Дэлхийн Гаалийн байгууллагын “Барааны ангилал болон ангиллын урьдчилсан шийдвэр” сэдэвт үндэсний сургалт зохион байгуулагдаж байна
Монгол Улсын Гаалийн ерөнхий газрын урилгаар Дэлхийн Гаалийн Байгууллага (ДГБ)-аас Тариф, худалдааны газрын техникийн ахлах мэргэжилтэн, хатагтай Ламиа Фригуй, ДГБ-ын итгэмжлэгдсэн уялдуулсан системийн мэргэшсэн сургагч багш, хатагтай Яра Новис мөн БНСУ-ын Эдийн засаг, сангийн яамны Аж үйлдвэрийн тарифын хэлтсийн мэргэжилтэн, ДГБ-ын итгэмжлэгдсэн сургагч багш, хатагтай Сери Ким нар энэ сарын 19-23-ны өдрүүдэд Улаанбаатар хотноо ирж “Барааны ангилал болон ангиллын урьдчилсан шийдвэр” сэдэвт сургалтыг зохион байгуулж байна.
Энэхүү сургалт нь Монголын гаалийн байгууллагын барааны ангиллын чадавхийг бэхжүүлэх, мөн ангиллын урьдчилсан шийдвэрийн хууль, эрх зүйн орчныг сайжруулахад дэмжлэг үзүүлэх зорилготой бөгөөд сургалтанд хамрагдсан алба хаагчид ДГБ-ын суурь зарчим, стратегийг судлахаас гадна барааны ангиллын олон улсын гол зарчмуудыг гүнзгийрүүлэн ойлгож, ангиллын урьдчилсан шийдвэрийн хууль, эрх зүйн үндэслэлийг судалж байна. Мөн Монголын гаалийн тулгамдсан асуудлуудад ДГБ-ын экспертүүдийн зүгээс мэргэжлийн зөвлөгөө, дүн шинжилгээ өгч байгаа нь сургалтын практик ач холбогдлыг нэмэгдүүлж байгаа юм.
Монгол Улс 1991 онд “Барааг тодорхойлох, кодлох уялдуулсан систем”-ийн тухай олон улсын конвенцид нэгдэн орж, 1993 оноос эхлэн хэрэгжүүлж эхэлсэн. Энэхүү систем нь олон улсын “худалдааны хэл” болж, дэлхийн 200 гаруй улс энэхүү кодчиллын дагуу барааг тодорхойлж, гаалийн бүрдүүлэлт хийдэг. Харин сүүлийн жилүүдэд гадаад худалдааны цар хүрээ нэмэгдэж, бараа бүтээгдэхүүний төрөл олон болсон нь гаалийн байгууллагын үүргийг улам өргөжүүлж байна. Тиймээс барааны ангиллыг зөв, оновчтой тодорхойлох нь гадаад худалдааг хөнгөвчлөх, татварын зөрчил, маргаанаас сэргийлэх, улмаар улсын төсвийн орлогыг үнэн зөв бүрдүүлэхэд чухал нөлөөтэй юм.
Цаашид Монголын гаалийн байгууллага мэдээллийн технологи, хиймэл оюун ухаанд суурилсан их өгөгдлийн системийг ашиглан барааны ангиллыг автоматжуулах чиглэлээр зорилт тавин ажиллаж байгаа нь олон улсын стандартад нийцсэн, ил тод, шуурхай гаалийн бүрдүүлэлтийг хангахад чухал алхам болох юм.
