Хууль зөрчин баригдсан гэх "Акуа гарден" хорооллыг цахилгаанд холбожээ

Нийслэлийн Дунд голын хамгаалалтын бүсэд баригдсанаас үүдэн олон нийтийн дунд "Авлига хороолол" хэмээн нэрлэгдсэн "Акуа Гарден" (Aqua Garden) орон сууцны цогцолбор өчигдөр буюу сарын 29-ний өдөр цахилгаан эрчим хүчинд холбогджээ. Улаанбаатар цахилгаан түгээх сүлжээ компаниас уг хороололд төрөөс ямар нэгэн эрчим хүчний эх үүсвэр олгоогүй бөгөөд хувийн аж ахуйн нэгжийн дэд станцаас цахилгаанаа авсан хэмээн мэдэгдлээ. 

Улаанбаатар цахилгаан түгээх сүлжээ компаниас гаргасан албан ёсны тодруулгад дурдсанаар, тус цогцолборт төрийн зүгээс ямар нэгэн цахилгаан эрчим хүчний эх үүсвэр нийлүүлээгүй байна. "Акуа Гарден" хороолол нь хувийн аж ахуйн нэгж буюу хувийн цахилгаан түгээх станцаас эрчим хүчний холболтоо шийджээ. Одоогоор тус хувийн дэд станцыг эзэмшигч болон холболт хийсэн аж ахуйн нэгжийн бүртгэлийн нарийн мэдээлэл төрийн эрчим хүчний байгууллагад байхгүй байгаа аж. Өмнө нь барилгын ажлын эхний шатанд төрөөс түр хугацаанд цахилгаанаар хангаж байсан ч хүндрэлтэй асуудлууд үүссэний улмаас төрийн эх үүсвэрээс өгөх цахилгааныг бүр мөсөн тасалж, зогсоосон аж. 

Уг барилгатай холбоотой шүүхийн маргаан удаан хугацаанд үргэлжилсэн бөгөөд 2026 оны долдугаар сард Захиргааны хэргийн давж заалдах шатны шүүхээс шийдвэрээ гаргасан байдаг. Шүүхийн шийдвэрээр хэдийнэ баригдсан "Акуа Гарден" хорооллын блокуудын газрын зөвшөөрлийг цуцлах тухай нэхэмжлэлийг хэрэгсэхгүй болгож, одоо байгаа барилгуудыг хэвээр үлдээхээр шийдвэрлэсэн юм. Харин Дунд голын үерийн идэвхтэй хамгаалалтын бүстэй давхцаж байсан дараагийн ээлжийн төлөвлөгдсөн барилгуудын газрын зөвшөөрлийг шүүхээс бүр мөсөн цуцалсан байна. Тус төслийн газрыг "Эм энд Жи констракшн" эзэмшдэг бөгөөд ерөнхий гүйцэтгэгчээр "БҮТИ" хязгаарлагдмал хариуцлагатай компани ажиллаж байгаа билээ.