Michel&Amazonka бол эгч дүү гурвын бизнес: Хэн нь хэн бэ?
Энэ зуны трэнд сэдвийн нэг болж буй Michel&Amazonka брэнд, тус брэндийн ард хэн байдаг, хэдэн онд хэрхэн байгуулагдсан талаар танилцуулъя.
MJ буюж Ч.Мөнхжаргал
2015 онд үүсгэн байгуулагдсан тус компанийг Ч.Мөнхжаргал /MJ/ удирддаг. Тэрээр эгч дүү дизайнеруудын төрсөн эгч бөгөөд 2014 онд Австралийн Засгийн газрын тэтгэлгээр тус улсад төслийн менежерээр суралцаж төгссөн. Сургуулиа дүүргэж ирээд хоёр дүүгийнхээ авьяас чадварыг компанийн засаглал, төсөл, брэндийн түвшинд хөгжүүлж бойжуулах зорилгоор хамтран ажиллах болсон. Эхэндээ хагас жил хангалттай гэж бодож байсан боловч тэрээр өнөөг хүртэл тус брэндийг менежмент, удирдлагаар хангаж буй.
Зургийн эх сурвалж: urug.mn
Дизайнерууд авьяастай байх нэг хэрэг, түүнийгээ зах зээлд таниулж, сайн төсөл, ашигтай бизнес болгох өөр асуудал. Michel&Amazonka брэнд өнөөгийн түвшиндээ хүрэхэд хатагтай Ч.Мөнхжаргалын оруулсан хувь нэмэр асар их гэдэг. Тус брэндийн ирээдүйн зорилго бол олон улс, дэлхийн зах зээлд гарах.
Michel буюу Ч.Янжиндулам
1986 онд Улаанбаатар хотод төрсөн. Цоо шинэ тоног төхөөрөмж бүтээдэг аав, үйлд уран ээжийнхээ нөлөөгөөр бага наснаасаа хувцас урлан бүтээхэд сонирхолтой хүүхэд байсан ба Хүүхдийн ордны Үнсгэлжин наадмаас гараагаа эхэлж байжээ.
Amazonka буюу Ч.Нямханд
1988 онд Улаанбаатар хотод төрсөн. Арван жилийн 18 дунд сургууль, Урлах эрдэм дээд сургуулийг хувцасны дизайнер мэргэжлээр тус тус дүүргэсэн. Хувцас урлахаас гадна дуулах авъяастай бөгөөд 2006-2011 оны хооронд Star fish хамтлагийн дуучин байсан. Дунд сургуулиа төгсөөд Хүмүүнлэгийн Ухааны Их Сургуульд суралцаж байх хугацаандаа загвар зохион бүтээх ажилд илүү дуртайгаа ойлгож сургуулиасаа гарч, Урлах эрдмийн дээд сургуульд элсэн орсон.
Зургийн тайлбар: Зүүн гараас: Мишел - Ч.Янжиндулам (эгч), Амазонка - Ч.Нямханд (дүү)
Эгч Чойгаалаагийн Янжиндулам (Michel), дүү Чойгаалаагийн Нямханд (Amazonka) нар тус компанийн дизайнерууд. Эхэндээ тус тусдаа уран бүтээл хийдэг байсан эгч дүүс 2013 онд хамтран ажиллах болсон. Улмаар 2015 онд том эгчтэйгээ хамтран хувцас загварын ертөнцөд идэвхтэй үзч үзэж эхэлжээ.
Албан ёсны хуудастаа “Michel&Amazonka компаниа албан ёсоор 2014 оны 12 сард бүргүүлж 2015 оны 2 сараас эхлэн анхны 2 оёдолчноо ажилд авч эгч Ч.Мөнхжаргалыг захиралаар томилож үйл ажиллагаагаа эхэлсэн” гэжээ.
Тус брэндийн онцлог нь уламжлалт хэв маягийг агуулсан европ загварын хувцаснуудыг Haute couture болон Prèt-a-Porter төрлөөр Монголдоо зохион бүтээж үйлдвэрлэдэг. Голчлон эмэгтэйчүүдэд зориулсан гоёлын даашинз, ёслолын хувцас, хуримын даашинз, чөлөөт хувцсыг захиалгаар урладаг.
