УИХ-ын намрын чуулган өнөөдөр хааж, "хэн илүү сайхан амлалт өгөх вэ" гэх уралдаан эхэллээ
Сонгуулийн жилийг ч хэлэх үү, тэтгэвэр нэмнэ, ногдол ашиг тараана, хөдөлмөрийн хөлсний доод хэмжээ нэмэгдсэн гээд иргэдийн гар тэнийлгэх гэж хэрэндээ л хичээж байна. Өчигдөр сонгуулийн өмнө байнга сөхөгддөг ногдол ашгийн талаар УИХ хэлэлцэв. Хэмжээ нь их байна, бага байна, яаралтай тараах ёстой, ирэх жил өгнө гэх мэтээр гишүүд талцаж байр сууриа илэрхийлсээр таарав.
Үүний хажуугаар өчигдөр нийт 17 асуудлыг хэлэлцэж баталсан. Чуулганаа хааж, бушуу тойрогтоо очиж "очков" авах санаатай яаран байгаа нь илт. Цагаан сарын сургаар ч ахмадуудад тал засж, сонгууль идэвхтэй өгдөг хэдийгээ "маллаж" тойглох гээд сүйд болж буй. Ингээд албан ёсоор "хэн илүү сайхан амлалт өгөх вэ", "хэн илүү иргэдийн ул "долоож" чадах вэ" гэх уралдаан эхэллээ.
Сонгуульд саналаа өгөх өдөр ирэх зургаадугаар сарын 26-ны өдөр. үүнээс сарын өмнө нэр дэвшигчдийн нэрс батлан, тодрох ёстой. Улстөрчид эртнээс бэлдэж эхэлсэн ч одоогоор нарийн ширийн асуудал тодорхой бус хэвээр.
