Хагархай АН-ын хамтарсан улс төр
Хамтарсан засгийн хагарал,
Хамтраад, машиныхаа хаалгыг хапхийтэл хаагаад замдаа ороод хурдалсан юмсан Засгийн газар. Өөд уруугүй шороо манарган давхиж, антифризээ ч сольж амжихгүй хаазалсаар гэнэт мотор нь цохиж орхилоо. Үзэгчид уулга алдав. Наад машинаа замаас гарга гэж уурсав.
Харин жолооч бууж ирснээ “мотороо солиод явчихья л даа” гэж учирлаад болохгүй болохоор нь хоёр дугуйгаа өшиглөв. Дугуйнуудаа сольчихвол цаашаа явчих бололтой. Гэтэл яасан гээч, хоёр дугуйны нэг талынх нь үйлдвэрлэгч нь “наад дугуйгаа солиод хаячихаа!” гэж уриалдаг байгаа. Нөгөө талын үйлдвэрлэгч хүртэл хүч нэмэн, “зөв, наад дугуйгаа тайлж хая!” гэж байгаа нь хоржоонтой. Цаашаа их хол явах бололтой юм, санаа нь.
“Хамтраагүй” засагт замнал бий юу?
Хамтарсан засгийн газрыг харахдаа гэнэн хүмүүс нь зөвхөн Оюун-Эрдэнэ, Гантөмөр, Доржханд гурваар харж байна. Тухайлбал Доржханд засгаас гарчихвал ХҮН нам хамтралаас гарч байгаа нь тэр гэх мэт. Тэгвэл мундарсан тэрэгний сандарсан жолооч л дугуйгаа өшиглөснөөс биш хашир агаад башир хүмүүс бол энэ хамтрал зайлшгүй гэдгийг ойлгож байгаа. Тиймдээ ч АН-ын хэсэг бусаг фракцаас Гантөмөр даргыгаа зогсоо зайгүй балбаж, хөөж явуулаад оронд нь суучих санаархлаа бүр эхнээс нь, тэр байтугай эхлээгүй байхад нь хийж байлаа. АН ч мөн дөө! Сониноос засаг унагаж дараагийн Ерөнхий сайд болох гэсэн тэмцлийн дотор нь ахиад нэг тийм адилхан, гэхдээ мини тэмцэл явагдаж байгаа нь сонирхолтой ч юм шиг.
Гэхдээ МАН ч нээх дээрдэхгүй. АН шиг ил цагаан балбалцдаггүй л болохоос бас л зуунги үзэлцдэг нам. Одоо бол тэхий дундуураа хоёр хуваагдаж нэгийг нь Ерөнхий сайд өөрөө толгойлж, нөгөөг нь Ерөнхийлөгч өөрийн биеэр зоригжуулж буй сураг дуулдана. Ийм тохиолдолд “наад машин чинь цаашаа явах юмуу даа, сольвол яасан юм бэ!” гэх дуу чимээ цаанаас дуулдах нь хэр.
Ерөнхий сайд анх засаг толгойлж эхлэхдээ л урьд өмнөх “жил зургаагийн” настай Засгийн газруудын алдааг давтахгүйг хичээж, Үндсэн хуулийн нэмэлт өөрчлөлтийг уухайлснаар эрх зүйн хувьд батжиж чадсан. Гэлээ гээд гэрийнх нь ард урдаас цоолоод байх нь дамжиггүй, цоолж ч эхэлсэн тул хумс хуурайтай бүхнийг өөртөө татан сандал ширээ өгч, арай ч жиргээ, фэйсбүүкээс дарга тавихдаа тулсангүй. Энэ жаахан базаахгүй сонсогдох ч заавал болгочихоё гэсэн мега төслүүдийн аврал гагцхүү энэ. Өөр ямар ч засаг байсан, өөр хэн ч байсан зайлшгүй энэ замыг сонгоно! Эс тэгвэл гудамжнаас том намуудаас чулуу шидүүлж, ар шилнээсээ ах нараараа амбаардуулаад түргэн тонилох нигууртай аж. Залуу хүн зөвхөн “ерөнхий сайд болж үзэх”-дээ биш, ерөнхий сайд байхдаа дурсагдах нэр төрийг бодох нь хэр шүү дээ.
Дугуй дугуйгаа олоогүй үед
За АН-ын дарга Л.Гантөмөр лав хамтарсан “Засгийн үзэл санаанаас ухрахгүй” гэж мэдэгдлээ. Ямар дуртай нь аваад хэрэглээд хаядаг цаас биш дээ, эр хүн ингэлгүй ч яахав. Улс төрд удаан ч явлаа, Монголын хоёр дахь том намыг толгойлж ч байна. Харин нөгөө талд ХҮН намын Доржханд “хэрэв засгаас гарвал ямар сөрөг хүчин болохоо үзүүлнэ” гэж ам алдаж байгаа нь ёстой нөгөө “цочихдоо цоржоо дэлсэх” гээч нь болов. Сөрөг хүчин гэж сөрөхийн нэр. Улс төрийн хүчний сөрөх шалтгаан нь үзэл баримтлал байх ёстой. Доржханд гуайд Засгийн газрыг сөрөх боломж байгаа бол тийм үзэл баримтлал нь байгаа гэсэн үг. Тэгвэл тэрийгээ хааш нь нуучихаад Засагт хамтарсан хэрэг вэ? Тун ч том төөрөгдөл үүсэж байна шүү. Доржханд гэдэг дугуйнд хумс байвал мотороо ч маажиж, шүд байвал нөгөө дугуйгаа ч хазах нь ээ дээ?
ХҮН-ий дарга хөнгөдсөн ч, нам нь гоё харагдаж байна. УИХ-ын гишүүн Золжаргал жагсагчидтай санаа нэгтэй байгаагаа илэрхийлсэн. Дөлгөөн гэх эмэгтэй ч намаа хатуухан шүүмжилж байна лээ. Иргэд энийг хүсдэг.
Харин АН-ын дарга тулх заасан ч нам нь ёстой хөгийн байна. Хөгийнийг нь мэдэхгүй ч хэн байхав дээ, ингэж л байдаг улс. Уг нь Гантөмөр өөрийн мэдлийн дунд шатны ажлуудад намынхаа фракц бүрээс л тавьж, сайн алаглуулсан. Бүү мэд ээ! Гэхдээ энэ Ардчилсан намын энэ хэзээ ч эв гаваа олдоггүй байдал нь төрийн хяналтыг унтраахүй байхад хэрэг болж байна. Төмөр замын булхайг хяналтын менежер Тамир сайн ухаж харагдана лээ. Ямар ч муу юманд сайн тал агуулагддагийн жишээ ч юм уу.
