүй журмуудаас иргэнээ чөлөөлнө. Өмчлөх эрх баталгаагүй бол өсөлт хөгжил, өнөөдрөөс илүү маргаашийн тухай бодох утга учиргүй.
• Хувийн өмч хөрөнгө, бизнест халдан түрэмгийлдэг, Үндсэн хуульд үл нийцэх төрийн дарангуйллаас хувийн хэвшил, иргэдээ чөлөөлнө. Аж ахуйн нэгжүүд жижиг нь томордог, том нь дэлхийд өрсөлддөг өртөө замыг нээж чөлөөлнө. Ард иргэд, аж ахуйн нэгжүүдийнхээ нурууг тэнийлгэж чөлөөлнө.
• Монгол хүний улс төрийн эрх чөлөөг эдийн засгийн эрх чөлөөгөөр дархалж чөлөөлнө. Хүнд суртлын чөдрийг тайлж чөлөөлнө. Хувийн өмч хөрөнгө, бизнест халдан түрэмгийлдэг, Үндсэн хуульд үл нийцэх төрийн дарангуйллаас хувийн хэвшил, иргэдээ чөлөөлнө. Аж ахуйн нэгжүүд жижиг нь томордог, том нь дэлхийд өрсөлддөг өртөө замыг нээн чөлөөлнө. Ард иргэд, аж ахуйн нэгжүүдийнхээ нурууг тэнийлгэж чөлөөлнө. Монгол хүний улс төрийн эрх чөлөөг эдийн засгийн эрх чөлөөгөөр дархалж чөлөөлнө. Хүнд суртлын чөдрийг тайлж чөлөөлнө.