Ерөнхий сайдын манлайлалыг дэмжиж нам үл харгалзан кабинетийн гишүүнийхээ ажлыг манай найман сайд хангалттай биелүүлсэн
МАН-ын Бага хурал өчигдөр /2025.05.22/ хуралдаж, Ардчилсан намыг гэрээгээ зөрчсөн гэж үзэн хамтарсан Засгийн газраас гаргахаар шийдвэрлэсэн. Тиймээс Засгийн газраас АН-ын найман сайдыг гаргах болж байна. Энэ асуудалтай холбогдуулан Монгол Улсын сайд, Хяналт, үнэлгээний Үндэсний хорооны дарга Э.Одбаярдараах байр суурийг илэрхийллээ.
Тэрбээр, "Ардчилсан нам төв барууны үзэлтэй өөрөөр хэлбэл хүний эрх, эрх чөлөөг дээдэлсэн, чөлөөт эдийн засгийг бий болгох, аль болох төр цомхон байх ёстой гэсэн философитой. Тиймээс бизнесийн эрх чөлөөг нэмье, хувийн хэвшилийг дарамтаас чөлөөлье гэсэн эдгээр ажлыг хийж хэрэгжүүлэхийн төлөө эдийн засгийн төлөвлөлтөө зөв хийе гэдэг агуулга, үзэл санааны хувьд ажил хийх боломжтой салбарууд руу манай сайд нар түлхүү ажиллалаа. Гал авсан, нэлээд гацсан байсан асуудал дээр кабинетийн зарчим барьж, кабинетийнхаа бусад гишүүдийн асуудал руу орж, Ерөнхий сайдын манлайлалыг дэмжиж, нам үл харгалзан кабинетийн гишүүнийхээ ажлыг манай найман сайд хангалттай биелүүлсэн гэж үзэж байна" гэв.
