Монголын холимог тулаанчид 300 сая вон буюу 720 сая төгрөгийн шагналтай тэмцээнд оролцоно
БНСУ-ыг дайлаар мордох аялал үргэлжилсээр. Саяхан Рhysical Аsia болж бид Монголчуудыгаа харж огшиж, уйлж дуулж үзэв. Тэгвэл энэ удаа Black combat гэх олон улсын холимог тулааны тэмцээнээр Монголчуудын аялал үргэлжлэх нь ээ. Энэхүү тэмцээн нь холимог тулааны улс хоорондын багийн тэмцээн бөгөөд 57-100 кг- ийн 7 жинд 7 тамирчин хэн нь “Champ” вэ гэдгээ үзэх гал гарсан тулаан болох нь.
БНСУ-ын Black combat компаниас СЕО Godfather Монголд ирж Black cup-д оролцох тулаанчдыг сонгон шалгаруулсан бөгөөд Монголын багт:
- 57кг-Г.Баяндүүрэн,
- 61кг-Ш.Бат-Итгэлт,
- 66кг-П.Содномдорж,
- 70кг-Э.Гантөмөр,
- 77кг- Blackcombat-ийн тулаанч Б.Бүрэнзориг,
- 84кг- Г.Гантулга ,
- 100кг- Э.Үнэнхүү нарын 7 залуу Монгол Улсаа төлөөлөн дэлхийн анхны холимог тулааны улс хоорондын багийн тэмцээнд орохоор мордоно.
Дашрамд дуулгахад 100кг-ийн жинд өрсөлдөгч нар олон байсан боловч Э.Үнэнхүүг оролцож буйг мэдсэнээр бүх тулаанч нэрээ татаж өрсөлдөгчгүй шалгарсан гэнэ.
Бүсийн төлөөх Монголын багийн эхний тулаан 2026.04.11-ний өдөр болох ба "Voo"-гээр шууд цацагдах юм.
Black Cup тэмцээнд Монголоос тулаанчид оролцоход гүн туслалцаа үзүүлсэн Black combat компанийн тулаанч, Монгол Улсын иргэн Н.Нандин-Эрдэнэд талархал илэрхийлье.
