Хөшигний ард: Л.Оюун-Эрдэнийг унагах сценарийг Х.Нямбаатар эвджээ

Цүнхнээс улбаатай Л.Оюун-Эрдэнийн хувь заяаг Ерөнхийлөгч У.Хүрэлсүх зурахдаа “Өөрийн хүсэлтээр ажлаа өг. Ёс зүйн зарчмаа барь” гэсэн. Сайн дүү за гэсэн. Гэхдээ би шууд цагаан тугаа өргөх тиймхэн байна, намынхаа бага хурлаар шийдүүлье гэсэн. Хамтарсан Засгийн газрынхаа хувь заяа, сайн мууг ч дэнслүүлье гэсэн.

Гэтэл хөндлөнгөөс гэнэт Х.Нямбаатар довтолж орж ирснээр бүх сценари эвдэгдээд байгаа аж. Тодруулбал, хотын дарга үеэлдээ “Ингэж шууд бууж өгөхгүй ээ. Бага хурал дээр надад хангалттай кноп байна. Хамгаална. Та ингээл явчихвал араас чинь намайг ч явуулна” гэснээр бүх тоглолт орвонгоороо эргэж, ах намынхан өөр хоорондоо ёстой үймэлдэн бужигнаж байгаа аж. Хаадын хаан, хэлэлцээрийн бурхан тэнгэр, хотын МАН-ын дарга үеэл Х.Нямбаатараасаа зориг авсан Л.Оюун-Эрдэнэ хувь заяагаа намынхаа гишүүдээр шийдүүлье хэмээн гэдийчихсэн суугаа аж.

Товчхондоо гол тулаан Д.Амарбаясгалан, Х.Нямбаатар хоёрын хооронд өрнөх нь. Хэн нь бага хурал дээр хүч, бяртайгаа үзэх тулаан 20 минутын дараа буюу 15 цагаас эхлэх МАН-ын бага хурлын тайзан дээр эхлэх нь.

Намын бага хурлын гишүүдийн тал нь Д.Амарбаясгалангийн кноп гэхэд үлдсэн тал нь Х.Нямбаатарын халаасанд /Сонгинохайрханаас угшилтай гэдгээрээ Н.Учралын кноп ч Х.Нямбаатарынх гэсэн үг/, үндсэндээ цус гарсан тулаан болох нь ойлгомжтой болжээ.

Хамгийн хоржоонтой нь АН-ын фракцууд өчигдөр өдөржин, шөнөжин булан, буландаа хуралдахдаа нэгэнт МАН ингэж байгаа юм бол хөөгдөж бие хаяж гарцгаая, жинхэнэ хүчтэй сөрөг хүчин болъё гэдэг дээрээ үндсэндээ тохироод байсан ч эцсийн мөчид Х.Нямбаатар Л.Оюун-Эрдэнээ ч, хамтарсан Засгаа ч авч үлдэнэ гэсэнд итгэж шийдвэрээсээ эргэж буцсан байдалтай, Засагт үлдэх дээрээ чичирсэн маягтай суугаа аж.

Эцсийн бүлэгт Д.Амарбаясгалан тээр тэнд, заалнаас Б.Жавхлан, Ж.Энхбаяр, Б.Энхбаяр, С.Бямбацогт, Г.Занданшатар, Я.Содбаатар нарын 70-аад оны төлөөллүүдээс ч Ерөнхий сайд тодорч магадгүй тааварлашгүй нөхцөл байдал дунд МАН-ын бага хурал өрнөх нь тодорхой болжээ.