ЕБС-ийн 55-р сургуулийн багш нар сурагчдадаа зориулж, кино театр нээлээ
Нийслэлийн ерөнхий боловсролын 55-р сургууль кино театртай болсон анхны сургууль болжээ.
Тус сургуулийн багш, ажилчид хамтран нэг ангиа тохижуулж, кино театр болгосон байна. Мөн сургалтад шаардлагатай чанга яригч, том дэлгэц зэргийг нэмэлтээр авсан байна. 55-р сургууль нь тусгай хэрэгцээт хүүхдүүдийн буюу аутизм, дауны хам шинж, тархины саажилттай зэрэг хүүхдүүдэд суурь боловсрол олгодог юм. Мөн өнгөрсөн жил ахлах ангийн сурагчдаа амьдрах ухаанд суралцуулахаар сургуулийнхаа дээвэр дээр хүлэмж байгуулсан юм.
Уг сургууль 150 орчим багш ажилтантай, 500 орчим сурагчтай. Хоёр ээлжээр хичээллэдэг. Хүн ам олонтой дүүрэгт үйл ажиллагаа явуулдаг учир бусад сургуулиудаас хүүхдийн тоо харьцангуй олон. 2024 онд тус сургуулийн ахлах ангийн 43 сурагч зочид буудлын өрөөний үйлчилгээ, талх нарийн боов, цэцэрлэгч, ногоочин гэсэн чиглэлээр мэргэжлийн чиг баримжаа олж, ажлын байран дээр гарч байжээ.
