Экс Ерөнхийлөгч Х.Баттулгын охин Б.Намуун хүн амины хэргийн эзэн холбогдогч гэв үү?
Ерөнхийлөгч Х.Баттулга Төгрөг нуурын нүүрсний ордыг хятадуудад үнэ хүргэн зарсан талаар ЗГХЭГ-ын дарга Н.Учрал өчигдөр мэдээлсэн. Гэтэл үүнээс ч дутахгүй ноц бүхий, хүний амь настай холбоотой, олон арван иргэдээс их хэмжээний мөнгө залилсан, хэдэн арван тэрбумын хохиролтой, бүлэг зохион байгуулалттай хэргийн эзэн зангилаа, хэнгэргийн дохиур нь мөн л Ерөнхийлөгч асан Х.Баттулга болох нь сүүлийн өдрүүдэд ил болоод байна.
Тодруулбал, улсын харцага Н.Батзаяагийн гэргий зочид буудалд учир битүүлэг байдлаар амиа алдсан тухай өнгөрсөн оны арваннэгдүгээр сард манай www.reelnews.mn анхлан мэдээлж байсан. Тухайн үед талийгаач өөрийгөө боомилсон байдалтай олдсон гэдгээс өөр дэлгэрэнгүй мэдээллийг хууль хяналтын байгууллага өгөөгүй. Талийгаач Ш.Энхжаргал нь ХЗДХЯ-нд мэргэжилтнээр ажилладаг байсан бөгөөд амиа егүүтгэсэн шалтгаан нь мэргэжлээрээ халхавч хийн иргэдээс их хэмжээний мөнгө луйвардсан байх магадлалтай гэж эх сурвалж мэдээлж байв.
Тэгвэл энэ хэргийн учиг, сэжүүрийг хууль хяналтын байгууллага хөөж, хөвөрдөж утасны сэжүүрээс атгасан бололтой. Хохирсон иргэдийн талаас ч зах зухаасаа хөдөлж эхэлсэн байна. Тухайлбал, сүүлийн өдрүүдэд иргэн Г.Ган-Очир сошиал хуудсаараа дамжуулан энэ талаар хөндөж эхэлсэн бөгөөд түүний өчигдөр нийтэлсэн пост нэлээн ноц бүхий. Тэрээр:
“Ерөнхийлөгч асан Х.Баттулгын охин Б.Намуун, түүний нөхөр О.Тэнүүн, Монгол Улсын харцага Н.Батзаяагийн гэргий Хууль зүйн дотоод хэргийн яамны мэргэжилтэн Ш.Энхжаргал, Хөгжлийн банкны хуульч Д.Оргил, “Грейт Сайрус” группийн захирал П.Амартүвшин нар нийлж “Буянт-Ухаа 2” хороолол болон “Шинэ яармаг” хороололд байранд оруулна гэж хоёр жилийн хугацаанд луйврын пирамид үүсгэж 330 иргэнээс 33 тэрбум төгрөг залилан авч, 2024 оны сонгуульд зарцуулжээ.
Уг хэрэг нь хуулийн байгууллагад шалгагдаад ирэхэд ХЗДХЯ-ны мэргэжилтэн Ш.Энхжаргал “Гэсэр” сүмийн хажууд байрлах “Holiday inn” буудалд учир битүүлгээр нас баржээ. Ш.Энхжаргал нас барахаасаа өмнө 6 хуудас гэрээслэл бичиж, авсан мөнгөө юунд зарцуулсан, хэнд өгснөө бүгдийг нь бичиж үлдээсэн байна. Хөгжлийн банкны хуульч Д.Оргил, талийгач Энхжаргалыг “Энэ хэргийг чи бүгдийн даагаад үхээрэй. Тэгэхгүй бол гурван хүүхдийг чинь ална” гэж байнга сүрдүүлдэг байж.
Х.Баттулга аа, луйварчин охин, хүргэн хоёроо хүүтэй мөнгө зээлж, гэр орноо зарж орох оронгүй болсон энэ олон хохирогч нарыг хохиролгүй болго гэж хэлээч ээ.
