Who is who?: 126:1 Лувсаннямын Гантөмөр
Карьер буюу арван жил зүүдэлсэн сэнтий. УИХ-ын гишүүн, Тэргүүн шадар сайд, Эдийн засаг, хөгжлийн сайд, Ардчилсан намын дарга Лувсаннямын Гантөмөр. Албан тушаалын цол, гуншингаараа тэрбээр Халх дөрөв, шавь тавдаа ганцаар торойно. УИХ, Засгийн газарт түүн шиг гурав, дөрвөн давхар дээлтэй хүн одоогоор үгүй. Өмнөх УИХ-д 11 суудалтай байсан намаа 42 гишүүнтэй болгосных нь шагнал.
Улс төрийн карьерынхаа 20 жилийн ой дээр тэр ийм амжилтад хүрсэн юм. Энэ 20 жилийн эхний хагас нь амжилт, ялалт дүүрэн, өөдрөг бадрангуй, омголон, шазруун улстөрчийн замнал. Гэтэл сүүлийн арваад жил нь Ардчилсан намын даргын сэнтий л мөрөөдсөн он жилүүд, эрч хүч нь буурч, ир нь мөлийсөн өдрүүд түүнийг тодорхойлно.
2017 онд Ардчилсан намын даргын сунгаанд “Сумтай, ташууртай тав”-ын нэг болж өрсөлдөөд хамраараа газар хатгасан. Ингээд зургаан жил таг чиг болов. Талцан хуваагдаж, тамга, тэмдгээ хүртэл хувилж, хэвлэж авчихаад үзэлцэж байсан Ардчилсан намынхны хувьд дундын хувилбар болж чадсанаараа Лу мөрөөдлөө биелүүлэх нь тэр. Аядуу зөөлөн, эвлэрэнгүй, бөөрөнхий, эрх мэдэл, албан тушаалын төлөө яахаас ч буцахгүй Лу.Гантөмөр МАН-ынханд ч машид таалагдсан байх.
Замнал буюу “Гэр хорооллын Ганаа”. Л.Гантөмөрийг Ц.Элбэгдоржийн хүн гэдэг. Тийм сэжим, холбоо бий. Сүүлийн үед Х.Баттулгатай ч холбох болсон. Тэгж мэдэх хүн. Хэнтэй ч гар барьж мэдэх эвлэрэнгүй, харизмгүй улстөрч. Түүх намтрыг нь сөхвөөс Японд сургууль төгсөж ирээд хувийн бизнесээ амжилттай эхлүүлсэн залуу Ардчилсан намд элсэж, Да.Ганболдын дэмжлэгтэйгээр намынхаа залуучуудын байгууллагын тэргүүн болсон нь 1999 он. Дараа жил нь хэнд ч танигдаагүй шазруун залуу УИХ-ын сонгуульд нэр дэвшээд унажээ. Дөрвөн жилийн дараа даагаа нэхэж, Сүхбаатар дүүрэгт дахин нэр дэвшин, “Гэр хорооллын Ганаа” гэдэг сурталчилгаа хийн ялалт байгуулсныг санах нэг нь санаж буй байх.
2007 онд ард түмний мөнгийг хэмнэе гэдэг уриалга гарган, гишүүд, сайд, дарга нарыг үнэтэй жийпнээсээ татгалзахыг шаардан, УИХ-ын гишүүдийн тойрогтоо зарцуулахаар төсөвт суулгуулдаг мөнгийг эсэргүүцсэн улс төрийн акц санаачилсан нь олон нийтэд түүнийг таниулж, нэмэх оноо цуглуулж байв. Хөөрхөн популист нөхөр байсан байгаа биз. Лу.Гантөмөр УИХ-д гурвантаа сонгогдож, Эдийн засгийн байнгын хорооны дарга, Боловсрол, соёл, шинжлэх ухааны сайдаар ажилласан. Боловсролын салбарын шинэчлэлийг зоригтой эхлүүлсэн, “Авьяас”, “Ном”, “Хүүхэд бүрийг хөгжүүлдэг багш” зэрэг хөтөлбөрийг санаачилсан. Сайд байхдаа нэмэлт тушаал гарган охиндоо Боловсролын зээлийн сангаас зээл олгуулан, хувийн дансаар авсан нь нэрэнд нь толбо суулгасан.
2014 онд Н.Алтанхуягийг огцорсны дараа түүнийг Ерөнхий сайдад нэр дэвшүүлэх тухай яриа гарч байсан удаатай. Намдаа ийм нөлөөтэй, олон нийтэд нэр хүндтэй болоод байсан хүн 2016 оны сонгуульд өвдөг шороодмогцоо “Астрарүүт” гэж компани байгуулан, хунчирын бизнес рүү шунган орсон байдаг. Мөн “Глобал” гэж хувийн сургуулийн зөвлөхөөр ажилласан дуулддаг. Уг сургуулийг нь “Дүнжингарав”-ын дэлбэрэлтэд өртсөн гэдгээр л хүмүүс мэднэ.
Ирээдүй ба ичингүйрэл. Л.Гантөмөр ирээдүй нь хамгийн бүрхэг байгаа улстөрч. Дээл нь давхар, суудал нь өндөр байх тусмаа тэр хүчтэй унана. Хамтарсан Засгийн газар нь усны хөөс шиг хэврэгхэн. Тэр хөөстэй хамт мань эрийн улс төрийн карьер замхарна. Эрх баригч МАН-ын халуун хөнжилд намаа чирж оруулсан нь айлын эхнэрт засал хийж өгөөд өвөрт нь давхиад орчихсон ламбугай шиг ичгүүртэй хэрэг. Шуудайд хийсэн үхрийн эвэр шиг эв түнжингүй олон фракцтай ч эрх чөлөөний мэдрэмж, үнэт зүйл дээрээ нэгдэж чаддаг Ардчилсан намынхан нэг л өдөр тэсрэх болов уу. Тэр болтол Лу.Гантөмөр айдастай. Харин сүх далайтал үхэр амгалан билээ.
Г.Ууганбаатар
