Гэр бүлээс гадуурх харилцаанаасаа болж эхнэрээ үхэлд хүргэсэн Элчин сайд А.Төмөр гэж хэн бэ?

Тайландын хаант Улсад суугаа Монгол Улсын Элчин сайд А.Төмөрийн гэргий Л.Орхон өндрөөс унаж нас барсан хэрэг тавдугаар сарын 9-ний өглөө үүрээр гарсан. Хохирогч 17 давхраас 4-р давхрын тагтан дээр унаж, амиа алдсан бөгөөд талийгаачийн үхэл амиа хорлолт уу, гадны нөлөөтэй юу гэдгийг хууль хяналтын байгууллагаас шалгаж байгаа. Харин талийгаачийн ар гэрийнхэн өнгөрсөн долоо хоногоос эхлэн дүүгийнхээ үхэлд нөхрийг нь бас хувийн харилцаатай гэх жүжигчин эмэгтэйг нөлөөлсөн гэж үзэж буйгаа цахим сүлжээнд илэрхийлж эхэлсэн.

Тэгвэл А.Төмөр гэж хэн бэ? Тэрээр ГХЯ-нд 10 гаруй жил ажилласан, сүүлд Олон улсын гэрээ, эрхзүйн газрын захирлаар ажиллаж байгаад 2020 онд анх удаа дипломат албан тушаалд томилогдсон нь Тайландын Хаант Улсад Монгол Улсаас суугаа Элчин сайд. Өдгөө тав дахь жилдээ Элчин сайдаар ажиллаж буй А.Төмөрийн аав нь Монгол Улсын Үндсэн хуулийн цэцийн дарга асан Ж.Амарсанаа.

Ж.Амарсанаа нь Монгол Улсын Гавьяат Хуульч, академич, профессор бөгөөд Хууль зүйн ухааны болон Шинжлэх ухааны докторын зэрэгтэй нэр хүндтэй хуульчдын нэг. 2012 онд Үндсэн хуулийн цэцийн даргаар томилогдож, 2016 онд огцорсон бөгөөд энэ үйл явцыг тухайн үед улс төрийн хэлмэгдүүлэлт байсан гэж зарим хүмүүс үздэг. А.Төмөрийн гэргий талийгаач Л.Орхон нь Нортхэмптоны их сургуульд тусгай хэрэгцээт боловсролын чиглэлээр магистрын зэрэг хамгаалсан, Монголын соёлыг олон улсад сурталчлах, хүүхдийн боловсролыг дэмжих чиглэлээр идэвхтэй ажилладаг өндөр боловсролтой, нийгмийн идэвхтэй бүсгүй байсан аж.

Мөн “Thai Silk Road to the World” зэрэг олон улсын арга хэмжээнд Монголын төлөөллийг зохион байгуулж оролцуулж байсан тэрээр “Элчин сайдын эхнэр гэдэг асар чухал үүрэг хариуцлага байдаг. Тайланд хүмүүсийн зочломтгой найрсаг зан чанарын ачаар мартагдашгүй үнэ цэнтэй цаг хугацааг өнгөрүүлж байгаа хэмээн Тайландын “Elite Plus” сэтгүүлд ярилцлага өгч байжээ.