Чи Монголыг хорлож байсан бол чиний үр хүүхэд монголчуудыг хорлож явна”. гэжээ.
Энэ богинохон мэдээллийн өгүүлбэр бүр нь цаанаа “юм”-тай аж.
ХЗДХЯ-ны мэргэжилтэн эмэгтэй амиа хорлосны цаад шалтгаан, ийм эмгэнэлтэй алхам хийхэд хүргэсэн хүмүүс хэн хэн болох, талийгаач тэдэнтэй ямар хэлхээ холбоо, нэгдмэл ашиг сонирхолтой байсан тухай, хамтран ямар бизнес эрхэлж, ямар асуудалд орсон бэ гээд. Холбогдогчид нь, үйл баримт нь нэр устайгаа байна. Цагдаа, хуулийн байгууллага энэ мэдээллийн араас явах хэрэгтэй байх. Нягталж, тодруулж, учиг зангилааг нь тайлах ёстой болов уу.
Гурван хүүхдийн эх, хүний сайхан хань, төрийн яамны мэргэжилтэн эмэгтэйг гэрээслэл бичиж үлдээгээд амиа егүүтгэх болтол нь дарамталсан, цөхрөл мухардалд оруулсан ямар шалтгаан, ямар хүмүүс байв? Талийгаач гэрээслэлдээ юу бичиж үлдээв? Тэр гэрээслэл хууль хяналтынхны гарт орсон уу, эсвэл!
Энэ хэргийг мөрдөн шалгах явц ямар шатандаа байна вэ? Олон өчигдөр нийтэд хүрсэн мэдээлэл үнэн үү? Тийм бол нэр дурдагдсан хүмүүсийг мөрдөн шалгах ёстой юу гэх мэт олон асуудал, асуулт энэ хэргийн ард нуугдаж байгаа юм.
Хууль хяналтын байгууллагаас хэргийн талаар тодруулахад, хувь хүний нууцтай холбоотой учраас дэлгэрэнгүй мэдээлэл өгөх боломжгүй гэсэн бэлэн зэхээний тайлбар өгдөг. Гэтэл энэхүү жижүүрний тайлбарын ард хэн нэгэн эрх мэдэлтний нөлөө байгаа юм биш биз, олон зуун гэмгүй иргэд хохироод үлдэж байгаа юм биш гэсэн эргэлзээ үлдэж байна.
Бидэнд олдсон мэдээллээр талийгаач эмэгтэй амиа хорлох хүртлээ Ерөнхийлөгч асан Х.Баттулгын охин Б.Намуун болон түүний нөхөр О.Тэнүүн нарын дансанд өндөр дүнтэй шилжүүлэг байнга хийж байсан гэх. Тэгвэл амиа егүүтгэсэн гэгдээд буй талийгаач Ш.Энхжаргалын ард тэд байсан юм биш биз гэсэн асуулт ч гарч ирж байгаа юм.
Эцэст нь хэлэхэд Ерөнхийлөгч асан Х.Баттулгатай хамтарч ажиллаж байсан, ойр дотно, гар хөл нь явсан хүмүүсээс хэчнээн нь шоронд орж, хэд нь шороонд булагдав гэдэг сэдвээр хэвлэлийнхэн нэг биш удаа хөндсөөр ирсэн. Тун ч таагүй “хар” статистик тэнд дурдагддаг. Тэгвэл энэхүү зочид буудлын хэрэг тэрхүү хар статистикийн нэг байх вий.
Хэрэв тийм биш бол экс Ерөнхийлөгч маань энэ бүхэнд цэг тавьж, нэрээ цэвэрлэж авах хэрэгтэй болов уу. Харин гэм буруутай бол хэдий Ерөнхийлөгч байсан ч гэлээ иргэний хувиар хариуцлагаа хүлээх ёстой юм.
Г.Ууганбаатар
