А.Баяржавхлан: Монголын мөрийтэй тоглоомын хамгийн их ашиг олдог эзэн нь Кибер болон Цахим гэмт хэрэгтэй тэмцэх хэлтсийн нэр, нүүрээ нуусан ажилчид

Сүүлийн үед цахим орчинд "Ноорог" медиагийн хамт олныг цагдаагийн алба хаагчид дайчлан шалгаж, ажлын эд хэрэгсэл, гар утсыг нь хураан авч шалгасан асуудалд олны анхаарлыг татаж буй. Тухайлбал “Ноорог” медиагийн ажилтан А.О-г зургаан дансаар 9.3 тэрбум төгрөг эргэлдүүлсэн гэх шалтгаанаар нэг сар цагдан хориод байна.

Тэгвэл энэ талаар А.О-ын ах болох А.Баяржавхлан 9.3 тэрбум төгрөгийн цаад эзэн нь өөрийгөө хэмээн цахим хуудастаа мэдэгдэл хийсэн юм. Цаашлаад мөрийтэй тоглоомын үйл ажиллагааг таслан зогсоох нэрийн дор ажил хийдэг ЭЦА-ны Кибер гэмт хэрэгтэй тэмцэх хэлтэс, Цахим гэмт хэрэгтэй тэмцэх хэлтсийн ажилчид мөрийтэй тоглоом зохион явуулдаг хүмүүсээс хахууль авдаг, мөнгө завшдаг хэргийг ил болгон, шүгэл үлээлээ.

Тэрээр цахимаар мөрийтэй тоглоом явуулдаг “Торгоны зам” клубийг ажиллуулдаг эзэн аж. Уг "Торгоны зам" клубээ ажиллуулаад хоёр гаруй жил болжээ. Ингэхдээ ЭЦА-ны Кибер гэмт хэрэгтэй тэмцэх хэлтэс, Цахим гэмт хэрэгтэй тэмцэх хэлтсийн нэр бүхий, зүсээ нуусан ажилчид цахим мөрийтэй тоглоом эрхлэн явуулдаг 100 гаруй хүмүүсийн ард байдаг, тэднээс илүү ашиг олдог, сар бүр мөнгө авдаг талаар дэлгэрэнгүй мэдээлэл өгсөн юм. Тэгвэл түүний өгсөн мэдээллээс онцлох ишлэлийг хүргэе. 

• 1. Монголын мөрийтэй тоглоомын хамгийн их ашиг олдог эзэн нь Кибер гэмт хэрэгтэй тэмцэх хэлтэс болон Цахим гэмт хэрэгтэй тэмцэх хэлтсийн нэрээ нуусан, нүүрээ нуусан ажилчид байдаг.
• 2. “Торгоны зам” клуб болон “Ноорог” гэдэг газарт ямар нэг хамаарал байхгүйг албан ёсоор хэлж байна.  Манай аав ээж хоёрыг, хоёр дүүг, дансаа хэрэглүүлж байсан хүмүүсийг яллагдагчаар татсан. Гэтэл би энд байж байна. “Торгоны зам”-ын эзэн, мөрийтэй тоглоом зохион байгуулсан хүн нь би. 
• 3. Эхнэр бид хоёр их хэмжээний өрөнд ороод, "Хос тамга” гэх цахим мөрийтэй тоглоомын газарт би админаар, эхнэр тогоочоор ажилд орсон. Тэнд найман сар орчим ажилласан. Тэгэхэд “Хос тамга”-ын нэг дансыг СХД-ийн нэр бүхий цагдаа барилт хийж, холбогдоод, мөнгө нэхсэн. Тэр цагдаатай удирдлагууд тохиролцоод жил орчим хамтарч ажилласан гэсэн. Тэр хүний нэр ус, хэдэн төгрөг авдаг байсан бүх мэдээлэл надад бий.
• 4. Би "Хос тамга"-аас гараад "Торгоны зам" гэдэг клуб ажиллуулж эхэлсэн. Ингээд 3 сарын дараа нэг дансаа бариулсан. Тэгээд бид болихоор шийдэж байтал Кибер гэмт хэрэгтэй тэмцэх хэлтсийн цагдаагаас “Үйл ажиллагаагаа үргэлжүүлж болно, ашгаа ч сайн ол” гэж хэлээд бид тэр хүнтэй найман сарын хугацаанд хамтарч ажилласан. Энэ хугацаанд 400 орчим сая төгрөг өгсөн байдаг.
• 5. 2024 оны 03 сараас хойш Кибер гэмт хэрэгтэй тэмцэх хэлтсийн өөр нэг ажилтантай хамтарч ажиллах болсон. Тэр хүнтэй 10 сар орчим ажиллахдаа эхний саруудад 50 сая төгрөг өгдөг байсан бол үүнийгээ нэмээд 75 сая төгрөг болгосон. Сар бүрийн 20-нд мөнгөө өгдөг байсан.