Улсын Тэргүүн шадар сайд Л.Гантөмөр "Азийн төлөөх Боао форум"-д БНХАУ-тай хамтарч ажиллах гурван санал дэвшүүлжээ

"Азийн Хавай" гэгдэх Хайнанийн Боао хотод Ази тивийн эдийн засгийн бодлого, хамтарсан чиг хандлагыг тодорхойлох томоохон чуулга уулзалт зохион байгуулагдаж буй. Уг чуулга уулзалтын бага хуралд 60 гаруй орон, 2 мянган бүс нутгийн төлөөлөгч оролцож байгаа юм. Энэ жилийн "Азийн төлөөх Боао форум" нь олон улсын хөгжил, хамтын ажиллагааг дэмжих зорилготой, нээлттэй яриа хэлэлцээг нэмэгдүүлэх салбар бүрийн шинэлэг хэлбэрийг судлах, бодит үр дүнд хүргэхэд чиглэж байгаа юм. Энэ хүрээнд Монгол улсаас төлөөлөн оролцож буй Улсын Тэргүүн шадар сайд бөгөөд Эдийн засаг хөгжлийн сайд Л.Гантөмөр БНХАУ-ын Төрийн зөвлөлийн Шадар сайд Дин Шюэшянтай хийсэн албан ёсны уулзалтын үеэр хоёр улсын харилцаа ойлгомжтой, тодорхой байх, харилцан бие биенээ дэмжиж ажиллахыг илэрхийлж, дараах 3 чиглэлээр хамтран ажиллах тодорхой саналуудыг дэвшүүлжээ. 

Тухайлбал, 

1. Хил холболтыг эрчимжүүлэх, экспортын тогтвортой байдлыг хангах, гурван улсын эдийн засгийн коридорын төслүүдийг эрчимжүүлэх;

2. Эрчим хүч болон бусад аж үйлдвэрийн салбарыг хөгжүүлэх;

3. Шинжлэх ухаан, хиймэл оюун ухаан, шинжлэх ухааны паркыг хамтран хөгжүүлэх.

Тэгвэл БНХАУ-ын Төрийн зөвлөлийн Шадар сайд Дин Шюэшян эдгээр саналыг бүрэн дэмжиж, хоёр улсын ард иргэдэд ашиг тустай байх бүхий л санал санаачлагуудад ажил хэрэгч хамтын ажиллагааг эрчимжүүлэх, хөрш орны хувьд эдийн засгийн давуу талыг ашиглан ногоон хөгжлийн төлөө хамтран ажиллахаа илэрхийлсэн байна.