Т.Бадамжунайгийн 11 тэрбум төгрөгөөр үнэлэгдэх 100 га газрыг АТГ-аас хураан авчээ

Төрийн өндөр албан тушаал хашиж байсан Т.Бадамжунай шалгагдаж байх хугацаандаа хил даван зугтсан тул "Шувуу" ажиллагааны хүрээнд түүнийг өнгөрсөн жил Филиппин улсаас авчирсан

Тэгвэл өнгөрсөн нэг жилийн хугацаанд АТГ шалгалтын ажиллагааг үргэлжлүүлж, хэргийг шүүх рүү шилжүүлсэн ч хэд хэдэн удаа буцсанаар өнгөрсөн есдүгээр сард дахин шүүх рүү шилжүүлсэн байна. Энэ хугацаанд АТГ-аас мөрдөн шалгах ажиллагаа явуулж, Т.Бадамжунайг УИХ-ын гишүүн байхдаа Сонгинохайрхан дүүрэг дэх Баянголын амны зүүн энгэрт өөрийн хүргэн Ж-дээ олгуулсан 100 га газрыг хууль бусаар олгуулсан нь тогтоогдсон байна. Тиймээс дээрх 100 га газрыг төрд эргүүлэн хураан авчээ.

Мөн газрын зарим хэсгийг гадаадын компанид 2 тэрбум төгрөгөөр худалдаж, уг мөнгөөрөө банк бус санхүүгийн байгууллага байгуулсан нь мөнгө угаах гэмт хэргийн шинж агуулсан байж болзошгүй байгаа аж. Уг газар нь одоогийн ханшаар 11 тэрбум төгрөгөөр үнэлэгдэж байгаа бөгөөд 72 га газрын 50.5 га нь төрийн мэдэлд шилжүүлэх шүүхийн шийдвэр гарсан байна.