Иргэдэд хямд гурил идэх сонголтыг нь үлдээнэ үү
УИХ-ын чуулганы нэгдсэн хуралдаанаар Гаалийн албан татвараас чөлөөлөх тухай хуулийг хүчингүй болгох тухай хуулийн төслийг хэлэлцэж байна. Гурил үйлдвэрлэгч дотоодын компаниудын монопол байдлаас болж гурилын үнэ 2023 онд өмнөх оноосоо 78 хувиар өссөн үзүүлэлт гарсан нь импортоор хямд гурил оруулж ирэх хуулийг баталсан байдаг.
Гэвч иргэд хямд гурил хэрэглэж эхэлснээс болж буюу илүү өргөн сонголттой болсноос үүдэн дотоодын үйлдвэрлэгчид хаалгаа барихад хүрсэн байна. Үүнийг ХХААХҮ-ийн сайд Ж.Энхбаяр чуулганы хуралдаанд тайлбарлалаа.
Өөрөөр хэлбэл гурил үйлдвэрлэгч нараа ямар ч хамаагүй аргаар дэмжиж хамгаалах нь чухал байна гэдгийг онцоллоо. Гэтэл ард иргэд тэдний монополдож тогтоосон үнээр гурил идэх ганцхан сонголттой болж байгааг огт тоохгүй байгааг УИХ-ын зарим гишүүн шүүмжлэв.
Тухайлбал, УИХ-ын гишүүн Х.Баасанжаргал төрөөс олон төрлийн хөнгөлөлттэй зээл олгоод байхад гурилын үнэ нэмэгдэж, чанарын шаардлага хангахгүй байгааг тодотголоо. Мөн УИХ-ын гишүүн Б.Баярбаатар гурилын компаниуд үгсэн хуйвалдаж өнгөрсөн хугацаанд үнээ 78 хувиар нэмсэн нь иргэдэд ачаа болсон гэдэг шүүмжлэлийг илэрхийллээ.
Өөрөөр хэлбэл гурилын компаниуд төрөөс олон төрлийн хөнгөлөлттэй зээл, тусламж байнга авдаг ч үнээ нэмсээр байгааг шүүмжиллээ. УИХ-ын гишүүн Д.Батлут ХХААХҮЯ газар тариалангийн бодлогыг улс орон даяар явуулах ёстой боловч зөвхөн төвийн бүс дээр анхааран ажиллаж буйг буруутгаж байна.
