Хүүхэд хамгаалалд анхаарна гэж байгаа юм бол хүүхдийн байгууллагыг улстөрчдөөс эхлээд хамгаалаач, Ерөнхий сайд аа!
-МАН, АН-ынхны экс гишүүдээ эрхлүүлдэг газар нь төрийн агентлагууд болжээ-
Засгийн газраас хүүхэд хамгааллын асуудлыг онцгойлон авч үзнэ гэлээ. Хүүхдийн эрүүл, аюулгүй орчинд өсөж торних, хамгаалуулах, сурч боловсрох нөхцөлийг хангахаас эхлээд бүх талаас нь салбар салбарын яамд тодорхой ажлууд хийх нь. Хууль журамдаа ч өөрчлөлт оруулна, шинээр хууль батлуулна гэнэ. Ярих тунхаглах амархан. Хийх хэцүү шүү, Ерөнхий сайд аа.
Хүүхэд хамгаалал, хүүхдийн асуудалд анхаарна гэдэг хүүхдийн байгууллагыг сайн ажиллуулна гэсэн үг. Тухайн байгууллагыг улс төрийн намын, улстөрчдийн дамжин өнгөрөх газар, карьер нь дууссан “депутатын” өдөр өнжүүлэх болгохгүй байхаас хамаг ажил эхэлнэ. Тэгэхгүй бол төрийн аливаа ажил дунд шатандаа гацаж, царцаж, төрийн хууль, журам, төсөл хөтөлбөр, төсөв мөнгө мөн л дунд шатандаа замхран, завхардаг урьд урьдын гашуун түүх давтагдана. Хүүхэд, гэр бүлийн хөгжил, хамгааллын ерөнхий газар гэдэг агентлаг сүүлийн 20-иод жил МАН, АН-ын улстөрчдийн дамжин өнгөрүүлэх, өдөр өнжүүлэх шиг болсон. Нэг талаар эрх баригч намуудын албан тушаалын бялууны булан нь энэ агентлаг болсоор ирсэн гашуун, эмгэнэлтэй түүх бий. Баян бизнесмэн хатагтай хүүхдийн байгууллагын даргаар ирмэгцээ өрөө тасалгаагаа хэдэн арван саяар засуулж, тохижуулан, Арабын шэйхийн өргөө шиг болгочихоод тансаглаж суусан жишээ арав гаруйхан жилийн өмнөх явдал. Түүнээс хойш ч гэсэн намуудын цүнх баригчид л энэ агентлагийн даргын сэнтийг ээлжлэн зайдагнасаар ирсэн дээ. Үүний тод томруун жишээ нь таны томилсон экс гишүүн хатагтай өнөөдөр Хүүхэд, гэр бүлийн хөгжил, хамгааллын ерөнхий газрын даргын зөөлөн буйдан дээр тарвалзаж байна. Хүүхдийн байгууллага үүсэн байгуулагдсаны 100 жилийн ойн тэрбум тэрбум төгрөгийн төсвийг буйдан завсраа хавчуулчихаад, Букингемийн хатан хаан шиг булхалзаж сууна!!!
УИХ-ын гишүүнээр ажиллаж байгаад буухаараа намаасаа, төрөөс, төрийн албанаас өр нэхдэг, албан тушаал, эрх мэдлийн бялуу хүртэх гэж чичрэн дайрдаг энэ бузар муухай, жигшин зэвүүцмээр жишиг таны үед бичигдээгүй хууль болон тогтлоо. Өнгөрсөн 2020-2024 онд УИХ-ын гишүүнээр ажиллаж байсан МАН-ын данстай бүх эмэгтэйчүүд гадаадад Элчин сайдын яамдад, эсвэл дотоодод энэ тэр агентлагийн даргаар бүгд очжээ. Эрчүүд нь ч ялгаагүй ээ. Хэн бэ гэдгээ олон нийтэд таниулж, заримаас нь ард түмэн залхаж, дургүйцэж, сайдын давхар дээлийг нь тайлуулан огцруулж хүртэл байсан, хэл ам, хэрүүл тэмцэлд хуруу, хошуу холбосон, хөрөнгө мөнгөний луйвар, авлигын хэрэгт гар, хөлөө лав дүрсэн учраас дахин сонгогдохгүй нэр нүүргүй болсон нөхөд агентлагуудад даргаар очин жаалж, амин хувийн ашиг сонирхол, арчаагүй эго-гоо төсвийн мөнгөөр тэжээн томруулж байгааг хэзээ таслан зогсоох юм бэ? Авлигатай тэмцэх 5Ш ажиллагаа чинь амжилттай болоод дуусчихсан уу? Төрийн агентлагуудын толгойд заларсан экс гишүүдэд чинь монголчууд, татвар төлөгчид бид ямар өртэй юм бэ?
Хүүхэд, гэр бүлийн хөгжил, хамгааллын ерөнхий газрын даргаар томилогдоод гурван сарын нүүр үзэж байгаа экс гишүүн Б.Баярсайханыг салбарынхан нь таагүй хүлээн авсан. Таатай юм түүнд угаасаа байхгүй. “Б.Баярсайхан гишүүн яаж ийгээд албан тушаал авав” хэмээн хэвлэлүүд голыг нь олж, үнэнийг нь хатгаж бичсэн. УИХ-ын гишүүнээр дөрвөн жил ажиллахдаа өөдтэй, олигтой байгаагүй. Нэр хүнд муутай. Тэр тусмаа хүүхэд, гэр бүлийн асуудал дээр “но”-той намтар, паянтай хүн шүү дээ.
