Л.Оюун-Эрдэнийн эцсийн хүчээ шавхах амаргүй цаг!
Дөрөв дэх жилдээ Засгийг тэргүүлж буй Л.Оюун-Эрдэнийг татаж унагах ажиллагаа 2024 оны сүүлээс эхлэн эрчээ авсан байдаг. Өнгөрөгч 1-р сарын 11-нд төв талбайд болсон жагсаал эхний өдрөө л эрчтэй байснаас бусдаар тэгэсгээд намжсан. Харин энэ удаагийнх нэлээн эвгүй тал руугаа явчихлаа.
Явчихлаа гэдэг нь Ерөнхий сайдыг огцруулах ажиллагаа албан ёсны болж байна. УИХ-ын гишүүн Ч.Лодойсамбуу Ерөнхий сайдыг огцруулах албан бичгийг боловсруулж эхэлсэн. Ингэхдээ Үндсэн хуулийн 43-р зүйл заалтыг баримталжээ. Үндсэн хуулийн 43.1.1 дэх хэсэгт Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал УИХ гурав хоногийн дараа хэлэлцэж эхлэн 10 хоногийн дотор шийдвэрлэнэ. УИХ-ын нийт гишүүний олонхи нь уг саналыг дэмжсэн бол Ерөнхий сайдыг огцруулах тухай УИХ-ын тогтоол баталсанд тооцож, шинэ Ерөнхий сайдыг 30 хоногийн дотор томилно. гэсэн бол 43.1.2 дахь хэсэгт Ерөнхий сайд огцорвол Засгийн газар бүрэлдэхүүнээрээ огцорно. гэж заасан байдаг. Өөрөөр хэлбэл УИХ-ын гишүүд Ерөнхий сайдыг огцруулах албан бичигт гарын үсэг зурж эхэлснээр Үндсэн хуульд заасан 32 гишүүн бүрдвэл УИХ Ерөнхий сайдыг огцруулах асуудлыг 72 цагийн дотор хэлэлцэхээс өөр гарцгүй болно.
Одоо нөгөө “чоно, нохойн цаг” гэдэг шиг Үндсэн хуулийн өөрчлөлтөөр бүрэлдсэн 126 гишүүний “хэн нь хэн бэ” гэдэг ус тосоороо ялгарна. Түүнчлэн Ерөнхий сайд өнгөрсөн 4 жилийн хугацаанд МАН-ын дарга гэдэг үүднээсээ намын гишүүдээ багцалж чадсан уу , үгүй юу гээд түүний нам доторх нөлөөлөл хэр хүчтэй нь мэдрэгдэхээс гадна, МАН-ын “ах” нарын хүсэл шунал ч тодрох юм.
Харин Л.Оюун-Эрдэнийн Засагт хамтарсан АН, ХҮН намуудын байр суурь хамгийн сонирхолтой байгаа юм. Чухамдаа энэ үеэр л АН-ынхан Лу-гаа авч хаях гэж “хор” найруулан гүйлдэх биз. Тэгвэл ХҮН намын тухайд “арай” гэж олдсон 2 сайдын суудлаа хамгаалах тактик барих болов уу
Тэгвэл УИХ-д суудалтай ИЗНН, Үндэсний эвсэл хаашаа эргэх бол гэдэг асуулт бас гарч ирнэ. Үндэснйи эвсэлийн тэргүүн Н.Номтойбаярын тухайд Л.Оюун-Эрдэнэтэй хамт улс төрд хөл тавьж, намын залуучуудын байгууллагаас болж хоорондоо нэг хэсэг “үзэлцсэн” удаатай ч МАН-ын 80-аад оны залуусын төлөөлөл гэгдэж явсан хоёр. Тиймдээ ч энэ хоёрт бие биеэндээ найр тавьж өгөх “яриа хөөрөө” байж болох авч УИХ-ын гишүүн А.Ундраагийн хувьд Оюукыг “явуулах” кноп шууд дарах хүмүүсийн нэг юм. Харин ИЗНН-ын тухайд “сүүдрийн” Засгийн газар байгуулна гэж баахан дөвчигнөсөн учир намдаа оноо авах сонголтыг хийх биз.
Юутай ч Л.Оюун-Эрдэнийг “зайлуулах” ажиллагаа улстөрийн яриа хөөрөөнөөс хэдийнэ хальж албан ёсны улс төрийн акц болон хувирлаа.
Эцэст нь хэлэхэд энэ удаагийн Л.Оюун-Эрдэнийн тэргүүлсэн Засгийн газар “хамтарсан” гэсэн утгаараа харьцангуй амь бөхтэй явж өнөөг хүрсэн. Гадна дотны “шахаанд” чамгүй өртсөн ч тэсээд үлдснийг харахад Л.Оюун-Эрдэнэ чамгүй сайн улс төрч болсон гэдгийг илтгэнэ. Энэ удаагийн акцийг харин давж гарвал Л.Оюун-Эрдэнэ нам, төрөө утгаар нь засаглагч болно. Эцсийн хүчээ шавхах цаг!
