Б.Золтуяа: Туулын хурдны замд аль хэдийн 500 тэрбум төгрөгийн урьдчилгаа өгч, ТЭЗҮ гэх мэт зардлуудад хэдэн 10 тэрбум төгрөг зарцуулагдсан
Улаанбаатар хотын авто замын түгжрэлийг бууруулах ажлын хүрээнд Налайхын дөрвөн эгнээ авто зам буюу Баянзүрхийн гүүрээс эхэлж Сонгинохайрхан дүүргийн нутаг дэвсгэрт баруун аймгууд руу салдаг аюулгүйн тойрог хүртэл нийт 32 км үргэлжлэх 6 эгнээ бүхий Туулын хурдны замыг барих бүтээн байгуулалтын төслийг хэрэгжүүлж буй.
Улмаар уг төслийн хүрээнд Туул голын эрэг дагуу бургаснуудыг хядаж эхэлсэн төдийгүй зөвхөн 1 км замын өртөгт 70 тэрбум төгрөг зарцуулагдаж байгаа асуудал олны шүүмжлэлд өртөж “Туулаа хамгаалъя” гэх иргэдийн хөдөлгөөн хүртэл байгуулагдаад байна.
Мөн түүнчлэн энэ төсөлд аль хэдийн 500 тэрбум төгрөг зарцуулагдсан аж.
Энэ талаар НИТХ-ын төлөөлөгч Б.Золтуяа хэлэхдээ, “Туул хурдны зам, тойрог зам, ҮУИТ-ын асуудал тэдгээрийг тойрсон газар, усны асуудал, бүтээн байгуулалт дээр гайхмаар асуудлууд маш их, ямар ч төлөвийн менежмент байхгүй. Одоо цагтаа оршиж бүтээмж нэмдэггүй. Ниргэсэн хойно нь хашхирч элдэвлэн дайрдаг маш хүнд зам бий болжээ.
Туул хурдны амд аль хэдийнээ 500 тэрбум төгрөгийн урьдчилгаа өгч, ТЭЗҮ бас бус зардлуудад хэдэн 10 тэрбум төгрөг зарцуулагдсан. Энэ гаргасан мөнгөө тамгын газар хамгаалж замаа явуулах гэх нь зүй ёсны хэрэг. Харин тендерийг олны ярьж байгаачлан шаардлага хангаагүй компанид олгосон бол эртхэн шалгадаг газар нь шалгаад буруу зөвийг тогтоон, гаргасан татвар төлөгчдийн мөнгийг хамгаалах ажил хийх. Үнэн зөв явсан бол тэрийг нь зарлаад байгаль орчны нөлөөллийн үнэлгээ дүгнэлтийг нь хийлгээд, холбогдох газрууд нь ирээдүйд учирч болох эрсдэлийг бууруулах тал дээр анхаарч дуу нэгтэй засаж залруулан ажиллах ёстой гэж харж, дуу хоолойгоо ч хүргэж байгаа. Туулаас гадна энэ хурдны зам, тойрог замын трассд ҮЦХ-н 58 га газар ч байгаа.
Энэ хэдэн өдөр хүний өөрийн гэхгүй биднийг янз бүрээр хэлж байна. Ингэж уулгалан дайрч орж ирэх хүн сүрэг, бүр учир мэдэх зарим хүний, өөрийн гэхгүй улсуудаас ч айгаад байх юм алга. Юу ч мэдэхгүй байж нийлсэн айсан, тендер авсан тэгээд дуугай байна гэх хөөрхий амьтдыг ч буруутах юм алга. Тэдний мэдэх өнцөг нь л тэр байх. Энэ хорвоо дээр тэдгээрийн мэдэх авлигын хэл, хараалаас илүү ахуйгаасаа ангижирсан зөв замаар урагшлах, худалд гүйцэгдэн цуцаж яваа, асуудалд прагматик ханддаг залуус олон байдгийг хэлэх нь бас зөв гэж би бодож байна. Тухайн үед шийдвэр гараад энийг явуулж болохгүй талаар Т.Батцогт дарга бид хоёр бүхий л чадлаар энд тэндгүй ярьж явсан. Өнөөдрийн уулга алдан дайраад байгаа зарим олон дагагчтай сэтгүүлч, инфлүнсер гээд байгаа нөхөд нэг үг ч ган хийгээгүй.
Тэр үеийн бидний бичлэг, хурлын үеэр хэлж ярьж байсан үгс, дэмжлэг хүссэн үг бүрийн шүлс нь ч хатаагүй байна. Тухайн үед усаа хайрладаг цөөн хэдэн залуус "Ногоон тууз" хөдөлгөөн өрнүүлээд зарим нэг ухаалаг өмгөөлөгч залуус хуулийн дагуу шүүхэд НИТХ-аас гарсан тогтоолыг хүчингүй болгохоор хандсан байдаг. Өөрсдийгөө өндөр боловсролтой мундаг сайхнаа магтан дуу алдан хашхиралдах хэр нь хэрэгтэй цагт буруу шийдвэрийг эсэргүүцэн зогсож чаддаггүй байдлыг үнэхээр гайхаад барахгүй юм. Үнэн амьдрахад суралцахгүй бол алхам тутамдаа та нарыг худал, хулгай ийнхүү дагах болно. Тухайн үед хүчин мөхсөдөж байсан НИТХ дах АН-ын бүлэгт яг өнөөдрийнх шиг дэмжлэг үзүүлсэн бол бид ядаж урьдчилгаагаа хамгаалаад үлдэх байсан” гэжээ.