Нэгт, Төрийн албанд ажилласан туршлагагүй байхдаа шууд Боловсролын яамны Төрийн нарийн бичгийн даргаар крандуулан очиж, яам, салбарынхандаа гологдон, “Яамны ажлыг цалгардуулсан, удирдан зохион байгуулах ур чадваргүй” гэдэг үндэслэлээр халагдсан. Гэвч шүүхдэж заргалдсаар Төрийн нарийны суудалд эргэн очсон байдаг. Төрийн албанд хайртайдаа биш төгрөг мөнгөнд дуртайдаа л албан тушаалын өндөрлөг рүү амь тэнцэн зүтгэдэг хүн гэж харагддаг. Ийм хүмүүс төрд удаан байх хамгийн хортой. УИХ-ын гишүүн болмогцоо цэрэг хээрийн хувцас өмсчихсөн Завхан аймагт очоод дарга нарыг нь загнан дүрэмдэж явсан нь олон нийтийн эгдүүцлийг төрүүлсэн. Улстөрчийн хувьд энэ мэтээр улаан цайм популизм хийсээр байгаад л дөрвөн жилийг нүүр өнгөрүүлсэн.
Хоёрт, УИХ-ын гишүүн асан Б.Баярсайханы нөхөр П.Баярмагнай УИХ-ын Тамгын газрын Гадаад харилцааны хэлтсийн даргаар томилогдоод удаагүй байгаа. Б.Баярсайхан БСШУСЯ-ны Төрийн нарийн бичгийн даргаар ажиллаж байхдаа нөхрийгөө АНУ-ын Сан Францискод суух дипломат төлөөлөгчөөр томилуулахаар хөөцөлдөж, тэр нь олонд ил болж байв. 2020 онд УИХ-ын гишүүн болсныхоо дараа энэ хүслээ биелүүлж, нөхрийгөө АНУ-д дипломат албанд илгээсэн. Төрийн албыг ингэж төрлийн алба, гэр бүлийн бизнес болгосон хүн бол Б.Баярсайхан. Үүний нотолгоо нь тэдний гэр бүлийн хөрөнгө орлого юм. Б.Баярсайханы УИХ-ын гишүүнээр ажиллаж байхдаа гаргаж өгсөн хөрөнгө орлогын мэдүүлгээр бол тэрбээр 5,1 тэрбум төгрөгийн хөрөнгөтэй. Өөрөөр хэлбэл парламент дотроо цээжинд бичигдэх баячуудын нэг байв. Насаараа бизнес эрхэлж байгаад УИХ-д орж ирсэн “Оргил”-ын Ж.Ганбаатар гишүүнтэй тэнцэхүйц хөрөнгөлөг нэгэн гээд бод. Эхнэрийнхээ албан тушаалын хаялгаар төрийн албанд төвөггүй залардаг П.Баярмагнайн хувьд, 2020 онд АТГ-т гаргасан хөрөнгө орлогын мэдүүлэгтээ нийт орлогоо 12 сая 355 мянган, гэр бүлийн орлого 107 сая 18 мянга, 342 саяын үнэ бүхий дөрвөн автомашин, 4 тэрбум 500 саяын орон сууц, 92 саяаар үнэлэгдэх адуу 10, үхэр 50 хонь 200, “Май кап дизайн” ХХК, “Трот интернэшнл” ХХК-тай хэмээн мэдүүлсэн байдаг.
Нэг гартаа төрийн өндөр албаны тамга атгаж, нөгөө гараараа хувийн бизнесээ арчилж торддог гэр бүлийн хоёрыг төрөөс төрсөн тэрбумтан гэж хардах эрх олон нийтэд бий. ХЗДХ-ийн сайд О.Алтангэрэлийн санаачилсан хөрөнгө хураах хуулиар бол экс гишүүн Б.Баярсайханаас хамгийн түрүүнд “ял” асуух ёстой. Төрийн байгууллагын хэвлэлийн төлөөлөгчөөс эхлээд яамны Төрийн нарийн бичгийн дарга, УИХ-ын гишүүнээр ажиллахдаа хэрхэн хөрөнгөжсөнийг нь, хэрхэн тэрбум тэрбумын хөрөнгөтэй болсныг нь олон нийт мэдэх эрхтэй.
Гуравт. Хүүхэд, гэр бүлийн хөгжил, хамгааллын ерөнхий газар хэмээх нэрнээс нь л энэ агентлаг ямар чухал, эмзэг, нандин бэ гэдэг нь харагдана. Мэргэжлийн, мэргэшсэн, туршлагатай, сэтгэлтэй, ур чадвартай хүмүүс л энэ газрыг удирдаж, энд ажиллаж, Монголын ирээдүйд гэрэл гэгээ тусгаж, монгол гэр бүлд аз жаргалтай сайхан амьдралын учгийг атгуулдаг байх учиртай. Харамсалтай нь, энэ агентлагт өнөөдөр ямар ч гэрэл гэгээ алга. Дарга нь дээрээс томилогдож ирсэн популист улстөрч, амин хувийн ашиг сонирхолтой, нэр хүнд муутай, төрийн албаны туршлага түй ч байхгүй, олбогноосоо гулссан экс гишүүн.
Хүүхэд, гэр бүлийн асуудалд анхаарал хандуулна гэж байгаа юм бол хүүхдийн байгууллагыг увайгүй улстөрчдөөсөө эхлээд салгаач, Ерөнхий сайд аа!
Г.Ууганбаатар
