Нийслэлийн МАН-ын хорооны даргын төлөөх зодоон рингэн дээрээ гарч ирлээ
Өнгөрсөн оны сүүлээс эхэлсэн нийслэлийн МАН-ын хорооны даргын зодоон ил цагаандаа гарч, рингэн дээрээ гарч ирлээ. Баруун жигүүрээс Нийслэлийн Засаг дарга бөгөөд Улаанбаатар хотын захирагч Х.Нямбаатар 2024 оны сонгуулийн дэвшүүлсэн мөрийн хөтөлбөр, сонгогчдод өгсөн амлалтаа биелүүлэхээр намын хорооны даргын суудлаа хамгаална. Зүүн жигүүрээс УИХ, Засгийн газрын гишүүн давхар дээлтэй, Барилга, хот байгуулалт, орон сууцжуулалтын сайд Э.Бат-Амгалан нар өрсөлдөнө.
Өнгөрсөн Лхагва гарагт /2026.03.13/ “Зэс эрдэнийн хувь” ХХК-ийн хувьцаа эзэмшигчид болох 150 хүн Барилга хот байгуулалт, орон сууцжуулалтын яамны гадна жагсаал хийж хоёр хоног нойтон өлсгөлөн зарласан. Өчигдөр тэдгээр жагсагчдыг цагдаагийн байгууллагаас албадан буулгасан юм. Тэдгээр жагсагчдыг хөөж тууж байгаа цагдаа нартай хамт Э.Бат-Амгалангийн ойрын хүн байсан нь дүрс бичлэгт үлдсэн байдаг.
Тэгвэл өнөөдөр Баянзүрх дүүргийн ИТХ-ын төлөөлөгчид Хотын дарга Х.Нямбаатарт шаардлага хүргүүлж Хангарьд ордны гадна жагсаж байна. Агуулга нь, БЗД-ийн ИТХ-аас "Баянзүрх дүүргийн татаасыг үндэслэлгүй хэт их нэмсэн нь 500 мянган иргэний эрхийг зөрчиж байна" хэмээх шаардлага хүргүүлж байгаа аж.
Өнгөн дээрээ иргэдийн эрх ашиг ярьж байгаа мэт боловч үнэндээ Нийслэлийн намын даргын төлөөх чулуу шидэлцэж байгаа зодоон гэдэг нь илт.
Тэдний хэн нь хэн бэ?
Э.Бат-Амгалан нь Баянзүрх дүүргээс нэр дэвшин 2 удаа парламентад сонгогдсон УИХ дахь Засаг дарга нарын фракцийн гишүүн. Нийслэлд 2 том дүүрэг байдгийн нэг нь Сонгинохайрхан, нөгөө нь Баянзүрх. Сонгино угаас Д.Сумъяабазар, Х.Нямбаатар хоёрынх. Тиймээс У.Хүрэлсүх Ерөнхийлөгчийн фракцийнхны хувьд ядахдаа Баянзүрхийг гартаа оруулж, талдаа татах нь чухал байсан. Энэ алхмаа Баянзүрхийн Э.Бат-Амгаланд Барилгын яамыг өгснөөр гүйцэлдүүлсэн. Тэгэхдээ эгзэг нь таарвал нийслэлийг ч өгч болно гэж тохирсон гэх яриа бий.
Харин Хотын дарга Х.Нямбаатарын тухайд тэрээр жижиг гарын улс төрч биш. Үнэндээ, Х.Нямбаатартай эн зэрэгцэх өрсөлдөгч үгүй гээд хэлчихэд буруудахгүй. Хотын 2024 оны сонгуулийн үр дүн, хот, нийтийн аж ахуйг сайжруулахаар хийж хэрэгжүүлж буй ажлуудыг нь дурдахад тэр хангалттай тэнцэнэ. Хотын хамгийн том дүүрэг Сонгинохайрхан дүүргийн албан хаагч, дүүргийн төлөөлөгч, ИТХ-ын дарга, УИХ-ын гишүүн, Хууль зүйн сайд зэрэг намтар нь баргийн улс төрийн замналд байхгүй нь үнэн. Энд “төлгөн коммунист” нэр зүүтлээ намдаа зүтгэснийг нь нуршаад хэрэггүй биз. Ямар сайндаа л энхрий хайрт намынхаа даалгавраар УИХ-ын гишүүн, Хууль зүйн сайдын албан тушаалаас татгалзаж, Улаанбаатар хотын захирагчаар ирсэн байдаг. Энэхүү улс төрийн замналдаа ямар нэг авлига, албан тушаалын хэрэгт холбогдож, хуулийн байгууллагын хаалга татаагүй нэгэн.
Эдний хэн нь дүүргүүдийг яаж хайрцаглахаас их зүйл шалтгаалах ч МАН-д нэг зүйл дүрэмтэй, дүрэмгүй мөрдөгддөг нь намын дарга хэнийг бодлогоор зүтгүүлнэ тэр сонгогддог билээ. Нийслэлийн намын дарга өөрчлөгдвөл Хотын даргыг ч ойрын хугацаанд өөрчилнө гэх мэдээлэл бий.
М.Үүрийнтуяа
