Л.Оюун-Эрдэнэ огцорвол шинэ Ерөнхий сайдад Д.Амарбаясгалан, Х.Нямбаатар нарын нэг нь томилогдох уу?
Л.Оюун-Эрдэнийн засгийг унагах операци одоогоос 3 сарын өмнө зурагдаж эхэлсэн. Шалтаг болоод шалтгаан нь ч тодорхой. Гашуунсухайтын төмөр замын хил холболт буюу нүүрсний зодоон үеийн үед Засгаа тонгордог бичигдээгүй хуультай. Бүтэн 20 жил гацсан төмөр замын хил холболтын гэрээг үзэглэж, бүтээн байгуулалтын нээлтээ хийж явах /2025.05.14/ цаг мөчтэй давхацан цүнх, бөгжний хэрэг эрчээ авч улмаар “Огцрох амархан” жагсаал төв талбайд гарч ирсэн нь санамсаргүй хэрэг биш юм. Өөрөөр хэлбэл улс төрчийнхөө хувьд легасигаа хийчихлээ, би чадлаа гэж хөөрцөглөж, өмнийн говьд сэлэм эргүүлж явахад нь эндээс үхлийн цохилт өгсөн нь жагсаалын захиалагчид чухам юун дээр тийрч буйг амархан уншиж болохоор.
Ухаа худагийг ухаж улсаасаа баян болсон MCS групп эл акцийн гадаад дахь гол хүч, захилагч. Харин саарал ордноос зохиолыг бичиж, найруулгыг хийсэн хүн нь УИХ-ын дарга Д.Амарбаясгалан гэх яриа улс төрийн хүрээнд яригдаж буй.
Юун түрүүн тэрээр Бортээг дээрээ тийрсэн. Хоёрт, дараагийн Ерөнхий сайдад түүний нэр хэдийнэ тодорхой болсон байсан. Л.Оюун-Эрдэнийн гараар Гашуунсухайтыг хөдөлгөчихөөд, үүн дээр нь дөрөөлж андыгаа тонгорчихоод өөрөө МАН-ын мянга, мянган гишүүдийн хүсэлтээр Ерөнхий сайдын суудалд залрах “барбарис” төлөвлөгөө өнөөгийн улс төрийн хүрээнд гагцхүү Д.Амарбаясгалангаас л гарах ухаалаг тоглолт биз ээ. Учир нь тэр стратегич, харин Л.Оюун-Эрдэнэ сүү уудаг гэнэн бамбарууш юм.
Гэхдээ нэг асуудал. Л.Оюун-Эрдэнэ Д.Амарбаясгалангийн эл төлөвлөгөөг мэдээгүй гэвэл бас тийм биш. Ах нам энэ асуудлыг нэлээн дээд түвшинд ойлголцсон. Гэхдээ генсек, спикер хоёрыг сэлгэнэ хэмээн тохирсон. Гэтэл ачир дээрээ Д.Амарбаясгалан, Л.Оюун-Эрдэнэ хоёрын байрыг солилоо гээд яг юу өөрчлөгдөх юм. Өнөөдрийн энэ уурссан байгаа олон нийт ийм солилцоог хараад зүгээр суух юм шиг байна уу гэдэг шүдний өвчин. Одоо чухам үүн дээрээ л МАН, намын цөөн томчууд зургаа зурж, тохироогоо хийж буй болов уу. Магад ч үгүй Д.Амарбаясгалан хойш сууж болох юм. Энэ тохиолдолд өдгөө Д.Амарбаясгалантай нэлээн дээд хэмжээнд тохирч, Засагт хүч, нөлөөгөө зузаатгах тохироо хийсэн Х.Нямбаатар гараад ирж ч магадгүй юм. Учир нь одоогоор түүн шиг хэрүүлч, заргач, хэний ч өмнөөс салаавч гаргаад сууж байх public power-тэй нөгөө талаараа улс төрийн хүрээнд хэлэлцээ хийх чадвартай улс төрч ховор.
Аль ч тохиолдолд ах намынхны өнөөдрийн хурлаараа шийдэх гол асуудал бол Л.Оюун-Эрдэнийг хэрхэн нэр цэвэр буулгаж, арай ч нэг сул гишүүн болгочихгүй томилгоо хийх вэ, хэрхэн энэ олон намын эрх ашгийг эхийг нь эцээж, тугалыг нь тураахгүйгээр шийдэх вэ, хэрэв АН, ХҮН-ийг засгаас гаргалаа гэхэд дараагийн Засгийн газраа хэрхэн тогтвортой барих вэ гэдэг асуудал. Хэрэв АН, ХҮН засгаас гарлаа гэхэд Үндэсний эвсэл Н.Номтойбаяр засагт хүч түрнэ. Түүний хүмүүс шинээр байгуулагдах засагт хаана, ямар томилгоог авахаа хэдийнэ тохирч, бие, сэтгэлээ бэлдээд эхэлчихсэн байгаа. Н.Номтойбаярын ард улс төр талаасаа М.Энхболд, гадаад талаасаа баялаг бүтээгчид буюу өнөөдрийн жагсаалын захиалагчид байгаа гэдгийг мартаж болохгүй.
Бүх зүйл МАН-ын Бага хурал 15.00 цагаас хуралдаж, хамтарсан Засгийн газар дээр ямар шийдвэр гаргахаас Л.Оюун-Эрдэнэ үлдэх эсэх нь хамаарна.
