УИХ-ын гишүүн Ц.Мөнхтуяа өнчин хүүхдүүдийн нэр барьж “хутгасан бантан”
УИХ-ын гишүүн Ц.Мөнхтуяа багш мэргэжилтэй, “Багшийн хайр” ТББ-тай, Багш нарын Үйлдвэрчний Эвлэлийн Холбооны гишүүн ерөөс багш нарын төлөөлөл, дуу хоолой гэгддэг шинэ түшээдийн нэг. Тиймээс ч 2024 оны УИХ-ын сонгуулиар АН-ын жагсаалтад бичигдэн гишүүн болсон. Түүний хувьд сүүлийн өдрүүдэд олон нийтийн сүлжээнд ёс зүйгүй үг хэллэг ашиглан пост оруулсан түүнчлэн 4 өнчин хүүхдийн нэрээр хандив босгож орон сууц авч өгсөн ч хандивын эздийг байрнаас “хөөх” тухай лайв хийсэн зэргээсээ болж ширүүн шүүмжлэлд өртөөд буй.
Тэрээр багшаар ажиллаж байхдаа буюу 2022 оны 12-р сард ээж нь нас барсан бүтэн өнчин 4 хүүхдийг байртай болгох санаачилга эхлүүлж, олон нийтийн дэмжлэг авснаар ТББ-ын дансанд 80 гаруй сая төгрөгийг цуглуулжээ. Дээрх цугласан мөнгөөр 1 өрөө байр хангалттай авч хүрэх байсан ч багш маань байр авалгүй хандивын мөнгийг зориулалтын бусаар зарцуулсан нь ил болоод буй. Гишүүний тайлбарласанаар бол уг хандивын мөнгөнөөс 25 саяыг багш нарын спортын тэмцээн зохион байгуулахдаа зарцуулсан. Шалтгаан нь тухайн үеийн Боловсролын сайд Л.Энх-Амгалан багш нарын тэмцээнд “25 сая төгрөг өгнө” гэсэн амлалтыг өгсөн байна. Харин энэ амлалтаа Л.Энх-Амгалан сайд биелүүлээгүйн улмаас 25 саяыг ийн зарцуулсан гэж тайлбарласан. Өөрөөр хэлбэл сайдын амлалт биелээгүй учир хандивын мөнгө 55 сая болсон байна. Уг 55 сая төгрөгнөөс Багш нарын үйлдвэрчний эвлэлийн холбооны тэргүүн Д.Мөнхбаатар 25 сая төгрөгийг авч ашигласан бөгөөд удахгүй буцаан шилжүүлнэ гэсэн ч бас өгөөгүй байна. Ингээд анх цугласан 80 гаруй сая төгрөгнөөс ердөө 30 сая төгрөг үлдсэн аж.
Нэгэнт байр авах мөнгөгүй болсон тул “Багшийн хайр” ТББ-ын гүйцэтгэх захирал Б.Идэржавхлангаар дамжуулан дүүгийнх нь байранд 4 хүүхдийг оруулаад мөнгийг нь нөхөж өгөхөөр болсон ч 2024 оны сонгууль дуустал өгөөгүй байна.
Сонгуулийн дараа мөнгөө гүйцээж өгсөн боловч байрыг 4 хүүхдийн нэр дээр бус Мөнхтулга гэдэг хүний нэр дээр шилжүүлсэн байна. Энэ үйлдлээ УИХ-ын гишүүн Ц.Мөнхтуяа тайлбарлахдаа Мөнхтулгаас мөнгө зээлж байрны мөнгийг гүйцээсэн тул Мөнхтулга “барьцаанд” авсан гэжээ.
Анх байрны хандив цуглуулах үед Б.Идэржавхлангийн тухайд тухайн байрыг төрийн бус байгууллагын нэр дээр авах талаар санал гаргасан ч өнөөдөр хувь хүний эзэмшил болсон аж.
Түүнчлэн тухайн үед насанд хүрээгүй байсан 4 хүүхдийн хамгийн том эгч нь насанд хүрч хүүхэдтэй болсон байна. Тиймээс хүүхдүүдийн нэр дээр шилжүүлэх ёстой гэж Б.Идэржавхлан үзсэн бол УИХ-ын гишүүн Ц.Мөнхтуяа том эгч нь хариуцлага сул тул байрыг “үрэн таран” хийгээд 3 дүүгээ гудамжинд гаргана гэж бодсон байжээ. Түүгээр ч үл барам дээрх хүүхдүүдийг байрнаас хөөгөөд оронд нь ядарсан нэг ахмад багшаа оруулна хэмээн өөрийн цахим сүлжээгээрээ дамжуулан мэдэгдэл хийсэн юм.
Энэ бүхнээс дүгнэж хэлэхэд анхнаасаа багш нар ч бай, иргэд ч бай бүтэн өнчин 4 хүүхдийг л байртай болгох гэж нэгдсэн. Тэр ч утгаараа байр бол 4 хүүхдийн өмч байх ёстой атал УИХ-ын гишүүн Ц.Мөнхтуяад тийм бодол алга байгаа нь хачирхалтай. Дөрвөн өнчин хүүхдийг хөөгөөд оронд нь ахмад багшийг оруулна хэмээн өөрийн цахим сүлжээгээр дамжуулан мэдэгдснээс ингэж дүгнэж болохоор байгаа юм.
Үүн дээр нэмээд олон нийтийн сүлжээнд зохисгүй үг хэллэг ашиглан бусдыг доромжилсон зэрэг нь багш хүний ёс суртахуунд нийцэх үү гэдэг асуултыг тавихад хүргэж байна.
Юутай ч шинээр бүрэлдсэн 126 гишүүнтэй УИХ-ын гишүүдийн “тар” нь ийнхүү эхнээсээ танигдаж эхэллээ.
Х.Бумаа
