"Унтаа" Д.Оюунхорол УИХ-даа нэр дэвшинэ
Ч.Сайханбилэгийн Засгийн үед мандан бадарч явсан сайд асан Д.Оюунхорол парламентаа санасан бололтой, УИХ-д нэр дэвшихээр болжээ. Оны өмнө Хөшигийн хөндийн бүтээн байгуулалтын асуудал хариуцсан даргын албан тушаалаа өөрийн хүсэлтээр хүлээлгэн өгсөн.
Д.Оюунхоролын тухайд, 2000 онд УИХ-ын сонгуульд МАХН-аас нэр дэвшин анх удаа сонгогдсон. 2004 оны сонгуульд ялагдсаныхаа дараа дөрвөн жил Отгонтэнгэр их сургуулиа удирдаж байгаад 2008 оноос хойш гурав дараалан УИХ-д сонгогдож, 2020 оныг хүртэл УИХ-ын гишүүнээр ажиллажээ.
2020 оны сонгуульд нэр дэвшээгүй тэрбээр Ерөнхий сайд У.Хүрэлсүхийн зөвлөхөөр ажиллаж байгаад, 2021 оны наймдугаар сарын 18-нд Хөшигийн хөндийн бүтээн байгуулалт асуудал хариуцсан захиргааны дарга, Засгийн газрын бүрэн эрхт төлөөлөгчөөр томилогдсон. Ийнхүү дөрвөн жил парламентаасаа завсарлага авсан тэрээр сонгуульд өрсөлдөхөөр зэхжээ. Түүний өрсөлдөх тойрог одоогоор тодорхойгүй байна.
2022 онд АТГ-т өгсөн түүний хөрөнгө орлогын мэдүүлгийг харвал, тэрбээр 70 сая 700 мянган төгрөгийн жилийн орлоготой. Гэр бүлийн гишүүдийн нийт орлого нь 31 сая 663 мянган төгрөг.
752 сая 660 мянгаар үнэлэгдэх нэг орон сууц, нэг зуслангийн байшинтай. 250 сая төгрөгөөр үнэлэгдэх Lexus 570 автомашинтай ажээ. 70 сая төгрөгийн үнэ бүхий үнэт эдлэл, 41 орчим сая төгрөгийн хадгаламжтай байна.
