Г.Занданшатарын Засгийн газрын гал гарсан 2 яамыг удирдах сайд нарын ХОМ

Багш нарын цалингийн нүргээнд нэрвэгдэж, боловсролын салбараар шал арчсан  П.Наранбаярын халааг УИХ-ын гишүүн Л.Энх-Амгалан үргэлжлүүлэх нь тодорхой боллоо. Сэтгүүлч мэргэжилтэй Л.Энх-Амгалан сайд ОХУ, АНУ, БНСУ-д боловсрол эзэмшсэн.

УИХ-ын сонгуульд Хөвсгөл аймгаас гурвантаа сонгогдож, 2021-2024 онд Боловсролын сайдаар ажилласан. Сайдаар томилогдсон даруйдаа “Боловсролын салбарт шинэчлэл хийнэ” хэмээн мэдэгдэж байсан ч дорвитой реформ хийж чадаагүй. Гэхдээ П.Наранбаяр шиг дордуулаагүй гэдэг үнэлгээг салбарынхан нь өгөх болсон.

Ийн нахин сайд болж буй тэрээр багш нарын цалингийн нэмэгдлийн асуудалд бодитой шийдвэр гаргана гэдэг том хүлээлттэй товчдоо галтай салбарыг хүлээж авах нь.

Л.Энх-Амгалан сайдын ХОМ:

Нийт орлого: 443,586,000 төгрөг

Гэр бүлийн орлого: 158,729,000 төгрөг

Орон сууц, барилга байгууламж нийт дүн: 4,397,983,000 төгрөг

Тээврийн хэрэгсэл: 300,000,000 төгрөгийн үнэ бүхий жийп болон туулах чадвар өндөр Lexus 570-1

Үнэт эдлэл, урлаг, түүхийн үнэт зүйл нийт дүн: 1,654,000,000 төгрөг

Дотоодын банк, санхүүгийн байгууллагад байрлах хадгаламж, данс, мөнгөн хөрөнгийн нийт дүн: 15,194,000 төгрөг

Авлага нийт дүн: 4,510,373,000 төгрөг

Зээл: 244,000,000 төгрөг

Б.Найдалаа найдлагад хүрэх үү?

Эрчим хүчний сайдын сэнтийд чамлахааргүй олон жил заларсан Б.Чойжилсүрэнгийн даагаагүй давааг Б.Найдалаа давах уу хэмээн олон хүн эргэлзэж байна. Учир нь тэрээр энэ салбараас хол хүн. Салбар нь гал байтгуай түймэртэй угтаж буй. Эдийн засагч мэргэжилтэй хүний толгой, зангараг хүрэх эсэхийг ирэх өдрүүд харуулна.

СЭЗДС-д бизнесийн удирдлагын бакалавр, Япон улсын Кобе их сургуулийг Хөгжлийн эдийн засагч мэргэжлээр Эдийн засгийн ухааны магистр хамгаалсан түүний ХОМ-ийг сонирхвол:

Нийт орлого: 84 сая төгрөг

Үл хөдлөх хөрөнгө: 620 сая төгрөг

Тээврийн хэрэгсэл: 90 сая төгрөг

Үнэт эдлэл: 180 сая төгрөг

Хадгаламж: 52 сая төгрөг

Авлага: байхгүй

Зээл: 249 сая төгрөг гэжээ.