УИХ-ын Тамгын Газрын Дэд дарга Э.Лхагва: Бүх малаа нийгэмчлээд бүх ядуу иргэддээ эн тэнцүү хувааж өгье!

УИХ-ын Тамгын Газрын Дэд дарга Э.Лхагва гэж нэлээн люмпен пролетари нөхөр төрөн гарч буй бололтой юм. Тэрээр Улс тунхагласны баяраар бүх айл өрх Битүү шөл хийж уух зарлиг шахуу юм гаргасан.

Бүр тодруулбал Боловсролын яам руу албан бичиг илгээхдээ дунд сургуулийн хүүхдүүд битүү шөл хийхийг гэрийн даалгаварт өгөхийг үүрэгдсэн нь олны гайхашийг барсан. Тэгвэл энэ удаад тэрээр бүх малаа нийгэмчилж, ядуу иргэддээ тэгш, тэнцүү хувааж өгөх агуу их санааг бодож олсноо, үүнийг дарга, сайд нарын пиарчид шүүрэн авч хэрэгжүүлэхийг бахтайяа санал болгосон байх юм.

Уг нь бид 1990 оны цагаан морин жилийн хувьсгалаар социалист тогтолцооноос ардчилсан тогтолцоонд шилжин орсон. Гэтэл Э.Лхагва дарга мэтийн гадаадад сургууль төгссөн гэх гялгар намтартай 80, 90-ээд оны залуус энэ мэт коммунист өнгө аястай уриа лоозон, хууль журам санаачлах, санал болгох зэргээр байр сууриа илэрхийлэх болов.

Энэ яавч сайн дохио биш гэж бодном. Түүний жиргээг бүрэн эхээр нь сийрүүлье. Монгол улсын хэмжээнд тоологдсон 67 сая малаа ядуу 900 мянган иргэндээ тараавал нэг хүнд 7,4 толгой мал ноогдоно. Бүх малаа нийгэмчлээд бүх ядуу иргэддээ эн тэнцүү хувааж өгөх хуулийн төсөл санаачлаад ядуурлыг тэглэх их сэргэлт хийвэл ямар вэ? Энэ их хурал чадна даа.

Махны үнэ буурна. Ингэж ядуурлаас гараагүй хүмүүст халамж өгөхгүй гэж хатуу журамлаад, 7 малаа юм болгох гэж орон нутаг руу хөдөлгөөн ихэснэ. Эх орон нь нэг удаа юмаа мэдэхэд яахав дээ, улсын газар дээр бэлчиж, ус ууж байгаа биз дээ. Татвар төлөхгүй, татаас авч хэдэн жил явлаа. Домогт 100 жил болж байхад том сэтгэ л дээ. Нам засгийн дарга, зөвлөхүүд энэ санааг ПиАртаа ашиглаасай. Иргэд долоо, долоон малаа бариад нэгдэл, хоршоолол байгуулна. Энэ бол нордик улсууд ч хийгээгүй гайхамшигтай шинэ Социал демократ санаачлага болно шүү.

Дэмжээд өгөөрэй.