2002 хүүхэд цалин хөлс авсан эсэх нь тодорхойгүй, энэ нь хөдөлмөрийн мөлжлөг байж болзошгүй

ХЭҮК-оос Засгийн газрын хуралдаанаас гаргасан шийдвэртэй холбоотойгоор мэдээлэл хийлээ.

Мэдээллийн үеэр сэтгүүлчдийн асуултад ХЭҮК-ын гишүүн Ж.Хунан хариулт өглөө. -Хурдан морины уралдаанд оролцож байгаад амь насаа алдсан тохиолдол хэр байна вэ?

-Сүүлийн үед морины уралдаан бооцоотой болж байна.Уяачид өөрийн хүүхдийг морь унуулахаас илүү хөлсөөр хүүхэд ажиллуулах явдал нийтлэг байна. 2024 онд хурдан морь унаач 11 мянга гаруй хүүхэд бүртгэгдсэн байдаг. Үүнээс 1000 гаруй нь буюу 10 хувь уяачдын хүүхэд өөрсдөө морио унасан бол бусад нь гэрээгээр, эсвэл хүүхдийн аав ээжтэй нь тохиролцсон байдаг. Түүнчлэн 2002 хүүхэд цалин хөлс авсан эсэх нь тодорхойгүй. Тиймээс энэ нь хөдөлмөрийн мөлжлөг байж болзошгүй.

Цалин хөлс авсан хүүхдүүдийн цалингийн хэмжээг харвал 400-1.5 сая төгрөгийн хооронд байсан. Өнөөдөр хөдөлмөрийн хөлсний доод хэмжээ ямар байгаа билээ.

Цалин хөлс авахгүйгээс гадна хүүхдүүд хүнд ажил хийдэг байж болзошгүй талаар судалгаанд оролцсон хүүхдүүд хэлсэн байдаг. Өглөө эрт босох, ахуй ажилд нь туслах ус зөөх, уяач нар загинаж зандрах гэх мэт. Энэ нь хүүхдийн сэтгэлзүйд хүнд тусдаг. Тиймээс уяач хүүхдүүдийн бүртгэлийг хөтлөх шаардлагатай байна.

Тухайн хүүхэд бүтэн, хагас өнчих эсэх, аль эсвэл үрчлэгдсэн үү. Эрсдэлт бүлэгт хамаардаг юм уу гэх зэрэг мэдээлэлд тулгуурлаж дүн шинжилгээ хийх боломжтой болно. 2018 оноос хойш мориноос унасан хүүхдийн тоо 2436. Гэмтэж бэртсэн нь 1035 гэх тоо баримтыг холбогдох байгууллагуудаас ирүүлсэн.

-Хүүхэд унаж бэртсэн тохиолдолд хэн хариуцлага хүлээх ёстой вэ?

-Одоо уралдаанч хүүхэд бүр ослын даатгал хийлгэж байгаа. Ослын даатгал нь бүтэл жилийн хугацаатай хүчин төгөлдөр байх ёстой. Даатгалын хураамж 100 мянга төгрөг. Нөхөн төлбөрийн хэмжээ нь 20 сая төгрөг байгаа. Баяр наадмын тухай хууль 2003 батлагдсан. -Хурдан морь унаж байгаа хүүхдүүдийн 10 хувь нь өөрийнхөө морь унадаг. Бусад нь хүний морь унадаг гэж байна.

Хүний морь унаж байгаа хүүхдүүдээс асрамж төвд амьдардаг хүүхэд байдаг уу?

-ХЭҮК-оос энэ асуудлыг хөндсөн байгаа. Өөрөөр хэлбэл гэр бүл хүүхэд хамгааллын газарт зөвлөмж хүргүүлсэн. Энэ бүртгэлийг дэлгэрэнгүй хөтлөх хэрэгтэй. Мөн Засгийн засаг дарга болон Нийслэлийн засагт даргат зөвлөмж явуулсан. Энэ зөвлөмжийн хүрээнд унаач хүүхэд бүтэн өнчин, хагас өнчин юм уу, үрчлэгдсэн юм уу гэдэг мэдээлэл тусгагдана. Энэ хүүхдийн эрх ашгийг хамгаалах зорилгоор хийгдэж байгаа ажил. Өөрийн морь унадаг хүүхдүүд олон байгаа. Хүүхдийн эрх ашгийг нэгдүгээрт тавих ёстой.