Ерөнхийлөгч асан Ц.Элбэгдорж: Х.Баттулгад хулгайчийн нөөц л байдгаас хүний нөөц байдаггүй!

Амин найзаас мөнхийн дайснууд болсон Ц.Элбэгдорж, Х.Баттулга нар хэн хэн нь Монгол Улсын Ерөнхийлөгчийн сэнтийд заларч байсан улс төрчид. Хоёулаа Ардчилсан намынх. Эдний зөрчил, тэмцэл хэзээ, хэрхэн эхэлснийг хэлэхэд бэрх ч экс Ерөнхийлөгч Ц.Элбэгдорж Х.Баттулгын талаар “барьер”-гүй ярьдаг нь үнэн. Тухайлбал, тэрээр 2019 онд Ц.Элбэгдорж ийн ярьж байсан нь архивт үлджээ.  

-Х.Баттулга Тавантолгойн төмөр зам гэж шороо овоолж хаяад овоолсон шорооноосоо мөнгө хулгайлсан хүн. Монгол хохирсон. Тавантолгой зогссоноос хэн хожсон юм? Х.Баттулга л хожсон. Эрдэнэтийн 49 хувь гэдэг ч юм уу, хөөгөөд үзэхээр Ц.Элбэгдорж ямар ч холбогдолгүй байдаг. Ингээд Х.Баттулга байж яддаг.

-Та тэгвэл шалгуулчихгүй яасан юм?

-Би шалгуулья гэдэг. Өрөөндөө дуудаж оруулж ирээд л ярьж байсан шүү дээ. Би зүгээр нүүрэн дээр нь хэлдэг байхгүй юу, энэ хулгайд. Одоо наадуулын чинь ганц айдаг юм нь Ц.Элбэгдорж гарч ирж ярих вий, Ц.Элбэгдорж гарч ирээд илчлэх вий!

-Би эд нарын занг, юу хийж байгааг нь зүгээр үнэрээр нь мэднэ. Ерээд оны үед Х.Баттулга спирт оруулж ирээд талх шиг зардаг байсан. Одоо Баттулга Монголд хамгийн ашигтай байгаа алтны наймааны хойноос явж байгаа. Энэ алтны ордуудыг контролдохын /хянахын/ тулд, гартаа оруулахын тулд Баттулга явж байгаа. Би тэгж бодож байна Би тэгж үнэрлэж байна. Би тэгж харж байна. Би тэгж хардаж байна.

-Одоо та нар харж байгаа байх, Эрдэнэтийн 49 хувь гээд л яриад байна. Аягүй бол нэг өдөр Баттулга Эрдэнэтийн 49 хувийн эзэн болчихсон сууж байж магадгүй шүү.

-Өнөөдөр Баттулга Forbes сэтгүүлийн мэдээлснээр Монголын 3 дахь баян хүн юм гэсэн. Гэтэл яг Баттулгын төлсөн татвар хэд юм? Эсрэгээрээ татвар төлж Монголын төсвийг бүрдүүлээд явж байгаа 30 томоохон аж ахуйн нэгж лүү дайрч байгаа хүн шүү дээ.

-Гадныхан руугаа дайраад хөөгөөд гаргачихсан. Гадны хөрөнгө оруулалт орж ирэхээ больсон. Одоо дотоодыгоо наадуул чинь нийлж дээрэмдэх гэж байгаа.

-Баттулгад нэг зовлон байдаг юм. Баттулгад хүний нөөц байхгүй, Баттулгад хулгайчийн нөөц л байдаг. Тэр цэц, мэцийн гишүүнээр хэнийг сонгож байгааг нь харсан биз дээ. Ийм ч хүн байх гэж гээд шуугиад л байсан. Томилгоо хийх гэхээр хүний нөөц байдаггүй байхгүй юу даа. Зүгээр л хулгай хийдэг улсууд байдаг.

-Хулгайч дээр хулгайч л ирнэ. Хэнийг томилох юм? Хувь хүнийхээ хувьд бид хоёр найзууд. Найз бол хувь хүний асуудал. Би Баттулгыг бүр амин найз ч гэж нэрлэж явсан. Одоо гэтэл Баттулга муу юм хийвэл Монголынхоо аминд хүрч магадгүй тийм албан тушаал дээр сууж байгаа хүн байхгүй юу. Монголын аминд хүрэх гэж байвал би Баттулгыг сонгох уу? Аль эсвэл Монголоо сонгох уу? Би Монголыг сонгоно.