3 жил санхүүгийн алдагдалтай ажилласан Төрийн өмчит компанийг татан буулгана
Төрийн болон орон нутгийн өмчит компанийн бүтээмжийг нэмэгдүүлэх, засаглалыг сайжруулах тухай хуулийн төслийг УИХ-д өргөн мэдүүлэхээр шийдвэрлэлээ. Хууль хэрэгжсэнээр Төрийн өмчит компани 122 байсныг 70 болгож нэгтгэнэ. Төрийн өмчит компани, үйлдвэрийн газрын ойлгомжгүй статус цэгцэрнэ.
Төр 5 чиглэлээс бусад тохиолдолд төрийн өмчит компани байгуулахгүй. Хувийн хэвшлийн дангаар гүйцэтгэх ажилд оролцохгүй. Уул уурхайн төрийн өмчит компаниуд “Эрдэнэс Монгол” нэгтгэлд багтана. Уул уурхайн бус төрийн өмчит компаниуд Нийтийн үйлчилгээний албын статустайгаар “Эрчэс Монгол” нэгтгэлд багтана. Эрдэнэс Монгол” нэгтгэлийн харьяаны Төрийн өмчийн компани нь төсөвт орлого бүрдүүлэх, үндэсний баялгийн санг арвижуулах үүрэг хүлээнэ.
“Эрчэс Монгол” нэгтгэлийн харьяаны Нийтийн үйлчилгээний байгууллагууд нь давхардсан чиг үүрэггүйгээр хувийн хэвшлийн оролцоог хангуулж өндөр бүтээмжтэй, үр ашигтай ажиллана. Ашигтай ажилласан төрийн өмчит компанийн захирал алдагдалтай ажилласан компанийн захиралтай ижил цалинтай бус үр ашиг, бүтээмжээ үнэлүүлдэг зөв тогтолцоог бүрдүүлнэ.
Төрийн өмчит компанийн гүйцэтгэх удирдлагыг сонгон шалгаруулахдаа сүүлийн 2 жил улс төрийн намын удирдах албанд ажиллаагүй байх хатуу шаардлагатай. Төрийн өмчит компанийн гүйцэтгэх удирдлагатай жил бүр үр дүнгийн гэрээ байгуулна. Үр дүнд хүрээгүй тохиолдолд хариуцлага тооцно. Төрийн өмчит компанийн ТУЗ-ийн гишүүдийг сонгон шалгаруулахдаа нээлттэй, ил тод, салбарын мэргэжлийн холбоодын оролцоог хангуулна.
3 жил санхүүгийн алдагдалтай ажилласан Төрийн өмчит компанийг татан буулгана. Төрийн өмчит компани, нийтийн үйлчилгээний байгууллагад ажиллаж буй албан хаагчдын ажилласан жилийг төрд ажилласан жилээр тооцох зэрэг бүтээмжийг нэмэгдүүлж, засаглалыг сайжруулах чиглэлд олон чухал заалтууд туссан. Үр дүнд төрийн өмчит компаниуд улс төрийн нөлөөнөөс ангид, чиг үүргийн давхардалгүй, өндөр бүтээмжтэй ажилладаг зөв жишиг тогтоно. Зардал нь захирлын урамшуулал болдог гаж тогтолцоо үндсээрээ үгүй болох зэрэг өөрчлөлт гарна гэдгийг ЗГХЭГ-ын дарга Н.Учрал тодотгож байна.
