Ерөнхий сайд Л.Оюун-Эрдэнэ: Хүүдээ нэг зүйлийг зарчмын хувьд илэн далангүй хэлсэн нь “Хэрвээ орлогоо нотолж чадахгүй бол сүйн бөгж байсан ч хураалгах ёстой зүйл. Энэ бол нийтийн зүгээс тавьж байгаа зөв зүйтэй шаардлага” гэж хэлсэн

Манай хүү одоо 23 настай, эрийн цээнд хүрч байна. Найз охинтой болсон нь үнэн байна. Найз охиных нь ар гэр, аав ээжтэй нь уулзаж танилцаж амжаагүй. Хүнд хайр сэтгэлтэй болж сүйн бөгж бэлэглэсэн нь үнэн байна. Хүүгийнхээ хайр сэтгэлийн асуудалд хүндэтгэлтэй хандаж байна.

Би, хүүтэйгээ ярьсан зүйл бол олон нийтийн зүгээс гаргаж тавьж байгаа шүүмжлэл зөв зүйтэй зүйл ээ. Хүн бүхэн хуулийн өмнө тэгш амьдрах ёстой. Орлогоо нотлох ёстой. Манай хүүгийн хувьд надтай ямар нэг байдлаар хүнтэй сүй тавих гэж байгаа, надад мөнгө төгрөг хэрэгтэй байна гэдэг зүйлийг яриагүй.

Миний хувьд ч бас завгүй явсан, сул талтай ч холбоотой байхыг үгүйсгэх аргагүй. Говьд ажиллаж байх хугацаандаа, хүү маань найз охинтой болсон байна, найз охиных нь аав, ээжтэй уулзаж ярилцах аав хүний үүрэг над дээр үүсч байгааг ухамсарласан. Бөгж авснаа хүлээн зөвшөөрч байна. Би хүүдээ орлогоо нотлох ёстой гэдэг зүйлийг хэлсэн.

Манай хүүгийн хувьд та бүхэн мэдээж цаашдаа мэдээлэлтэй болно. Анх удаа, манай гэр бүлийн гишүүн, том хүүгийн маань мэдээлэл олон нийтэд ил болж байна. Хэтэрхий янз бүрийн юманд орооцолдов, хүний нүдэнд харагдав гэж байнга үглээд байдаг нь бас ч буруу юм шиг байгаа юм. Ер нь бол том болсон, насанд хүрсэн хүн өөрийнхөөрөө нийгэмд, хүмүүст танигдаад явах нь зөв зүйтэй зүйл байж магадгүй.

Багаасаа мань хүн аялах дуртай, Монголдоо аялал жуулчлалын чиглэлээр сурах сонирхолтой бас нээлттэй, студийн үйл ажиллагаа эрхлэх сонирхолтой, “Херо”-той хамтарч ажилладаг байсан. Миний хөрөнгө орлогын мэдүүлэг дээр та бүхэн мэдэж байгаа, 2 компани байдаг. Нэг нь “Херо энтертайнмент”-ийн 50 хувь, нөгөө нь “Хүлэг контен гэдэг 2 компани байдаг. Түүнтэй холбоотой контент хийнэ гээд явж байгаа залуу хүн.

Яваандаа өөрөө олон нийтэд өөрийнхөө талаар мэдээлэл өгөөд явах нь өөрийнх нь асуудал. Би бас хүүгийнхээ өөрийнхөөрөө амьдрах хувь хүнийх нь орон зайд халдахыг хүсэхгүй байна.

Нэг зүйлийг зарчмын хувьд илэн далангүй хэлсэн. Хэрвээ орлогоо нотолж чадахгүй бол сүйн бөгж байсан ч хураалгах ёстой зүйл ээ, энэ бол нийтийн зүгээс тавьж байгаа зөв зүйтэй шаардлага гэж хэлсэн. Олон нийтийн зүгээс гаргаж тавьж байгаа асуудалд миний хувьд хүндэтгэлтэй бөгөөд талархалтай хандаж байна. Олон нийтийг талцуулах асуудал болсонд хүлцэл өчиж байна. Уучлалт гуйж байна.