Монголын эрдэс баялгийн холбоодоос хамтарсан мэдэгдэл гаргалаа.

Монголын эрдэс баялгийн холбоод: Эрдэс баялгийн салбарт үйл ажиллагаа явуулж буй төсөл хэрэгжүүлэгчдийн эсрэг мушгин гуйвуулсан, ор үндэслэлгүй гүтгэлэг, дайралт нь гадаад, дотоодын хөрөнгө оруулалтыг хязгаарлах, эдийн засгийн тогтвортой байдалд сөргөөр нөлөөлөхөд хүргэж байна!

Мэдэгдэлд " Монголын уул уурхайн салбар бол үндэсний нийт бүтээгдэхүүний 30%, аж үйлдвэрийн салбарын 72%, нэгдсэн төсвийн орлогын 35%, нийт экспортын 94%, импортын 23%, гадаадын хөрөнгө оруулалтын 79%-ийг бүрдүүлэгч, улс орны эдийн засгийн хамгийн чухал, хамгийн хүнд ачааг үүрдэг гол салбар.

Монгол Улсын эдийн засагт шууд байдлаар оруулж буй эдгээр хувь нэмрээс гадна тус салбарын 1 сая долларын эцсийн хэрэглээ тутамд уул уурхайн салбарт 6000 гаруй ажлын байр, бусад салбарт шууд бусаар 9000 гаруй ажлын байрыг бий болгож эдийн засгийн тогтвортой байдалд томоохон хувь нэмэр оруулдаг.

Гэтэл эрдэс баялгийн салбарт үйл ажиллагаа явуулж буй төсөл хэрэгжүүлэгчдийн эсрэг бодит байдлыг мушгин гуйвуулсан ор үндэслэлгүй гүтгэлэг, дайралтыг зохион байгуулалттайгаар тогтмол явуулсаар байгаа нь гадаад, дотоодын хөрөнгө оруулалтыг хязгаарлах, оруулсан хөрөнгө оруулалтыг эрсдэлд оруулах, оролцогч талуудын хамтын ажиллагаанд сөргөөр нөлөөлж тус салбарын үйл ажиллагааг доголдуулах, цаашлаад манай улсын эдийн засгийн тогтвортой байдалд сөргөөр нөлөөлөх эрсдэлт нөхцөл байдлыг нэгэнт бий болгож байна.

Түүнчлэн эрдэс баялгийн салбарын үйл ажиллагааг доголдуулж буй эдгээр үйлдлүүд нь тус салбарт ажиллаж буй 75 мянган уурхайчдын нөр их хөдөлмөр бүтээлийг үнэгүйдүүлэх, тэдний ард буй мянга мянган гэр бүлийн эдийн засгийн байдлыг дордуулахаас гадна мөн бусад салбарт ажиллаж буй иргэдийн аж амьдралд ч хүчтэй сөрөг нөлөөлөл үзүүлэх бодит нөхцөл байдлыг үүсгэж буй тул тус салбарт хариуцлагатайгаар үйл ажиллагаа явуулж буй аж ахуйн нэгжүүдийн талаар ор үндэслэлгүй гүтгэлэг, худал тоо баримттай мэдээллийг нийгэмд тараах аливаа үйл ажиллагааг зохион байгуулахгүй байхыг шаардаж байна" гэжээ.