Туулын хурдны замыг 2 жилийн хугацаанд барина

Улаанбаатар хотын авто замын түгжрэлийг бууруулах ажлын хүрээнд Туулын хурдны замын олон улсын нээлттэй тендерийг зарлалаа. Энэ нь Баянзүрхийн гүүрээс Сонгинохайрхан дүүргийн нутаг дэвсгэр дэх баруун аймгууд руу салдаг аюулгүйн тойрог хүртэл нийт 32 км үргэлжлэх бөгөөд зургаан эгнээ бүхий хот доторх анхны хурдны зам болох юм.

Уг замын бүтээн байгуулалтын ажлыг ирэх дөрөвдүгээр сард эхлүүлж, 2027 оны тавдугаар сард дуусгах аж. Өөрөөр хэлбэл, хоёр жил буюу 24 сарын хугацаанд ашиглалтад өгөхөөр төлөвлөсөн байна.Энэ талаар хотын дарга Х.Нямбаатар ярихдаа, “2024 оны байдлаар нийслэлийнхэн бид түгжрэлд цаг хугацаа, шатахуун зэрэгт нийт 900 сая орчим ам.доллар зарцуулжээ.

Энэ байдлаар явбал 2030 онд нэг тэрбум ам.доллар давахаар байна. Өнөөгийн байдлаар оргил цагийн дундаж хурд 7-13 км/цаг байгаа бол 2030 онд 5-9 км/цагт хүрэх юм. Тиймээс энэ оноос эхлэн нийслэл хоёрдугаар түвшний замуудаа барина. Үүний нэг болох хот доторх анхны хурдны замын тендерийг өнөөдөр зарлалаа. Хурдны зам ашиглалтад орсноор замын хөдөлгөөний дундаж хурд 13.5 хувиар нэмэгдэхээс гадна Дархан-Уул болон Замын-Үүд чиглэлийн дамжин өнгөрөх авто тээврийн нэвтрүүлэх чадвар сайжирна.

Мөн Улаанбаатар хотын гол болон туслах гудамж замын сүлжээний түгжрэл 10-20 хувиар буурах тооцоолол гарсан. Тус замыг барихад трасст 36 нэгж талбар өртөж байгаа учраас “Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах” тухай хуулийн дагуу газар чөлөөлөлтийг зохион байгуулж, нөхөн олговор болон газар дүйцүүлж олгоно. Туулын хурдны замтай дараа, дараагийн хоёрдугаар түвшний замууд огтлолцох юм. Тус хурдны замыг барихдаа ямар ч зам, гүүр хаахгүй” гэв.