УИХ-ын гишүүн асан Б.Саранчимэг: Хүннү хотын захирагчаар би биш Мөнхөөгийн Батбаяр гэж хүн ажилладаг гэдгийг хариуцлагатайгаар мэдэгдье!
Сүүлийн өдрүүдэд зарим хэвлэл мэдээллийн хэрэгслээр УИХ-ын гишүүн асан Б.Саранчимэгийг Хүннү хотын захирагчаар томилогджээ хэмээн мэдээлсэн. Тэгвэл Б.Саранчимэг үүнийг үгүйсгэсэн байна. Тэрээр өөрийн нүүр номондоо “Миний бие Хөшигийн хөндийн Эдийн засгийн чөлөөт бүсийн захирагчаар нэг сарын өмнө томилогдож, үүрэгт ажилдаа ороод ажиллаж байгаа билээ.
Монгол Улсын Их Хурлын 2022 оны 04 дүгээр сарын 07-ны өдрийн “Хөшигийн хөндийн эдийн засгийн чөлөөт бүс байгуулах тухай” 10 дугаар тогтоолын дагуу Төв аймгийн Сэргэлэн сумын нутаг дэвсгэр дэх "Чингис хаан" Олон улсын шинэ нисэх буудлыг түшиглэн "Хөшигийн хөндийн эдийн засгийн чөлөөт бүс"-ийг байгуулахаар шийдвэрлэж, газрын талбайн хэмжээг 1000 га гэж тогтоосон.
Хөшигийн хөндийн эдийн засгийн чөлөөт бүсэд худалдаа, аж үйлдвэрлэл, тээвэр логистик, аялал жуулчлал болон олон улсад өрсөлдөх чадвартай бичил, жижиг, дунд бизнес эрхлэгчдийг дэмжих, тэднийг бойжуулж, хөгжүүлэх инкубатор төвийг байгуулж, ажлын байрыг нэмэгдүүлэх, Ази-Европыг холбосон олон улсын тээвэр, логистикийн төвийг байгуулснаар уул уурхайн салбарын хамаарлаас хараат бус, олон тулгуурт эдийн засгийг бүтцийг бий болгох ач холбогдолтой төсөл юм.
Миний хувьд Хөшигийн хөндийн эдийн засгийн чөлөөт бүсийг санхүү хөрөнгө оруулалт, мэдээллийн технологи тэр дундаа инноваци хиймэл оюун ухаан хөгжүүлэлт, худалдаа үйлдвэрлэл, тээвэр ложистикийн салбаруудыг илүү анхаарч хөгжүүлэхээр зорилго тавин ажиллаж байгааг та бүхэндээ дуулгая. Удахгүй энэ салбарын төлөөллүүдтэй чөлөөт бүсэд хамтарч ажиллах, хөгжүүлэх талаар уулзаж ярилцаж, санал бодлоо солилцох болно.
Эцэст нь нэгэн залруулга хийе. Хүннү хотын захирагчаар Мөнхөөгийн Батбаяр гэж хүн томилогдон ажилладаг гэдгийг хариуцлагатайгаар мэдэгдье.
Бид Засгийн газар, асуудал эрхэлсэн салбарын яамдууд, Нийслэлийн удирдлагуудтай нягт хамтарч ажиллаж, Монгол улсын хамгийн анхны ЭДИЙН ЗАСГИЙН чөлөөт бүсийг цогцоор нь бүтээн байгуулахаар ажиллаж байна” гэжээ. Мөн тэрээр Хөшигийн хөндийн Эдийн засгийн чөлөөт бүс нь санхүү хөрөнгө оруулалт, хиймэл оюун ухаанд суурилсан технологи хөгжүүлэх дотоодын компаниудыг илүүтэй дэмжин ажиллахаа ч мэдэгдсэн байна.
