Хэнтий аймгийн 20 сурагчийг хиймэл оюуны элч төлөөлөгчөөр бэлтгэнэ
ЦХИХХЯ, НҮБ-ын Хүүхдийн сантай хамтран орон даяар 1000 залуу манлайлагчдыг хиймэл оюуны (AI) элч болгон бэлтгэх ажлыг эхлүүллээ.
ЦХИХХ-ны сайд Ц.Баатархүү Хэнтий аймагт ажиллах үеэрээ 400 гаруй сурагчтай уулзаж, “1000 AI Ambassador” төслөө танилцуулсан юм. Тэрбээр, "Хиймэл оюуны үндэсний стратегийн хүрээнд болж буй энэхүү төсөл нь хиймэл оюуны салбарт мэргэшсэн хүний нөөцийг бэлтгэж, улс орны инновацын чадамжийг дээшлүүлэхэд чухал нөлөө үзүүлнэ. Төслийн хүрээнд 1000 залуу манлайлагчийг төрөл бүрийн сургалтад хамруулна. Тэд хөдөө, орон нутагт хиймэл оюуны хэрэглээ, ач холбогдлыг ойлгуулах сургалт, арга хэмжээг зохион байгуулж, иргэдийн дижитал боловсролыг нэмэхэд хувь нэмрээ оруулах юм. Үүнээс гадна, шинэлэг санаачилга, инновацыг дэмжих, хиймэл оюуныг ашиглан нийгэм, эдийн засгийн хөгжилд хувь нэмэр оруулах боломжийг судалж, бодит төсөл, үйл ажиллагаагаар дамжуулан хэрэгжүүлнэ" хэмээн хэлснийг ЦХИХХЯ-аас мэдээлэв.
Уулзалтын үеэр Хэнтий аймгийн 20 сурагчийг хиймэл оюуны элч төлөөлөгчөөр бэлтгэх үүргийг аймгийн Засаг дарга Д.Аюурбуньд өгч, 20 ширхэг компьютер гардууллаа.
