Олон улсын лаборатори байгуулах хүртэл ураны төслийг царцаах тохиролцоог Парист “зуржээ”

Монгол Улсын Засгийн газар БНФУ-ын “Орано майнинг” компанитай ураны төслийн хөрөнгө оруулалтын гэрээнд энэ оны нэгдүгээр сарын 17-ны өдөр гарын үсэг зурсан юм. Ингэснээр олон жил гацсан ураны хөрөнгө оруулалтын төсөл хөдлөх болов. Харин гэрээ зурагдахтай зэрэгцээд Монголын иргэний нийгмийн байгууллагууд ураныг шинжлэх олон улсын лаборатори байгуулах шаардлагыг тавиад байсан бол улмаар Монгол Улсын Засгийн газар олон улсын жишигт нийцсэн лаборатори байгуулах, иргэдийн хяналтын зөвлөл байгуулах шийдвэрийг гаргасан юм. Тэгвэл ЗГХЭГ-ын дарга Н.Учрал ажлын хэсгийг ахалж Парист болсон Монгол-Францын Засгийн газар хоорондын комиссын хуралдаанд оролцоод иржээ. Энэ үеэр хоёр талаас хэд хэдэн  асуудлаар харилцан тохиролцоонд хүрчээ.

 

Нэгдүгээрт, Дорноговь аймагт олон улсын итгэмжлэгдсэн лаборатори байгуулах хүртэл ураны төслийг зогсоох саналыг Францын талд тавьж, харилцан тохиролцжээ. Өөрөөр хэлбэл, хүн, мал, амьтан, байгаль орчны эрсдлийг орон нутагт нь дэлхийн түвшинд шинжлэн судлах боломж бодитой болтол ураны төслийг зогсоож байгаа аж.

Хоёрдугаарт, иргэд хяналтын зөвлөл байгуулна. Хараат бус зөвлөл иргэний хяналт тогтоож, ил тод нээлттэй ажиллах нөхцлийг бүрдүүлж, олон нийтийн мэдэх эрхийг хангаж ажиллана.

Мөн хоёр улс Онцгой байдлын нисдэг тэрэг, техник төхөөрөмжийн туслалцаа, эрчим хүчний эс үүсвэрийг төрөлжүүлэх, боловсрол, соёлын хамтын ажиллагааг өргөжүүлэн гүнзгийрүүлнэ.

Монгол-Франц улс дипломат харилцаа тогтоосны 60 жилийн ойг тохиолдуулан хамтарсөн өдөрлөг, боловсрол, соёлын цуврал арга хэмжээ зохион байгуулахаар болсон байна.