Б.Болор-Эрдэнэ: Ардын намыг үүсгэн байгуулсан шашин соёл, бичиг номын сэхээтнүүдийн сүнсийг дуудах ажил хиймээр байна
Монголд улс төрийн нам үүсэн байгуулагдсаны 105 жилийн ой, “Эх орончдын өдөр” өчигдөр /2026.03.01/ тохиов. МАН энэхүү арга хэмжээг Тусгаар тогтнолын ордонд тэмдэглэн, намын шинэ гишүүдэд батлахыг нь гардуулжээ.
Монгол Ардын намд шинээр элссэн 39 гишүүн салбар бүртээ манлайлж яваа хүмүүс бөгөөд
- Булган аймгийн Хангал сумын 2-р багийн малчин Х.Эрдэнэбулган,
- Нийтлэлч Б.Болор-Эрдэнэ,
- МУБИС-ийн тусгай хэрэгцээт боловсролын 4-р курсэд сурч буй оюутан, SDS хүртээмж клубийн зохицуулагч Б.Энхсайхан,
- Монголын электрон спортын холбооны үүсгэн байгуулагч, “Шинжьюкү” ХХК-ийн захирал М.Майсайхан,
- “UAP LLC-Юу Эй Пропертиз” ХХК-ийн захирал А.Урангоо,
- Уул уурхайн үндэсний ассоциацийн гүйцэтгэх захирал Ц. Эрдэнэтуяа, хамгийн залуу нь 18 настай оюутан С.Сувд нарын гишүүд байна.
Нийтлэлч Б.Болор-Эрдэнэ МАН-д элссэн талаараа “би чинь монгол хэлээрх уншигчдын таазанд тулчаад удаж байна шүү дээ. Би учиргүй өндөр агуу болчихсон юм биш. Манай нийгмийн уншигчдын тааз нам байна, цөөхүүлээ бн. Хэдий цөөхүүлээ ч нэгээхэн биеэр хүндтэй, нэр цэвэр явахад хангалттай юу хангалттай. Өглөөдөө сэрэхэд нэг сайхан үгээр угтаж, оройдоо нэг сайхан үгээр үдэж унтуулаад яваад байдаг. Гэтэл энэ баянбүрд мэт цөөнх өнөөдөр улс Монголдоо хэр нөлөөтэй байна вэ? Ямар үүрэг гүйцэтгэж байна вэ? Бараг мань мэтийг цөөнх уншигчид дотроо дархлагдах тусам цаагуураа массын галзуурал солиорол хүчийг аваад бга юм бус уу? Ердөө уржигдар оруулсан дэлхийн эдийн засгийн нийтлэлийг хар, нөгөө галзуу солиотуудынхаа лаивыг хар. Адилхан яриач гэдэг. Гэтэл хүний тархинд уншлага гэдэг юмыг видео орлодоггүй юм аа. Нэг л болохгүй, нэг л буруу байна. Би, бид цөөнх дотроо магтуулаад бялуураад дуусдаг байж. Миний, бидний дараагийнх бас энэ таазанд тулаад эндээ дуусах уу? Ямар нэг улстөрийн гарц шийдэл хэрэгтэй. Нийтийн боловсролын бодлогод улстөрийн намаар дамжин оролцож өөртөө биш юм гэхэд ядаж л дараа үедээ уншигчид бэлдэх санаа зорилготой байна.
Хоёрт, улстөр сонирхогчийн хувьд:
Улстөр сонирхдог болоогүй бол магад би уншигчдын тааз өндөр Токиод ч юм уу бичиж амьдарч болох байсаан. Гэтэл би хүний газар хэчнээн сая уншигчтай боллоо гээд яах билээ? Хүний л газар, хүний л соёл. Би өөрөө үндэсний үзэлтэй ориг монгол ба үүнийгээ улстөрд оролцож илэрхийлэх хоббитой. Сүүл сүүлдээ улстөрөөс хол салбарт ажиллахаар уйддаг болж эвдэрсэн гэж хэлж ч болно. Улстөр гэж бидний хэлдэг салбарын криэтив, таамаглагдашгүй шинж, өөрчлөн хувьсгах хязгааргүй боломж нь сонирхол татдаг, бас зугаатай бдаг юм. Улстөрийн үзэл бодлын хувьд сүүл үе рүүгээ нэлээн бүгд найрамдах, уламжлалт, мөн Еврази талдаа үзэлтэй болж ирснийг зарим уншигчид мэдэж буй биз ээ. Нөгөө талаас Ардын намд Н.Учралтай хамт үзэл баримтлалын шинэ бүлэг гарцаагүй эхэлж байна. Эрх чөлөөг бодлогын үндсэн баримжаа болгоно гэдгээ ил тод, нэн тодорхой зарласаар байна. Ингээд Ардын нам, Болорэрдэнэ хоёр хоёр талаасаа ойртож уулзах цаг болжээ. Өнөө өглөө уулзаад, үг хэлээд, хэлэхдээ Ардын намыг үүсгэн байгуулсан шашин соёл, бичиг номын сэхээтнүүдийн сүнсийг дуудах ажил хиймээр байна гэдгээ илэрхийлээд батлахаа авчихлаа. За өөрөө бол хийсэн сонголтдоо бүрэн итгэлтэй, тодорхой санаа зорилготой байна.
Өнөөдөр эгнээндээ нэгтгэсэн Ардын намын удирдлагууд, гишүүдэд, мөн дэмжиж амжилт хүсэж буй хүмүүст их баярлалаа. Нөгөөтэйгүүр дургүйцэл, бухимдал, шүүмжлэлийг нэг тийм хаа нэгтээ зөрөлдсөн хайр, итгэл хэмээн ойлгож хүлээн авч бн. Та бүхний санасан хүлээсэн замаар замнаагүйдээ хүлцэл өчье” гэжээ.
