Үргэлгэн төсөв: Төв цэнгэлдэх хүрээлэнгийн захирал Ж.Энхжаргалангийн сарын цалин 9 сая төгрөг!

НИТХ бүрэн бүрэлдэхүүнээрээ Яармагт байрлах Хангарьд ордон руу нүүгээд чамгүй хугацаа өнгөрчээ. Гэхдээ НИТХ-ын ажлын алба нүүсэн боловч дарга нь болох А.Баяр хуучин өрөөгөө хүлээлгэн өгөөгүй, хотын төвд, өрөөндөө тухалсан хэвээр байгаа аж. Түүгээр ч барахгүй А.Баяр дарга 6 туслахтай. Төсөв хөрөнгө хүрэлцэхгүй байгаа тул төсөв хэмнэлтийн горимд шилжиж, Төв банк мөнгөний хатуу бодлого баримтална хэмээн айлгаж байхад НИТХ-д төсөв мөнгө хэмнэх өчүүхэн ч хүсэл алга байгаа нь А.Баяр даргын энэхүү дабл стандартаас харагдана.

Бүх амьтан тэгш эрхтэй. Гахай бүр илүү тэгш эрхтэй гэдэг амьтны фермийн зарчим нийслэлд үйлчилдэг байна.  

А.Баяр дарга 6 туслахтайгаараа тэргүүлдэг бол Нийслэлийн Засаг даргын орлогч Т.Даваадалай 5 туслахаар удаалдаг аж. Энэ олон туслахууд чухам юу хийж, дарга нарынхаа ямар ажилд тусалж дэмждэг нь ойлгомжгүй ч манай хотын дарга нар төрийн тэргүүн, УИХ-ын дарга, Ерөнхий сайдаас ч олон туслахаар өөрсдийгөө тойруулж, ямбалан байна. Хот, хөдөөгүй оффистой, тав, зургаан туслахтай эдгээр дарга нарын эрх ямба нийслэлийн ажил, амьдралд ямар нэмэр тус болж буйг Х.Нямбаатар дарга, бурхан, чөтгөр гурав л мэдэх байх.

Манай дарга энэ жилээс хоёр орлогч дээрээ нэмээд 3 бүтээмжийн менежертэй болсон. Засагт 3 нам хамтарсан учраас Бүтээжмийн менежер гэх энэхүү шинэ бүтэц дээр заавал 3 хүн ажиллах ёстой юм гэсэн.

Нийслэлийн удирдлагуудын тансаглал, төсвийн мөнгөөр гараа угаадаг үрэлгэн зан үүгээр хязгаарлагдахгүй. Мөн л шинээр байгуулагдсан Нийслэлийн өмчит компаниудын удирдлага, ажилчдын цалин хөлс гэж хувийн компаниудын CEO нараас өндөр.

Тодруулбал, нийслэлийн өмчит компаниудын гүйцэтгэх захирлууд 2-9 сая төгрөгийн цалин авдаг бол ажилчид нь 2-6 сая төгрөгийн цалин пүнлүү авдаг байна. Хамгийн бага цалинтай нь Гэрлэх ёслолын ордоны дарга Ү.Оюунзул 1.9 сая төгрөгийн цалин авдаг бол хамгийн өндөр цалинг “Төв цэнгэлдэх хүрээлэн” ХХК-ийн Гүйцэтгэх захирал Ж.Энхжаргалан 9 сая төгрөгийн цалинтай.

Чухам юу хийдэг нь тодорхойгүй ч төсвийн мөнгөнөөс сар бүр хэдэн саяар нь халааслаад сууж байдаг дарга нарын жагсаалт үүгээр дуусахгүй:

• Улаанбаатар орон сууцжуулалт ХХК-ийн Гүйцэтгэх захирал З.Төмөртөөмөө-6 сая,  
• УСУГ-ын дарга Ц.Төрхүү-4,4 сая,
• Эмээлт эко паркийн гүйцэтгэх захирал Б.Мягмар- 5 сая,
• Улаанбаатар хөрөнгө оруулалт менежмент ҮЦК ХХК–ийн төсвийн захирагч Г.Гангамөрөн- 6 сая төгрөгийн цалинтай гэх мэтээр хөвөрнө.    

Энэ бүхнээс харахад хоёрхон жилийн өмнө 300-400 орчим тэрбум төгрөгийг хүргэх гэж “зовж” байсан нийслэлийн төсөв хөрөнгийн эх үүсвэрийг Х.Нямбаатарын баг 3 их наяд төгрөг хүртэл тэлж чадсан нь манай улсын, манай нийслэлийн эдийн засаг үнэхээр өсөн нэмэгджээ гэж харж болохоор. Үнэндээ бол төсвийн мөнгө уйлдаггүй учраас хэт үрэлгэн хандаж буй хүйтэн сэтгэл юм.

Иргэдийн нуруун дээр ирэх татварын дарамт өдрөөс өдөрт өсөн нэмэгдэж, хувиараа аж ахуй эрхлэгчид бараг цусаар уйлж байгаа. Өнгөрсөн 7 хоногт Сангийн сайд мэдээлэл хийж Төв банк мөнгөний хатуу бодлого баримталж эхэлсэн тул төсөв дагаад хэмэнэлтийн горимд шилжиж байгаа тухай мэдэгдсэн. Гэтэл нийслэл дэх Х.Нямбаатар даргын бүтэц, дарга нарын цалин төсөв, эрх ямба яг гахайных шиг бүр илүү байгаа нь юу өгүүлнэ вэ. Ингэлээ гээд нийслэлийнхний үндсэн асуудал агаарын бохирдол, утаа, түгжрэл, өмхий үнэр шийдэгдэж байгаа билүү.  

Нийслэлийн төсвийн урсгал зардал өмнөх жилийнхтэй харьцуулахад 3 дахин нэмэгдсэн гэдгийг энд дурдах нь зүй.

Х.Бумаа