Хүргэн Г.Дэнзэнгийн шинэ томилгооны цаадах дажин

Эдийн засаг, хөгжлийн яамны харьяа Үндэсний хөгжлийн хүрээлэнгийн захирлаар хүргэн Г.Дэнзэн томилогдоод удаагүй байгаа. Хэдийгээр өндөр боловсролтой, мэдлэг чадвартай хэдий ч хадам ах Н.Алтанхуягийн галыг үүрч, нийгэмд таагүй өнцгөөр танигдсан, тиймдээ ч хүргэн Г.Дэнзэн хэмээн цоллогддог хархүүг АН-ын дарга Лу.Гантөмөр ажилд авсан нь АН-ынхны дунд хөөрхөн хэрүүлийн сэдэв болоод байна. Г.Дэнзэнгийн тухайд УИХ-ын гишүүн Н.Алтанхуягийг Ерөнхий сайдаар ажиллаж байхад ЗГХЭГ-ын дэд дарга, Эрдэнэс Тавантолгой компанийн ТУЗ-ийн дарга зэрэг өндөр албанд томилогдон ажиллаж байсан.

Улмаар Эрдэнэс Тавантолгойн ТУЗ-ийн даргаар ажиллаж байхдаа эрх мэдэл, албан тушаалын байдлаа урвуулан ашигласан хэрэгт буруутгагдаж анхан шатны шүүхээс түүнд 3,6 жилийн хорих ял оноосон. Гэвч Дээд шүүхээс хэргийг хянаж үзээд нотолбол зохих асуудлыг бүрэн шалгаж тогтоогоогүй, хохирлын хэмжээг нарийвчлан гаргаагүй хэмээн үзэж хэргийг анхан шатны шүүхэд буцаасан. Эцэст нь прокуророос хэргийн хөөн хэлэлцэх хугацаа дууссан гэж үзэн уг хэргийг хаасан.

Харин хүргэн Г.Дэнзэн би гэмт хэрэг хийгээгүй, нэр төрөө сэргээнэ гэж шүүхэд хандсанаар түүнийг цагаатгаж байсан түүхтэй. Ийм сонирхолтой хүнд албан тушаал хуваарилсан нь Лу дарга намын даргынхаа суудлыг авч үлдэхээр экс Ерөнхий сайд Н.Алтанхуягийн фракцид хадаг барьсан гэж бусад өрсөлдөгч фракциуд нь үзэж байгаа юм байх. АН-ын тухайд анх засагт орохдоо л фракц бүрт сайдын суудал өгсөн. Энэ нь эцэстээ АН-ын даргын суудлын төлөөх тэмцэл рүү хөтөлсөн нь ч нууц биш. Үүгээр зогсохгүй УИХ дахь АН-ын бүлэг засагт орсон хэдээ огт хайхрахгүй “гөвшиж” байгаа нь Бүлгийн дарга О.Цогтгэрэл намын даргын суудал зүүдлээд удаж буйтай холбоотой гэж үзэгсэд ч байна. Дайны хөлөөр дажин гэгчээр засаг ганхаад эхэлсэн энэ үед АН-ынхны фракц хооронд ч энэ мэт томилгоо, халаа сэлгээ түүнийг дагасан хэл ам, хэрүүл тэмцэл үргэлжлэх нь тодорхой. Улс төр тогоогоо халааж байна.