Танилц! “Сахал” хочит Д.Эрдэнэбилэгийн эзэмшдэг стратегийн орд газрууд
2007 оны 2-р сарын 6-ны өдрийн УИХ-ын тогтоолоор Стратегийн орд газруудыг баталгаажуулсан байдаг. Мөн стратегийн орд газарт оруулах ёстой 38 орд газрыг ч нэрлэсэн байдаг. Өөрөөр хэлбэл 18 жилийн турш УИХ стратегийн орд газраа нэмээгүй гэсэн үг.
Тэгвэл Стратегийн гэж нэрлэгдсэн 15 орд газруудтай нэгэн үе “Монголын эзэн” гэж нэрлэгдэж байсан “сахал” хочит Д.Эрдэнэбилэгийн мэдэл дэх орд газруудыг танилцуулъя.
Жич: Манай редакци Монголын стратегийн орд газруудыг хөндөж бичиж буй. Өмнөх нийтлэлийг энд дарж уншина уу.
Багануурын хүрэн нүүрсний орд
Багануур ХК-ийн 21.6 хувийг эзэмшигч болох “Монголиан коал корпорэйшн” ХХК-ийн нэршлийг “Монголиан нэшнл коал корпорэйшн” ХХК болгон өөрчилсөн байдаг. Энэхүү компанийг “Сахал” хочит Д.Эрдэнэбилэгийн алдарт “Кью эс си” ХХК эзэмшдэг.
Төмөртэйн орд газар
Тухайн үед тусгай зөвшөөрөл эзэмшиж байсан “БЛТ” ХХК-ийн талаарх нээлттэй мэдээллийг харвал 2006 онд байгуулагдсан иргэн Луузандамбын Баярцогтын өмч бөгөөд гүйцэтгэх удирдлагаар Л.Баярцогт өөрөө ажилладаг бөгөөд эцсийн өмчлөгчийн талаарх мэдээлэл байхгүй байна.
Харин Л.Баярцогтын холбоо хамаарал бүхий аж ахуйн нэгжүүдийг хайж үзвэл тэрээр “Төмөртэйн хүдэр” ХХК-ийн Ерөнхий захирал, мөн “БЛТ”, “Хустай-Ерөө” ХХК-ийн Гүйцэтгэх захирлаар тус тус ажиллаж байжээ.
Тэгвэл “Төмөртэйн хүдэр” ХХК нь БНХАУ болон Монголын хамтарсан хөрөнгө оруулалтай компани бөгөөд Төмөртэйн орд газрын тусгай зөвшөөрлөөс болж манай улсын Засгийн газрыг олон улсын Арбитрын шүүхэд дуудагдаж байсан. Манай улсыг Арибтрын шүүхэд өгсөн нь БНХАУ-ын хөрөнгө оруулагч тал. Бүтэн 7 жилийн турш үргэлжилсэн уг Арбитрын шүүх хурлын шийдвэрээр манай Засгийн газар ялалт байгуулан Төмөртэйн орд газрыг авч үлдсэн ч “сахал” хочит Д.Эрдэнэбилэгийн “Кью эс си” ХХК-тай дахин холбогддог.
Тодруулбал, тус компани концессын гэрээгээр Төмөртэйн уурхайн хүртэлх 36.7 км төмөр замыг 112 сая ам долларын өртгөөр, Сэлэнгэ аймгийн Хүдэр сум руу чиглэсэн 95 км хатуу хучилттай авто зам, 50 км үргэлжилсэн агаарын цахилгааны шугам зэрэг ажлыг хийсэн байдаг. Гэсэн ч 2022 онд Засгийн газраас “сахал” хочит Д.Эрдэнэбилэгийн “Кью эс си” ХХК-ийн тусгай зөвшөөрлийг цуцалсан байна.
Эрдэнэтийн зэс, молибденийн орд газар
2016 онд “Эрдэнэт үйлдвэр” ХХК-ийн ОХУ-ын мэдлийн “Ростех” ХХК-ийн эзэмшиж байсан 49 хувийг ”Монголын зэс” ХХК худалдан авсан байдаг. Энэхүү “Монголын зэс” ХХК нь мөн л “сахал” хочит Д.Эрдэнэбилэгийн “Кью эс си” ХХК-тай холбогддог.
Д.Эрдэнэбилэг ноёнтон “Эрдэнэт үйлдвэр”-ийн 49 хувийг Оросуудаас “салгаж” авчирсан гавьяатай ч тус үйлдвэр 3 жил л түүний мэдэлд үйл ажиллагаа явуулсан буюу “Эрдэнэт үйлдвэр”-ийн 49 хувь нь “Монголын зэс” ХХК-ийн мэдэлд байхад 2019 оны 3-р сард Засгийн газар шийдвэр гаргаж “Эрдэнэт үйлдвэр” ХХК-д онц дэглэм тогтоосноор 100 хувь төрийн мэдэлд шилжсэн түүхтэй.
Нэг үгээр хэлбэл УИХ-ын тогтоолоор баталгаажсан 15 орд газрын 3 нь “сахал” хочит Д.Эрдэнэбилэгийн мэдэлд байжээ.Мөн түүний мэдэлд Дарханы төмөрлөгийн үйлдвэр, Хөтөлийн цемент, шохойн үйлдвэр хүртэл бий. Харин Засгийн газрын шийдвэрээр Төмөртэйн орд газар, Эрдэнэт хоёрыг эргүүлэн авахдаа давхар Дарханы төмөрлөгийн үйлдвэр, Хөтөлийн цемент, шохойн үйлдврүүдээ буцаан авсан юм.
Ингэснээр нэгэн үе “Монголын эзэн” гэдгэж явсан Д.Эрдэнэбилэг “торны цаана” суусан ч төд удалгүй 3 тэрбум төгрөгөөр батлан даалтад гарч өдгөө “шувуу” болоод байгаа билээ. Могой гурав тасравч гүрвэлийн дайтай гэдэг шиг түүнд “Багануур” ХК-ийн 21.6 хувь, Худалдаа хөгжлийн банк үлдсэн билээ.
Х.Бумаа
