“Blackpink” хамтлагийн дуучин Ким Жэннигийн төрсөн өдөр өнөөдөр тохиож байна.
Тэрбээр 1996 оны нэгдүгээр сарын 16-нд төрсөн бөгөөд өнөөдөр 28 нас хүрч байна.
Жэнни Сөүл хотын Ганнам дүүрэгт төрж, өссөн бөгөөд айлын ганц охин юм. Бага насаа Шинэ Зеландад өнгөрүүлж, англи хэл сурсан. 2010 онд Өмнөд Солонгост эргэн ирж, “YG Entertainment”-д дадлагажигчаар ажиллаж эхэлсэн бөгөөд нийт 5 жил 11 сарын турш бэлтгэгдсэн.
2016 оны наймдугаар сард Жэнни “Blackpink” хамтлагийн гишүүнээр дебютээ хийсэн нь өнөөгийн дэлхийн хамгийн том К-поп охидын хамтлаг болж чадсан юм. 2018 оны арваннэгдүгээр сард тэрээр ‘Solo’ дуугаараа олонд танигдаж, хөгжмийн ертөнцийг байлдан дагуулсан байдаг.
Жэнни нь хамтлагийнхаа нүүр царай, гол реппер, бүжигчний үүргийг гүйцэтгэдэг тэрээр төгөлдөр хуур болон лимбэ хөгжмийг маш сайн тоглодог. Мөн агаарын иог хийж, биеийн галбираа хадгалдаг.
Сүүлийн үед Жэнни жүжиглэх хүсэлдээ хөтлөгдөн Америкийн “The Idol” олон ангит кинонд тоглож, уран бүтээлчийнхээ хүрээг өргөжүүлж байна.
Түүний өмссөн брэндүүд тэр дороо маш хурдан зарагдаж дуусдаг бөгөөд Өмнөд Солонгост Жэнни шиг царайны хэлбэртэй болох хүсэлтэй эмэгтэйчүүд гоо сайхны эмнэлэгт ихээр ирэх болсон байна.
Жэннигийн төрсөн өдрийг тохиолдуулан шүтэн бишрэгчид нь олон нийтийн сүлжээнд баяр хүргэж, түүний уран бүтээл, амжилтыг тэмдэглэж байна.
