Парламентын хүчтэй дүр Н.Номтойбаяр Ерөнхийлөгчийн эсрэг “хөмсөг зангидав”
Ерөнхийлөгч У.Хүрэлсүхийн тал ялах уу, Д.Оюун-Эрдэнэ, Д.Амарбаясгалангийн тал ялах уу гэдэг тулаан гурван жил үргэлжилж эцэст нь 2025 оны МАН-ын Их хурлаар Ерөнхийлөгч бүгдийг нь “алгандаа багтаасан”. Ийнхүү Ерөнхийлөгч У.Хүрэлсүхийн ноёрхол хүчээ авч эхэлсэн байдаг. Тэр Засгийн газрыг, төрийн алба хаагчдыг толгой дараалан өөрийн “гар хөл”-өөр дүүргэсэн. Цагдаагийн дарга, АТГ-ын дарга, шүүх, ҮХЦ, прокурор гээд хуулийн “хонгил” иж бүрнээрээ түүний гарт орсон гэсэн үг. Одоо Ерөнхийлөгч рүү налсан хүн л “хоногийн хоолтой үлдэх” мэт энэ өдрүүдэд ард түмэн ч бараг дасаж эхлээд байна.
Ийм өдрүүдэд Монголын парламентын нэг содон төрх, улс төрд унаж босохын аль, алиныг үзсэн, хөрөнгөлөг айлын хүү, өв залгамжлагч, харизмтай улс төрч гэх мэт олон тодотголын эзэн Үндэсний Эвсэлийн тэргүүн Н.Номтойбаяр Ерөнхийлөгчийн эсрэг дуугарч эхлэв.
Өнгөрсөн долоо хоногт Ерөнхийлөгч У.Хүрэлсүх "УИХ-ын гишүүнийг эгүүлэн татах" хуулийн төслийг боловсруулж буй талаараа ЕТГ-аар дамжуулан мэдэгдсэн. Тэгвэл өнөөдөр УИХ-ын гишүүн, Үндэсний эвсэлийн тэргүүн Н.Номтойбаяр уг хуулийн төслийг эсэргүүцэж байгаагаа илэрхийлж байр сууриа илэрхийлэв.
Тэрбээр, ”Анхны Ерөнхийлөгчөөс хойшхи бүх Ерөнхийлөгч эрх мэдлийн шунал, мөн шударга бусаар хөлжсөн үйлдлүүдийнхээ төлөө хуулийн хариуцлага хүлээх айдаст автаж төрийн бүх эрх мэдлийг өөрийн эрхшээлдээ атгахыг эрмэлзэж ирсэн нь нууц биш. Сиймхий л гармагц парламентыг харлуулж, Ерөнхийлөгчийн институцийг парламентаас илүү эрх мэдэлтэй болгох "ХААН" чөтгөрийн атгаг санаархал улс төрийн түүхэнд удаа дараа илэрч ирснийг бид бүгд маш сайн мэднэ. “Ноёнтой тэрсэлдвэл толгойгүй”-н адилаар миний хувьд ч зарчимдаа үнэнч байж эрх мэдэлтэнтэй зөрчилдсөнийхөө хариуг биеэр амссан хүний нэг. Өнөөдөр ч миний туулсан тэрхүү зам мөрийн эхлэл дээр эрх мэдлийн тэмцлээсээ үүдэлтэй зөрчил, тэмцэлд орсон парламентын гишүүд зогсож байгааг хараад дуугүй өнгөрөх арга алга ” хэмээсэн юм.
Үргэлжлүүлэн, “Монгол Улсын Ерөнхийлөгчийн өргөн барихаар зэхэж буй УИХ-ын гишүүнийг ёс зүйн алдаагаар эгүүлэн татах агуулга бүхий хуулийн төсөл нь гал дээр тос нэмэхтэй адил үр дагавар дагуулж, улс төрийн зөрчил тэмцлийг улам өдөөж, эв нэгдэлд тулгуурласан ардчилсан парламентад төрийг сулруулах аюултай гэж үзэж байгаа тул дэмжихгүй. "Ёс зүйн алдаа" гэх тодорхой бус, харьцангуй ойлголтоор парламентын гишүүний үг, үзэл бодлоо хүссэн өнгө аясаараа, айдасгүйгээр, чөлөөтэй илэрхийлэх эрхийг хязгаарлаж, бүрэн эрхийг дуусгавар болгох бололцоо нээгдэх нь улс төрийн дарамт, нөлөөллийн шинэ хэрэгсэл болж хувирах бодит эрсдэлтэй юм.
"Нохой зассан эзэндээ янаг" гэх ардын үг бий. Харамсалтай нь зарим тохиолдолд Үндсэн хуулийн цэцийн гишүүд хууль дээдлэх зарчимд үнэнч байхаас илүүтэй өөрсдийг нь тохоон томилсон улс төрийн эздэдээ үнэнч зүтгэж байгаа мэт харагдах нөхцөл байдал үүсч байгааг өөрийн биеэр гэрчилсэн. Хэрэв энэ хууль өнөөдөр хүчин төгөлдөр үйлчилж байсан бол миний бие "нохой..." гэж ардын үг эш татаж хэлснийг Үндсэн хуулийн цэц "УИХ-ын гишүүн Н.Номтойбаяр Үндсэн хуулийн цэцийн гишүүдийг нохойтой адилтган гутаан доромжиллоо. Энэ бол "ёс зүйн алдаа" хэмээн гишүүний бүрэн эрхийг дуусгавар болгох шийдвэр гаргахыг үгүйсгэх аргагүй” гэжээ.
Ийнхүү УИХ-ын гишүүн Н.Номтойбаяр Ерөнхийлөгчийн эсрэг чанга дуугаар эсэргүүцлээ илэрхийлэв. Үүгээрээ Н.Номтойбаяр “Ерөнхийлөгчтэй үзэлцэхэд бэлэн” байгаагаа зарлалаа гэж харж болно.
Эцэст нь хэлэхэд Н.Номтойбаяр бол парламентын хүчтэй дүрүүдийн нэг. Өөрөөр хэлбэл түүний үзэл бодол, байр суурь олон нийтэд хүчтэй нөлөөлдөг гэж хэлж болохоор.
Энэхүү мэдэгдлийн араас Б.Амарбаясгалан, Л.Оюун-Эрдэнэ тэргүүтэй нөгөө талынхан гарч ирэх үү гэдэг хүлээлт ч өндөр байна.
М.Үүрийнтуяа
